Ko e Kau Paionia ʻi he Fonua Kotoa Pē
Sūlia Mavimipela
Taki Fakakolo ʻi ʻAfilika Tonga
“‘Oku ma‘u pē ‘a e ‘ofá ‘i hono fakamolemole‘i ‘o e ni‘ihi kehé.”
Naʻe holoholoʻi ʻe Sūlia hono kemó. Peá ne toʻo hake ʻene sāvoló ʻo kamata ʻene kelí. Ko e kelekele ʻokú ne takatakaiʻi ia ʻi he taimi ní, ko ha kelekele pē. Ka naʻe vave pē ʻene hoko ko ha ngoue fakaʻofoʻofa.
Ko ha ngaahi taimi faingataʻa ki he kakai ʻUliʻuli ʻo ʻAfilika Tongá. Naʻe fakamavahevaheʻi ʻe he ngaahi lao aí ʻa e Kau ʻUliʻulí mei he Kau Hinehiná. Naʻe tokolahi ha kakai ʻUliʻuli ne fakamālohiʻi ke mavahe mei honau ngaahi ʻapí pea nofo ʻi he ngaahi feituʻu pau ʻo mamaʻo mei he kakai Hinehiná pea ʻikai ke nau lava ʻo fili (vote). Naʻe ʻi ai ha ngaahi fetāʻaki ʻi he tukui kolo ne nofo ai ʻa Sūliá, pea iku ʻo tāpuni ai ʻa e ngaahi ʻapiakó. Naʻe ʻi ai ha taimi ʻe niʻihi naʻe fakatuʻutāmaki ke te ʻi tuʻa.
Ka naʻe ʻikai taʻofi ai ʻa Sūlia. Naʻá ne fie maʻu ke fakahoko ha meʻa ʻe lelei ki hono koló. Ko e ʻuhinga ia ʻene kamataʻi e kiʻi ngoué.
Naʻe mamata ha longaʻi fānau ki he ngāue ʻa Sūliá. Naʻa nau fehuʻi ange, “ʻE lava nai ke mau tokoni atu?”
“ʻIo,” ko Sūlia ange ia. Naʻá ne ʻoange kiate kinautolu takitaha ha sāvolo. Naʻá ne fakahaaʻi ange kiate kinautolu ʻa e founga ke fakamolū ʻaki e kelekelé pea taʻaki e fanga kiʻi vaó.
Naʻá ne pehē ange, “Tuku muʻa ke tau keli pē ʻa e kelekele ʻo e mamahí, lī ki ai ha tenga ʻo e ʻofá, pea tau vakai ki ha ngaahi fua ʻe lava ke ne ‘omi maʻatautolu.” “ʻOku maʻu pē ʻa e ʻofá ʻi hono fakamolemoleʻi ʻo e niʻihi kehé.”
Naʻe toe lahi ange ha ngaahi fuʻu ʻakau ne tupu ʻi he hili ha ngaahi uike. Naʻe tokolahi mo ha kakai kehe ne omi ke ngāue ʻi he ngoué. Naʻa nau taʻaki ʻa e ngaahi fuʻu vao lalahí. Naʻa nau tō ha ngaahi tengaʻi ʻakau lahi ange. Naʻa nau fuʻifuʻi ʻa e fanga kiʻi ʻakaú. Naʻe fiefia ʻa Sūlia ʻi heʻene mamata ki he tokoni ʻa ha kakai tokolahi pehē.
ʻI he ʻaho ʻe taha naʻe fetaulaki ai ʻa Sūlia mo ha ongo talavou. Naʻe ʻohovale ʻa Sūlia he naʻe tātaaitaha pē ke omi ha kakai Hinehina ki honau feituʻú. Naʻá na pehē ko ha ongo faifekau kinaua. Naʻá ne fakaafeʻi kinaua ke vahevahe ha pōpoaki ʻi hono ʻapí.
Naʻe ʻohovale ʻa e foha ʻo Sūliá ʻi he fanongo te na haʻú. Naʻá ne fehuʻi ange, “Ko e hā e ʻuhinga naʻá ke fakaafeʻi mai ai kinauá?” “ʻOkú na Hinehina. ʻOku fakatuʻutāmaki.”
Ka naʻe falala ʻa Sūlia ki he ongo faifekaú. “‘Oku kehe ʻa e ongo tangatá ni,” ko Sūlia ange ia. “‘Okú na malanga ʻaki ʻa e melinó.”
ʻI he taimi naʻe omi ai ʻa e ongo faifekaú, naʻe talitali lelei kinaua ʻe Sūlia ki lotofale. Naʻe fakatokangaʻi ʻe ha toko taha ʻiate kinaua ha laʻitā ʻi he funga tafuʻanga afí. Ko ha tā ia ʻi he ʻaho mali ʻo Sūliá.
“Ko hai ē?” ko e fehuʻi ange ia ʻa e faifekaú mo tuhu ki he laʻitaá.
“Ko hoku husepāniti ko Sioné.” Naʻe sio ʻa Sūlia ki lalo. “Naʻá ne mālōlō ʻi ha fakatuʻutāmaki ʻi ha kā ʻi he halá.”
Naʻe kamokamo pē ʻa e faifekaú. “ʻOku mau tui ʻe lava ʻa e fāmilí ke taʻengata, ʻo aʻu pē ki he hili ʻenau maté.”
Naʻe ʻi ai ha ongoʻi nonga ʻia Sūlia. Naʻá ne ongoʻi fiefia ke ako fekauʻaki mo e palani ʻa e ʻOtuá pea hokohoko atu ʻa e fakataha mo e kau faifekaú. Naʻe tupulaki ʻa e ʻofa ʻi he loto ʻo Sūliá ki he ongoongoleleí, ʻo hangē pē ko e ʻakau ʻi heʻene ngoué. Naʻe vave pē haʻane fili ke papitaiso.
Naʻe fetaulaki ʻa Sūlia ʻi he lotú mo ha kakai foʻou tokolahi. Ko e niʻihi naʻe ʻUliʻuli Ko e niʻihi naʻe Hinehina. Ka naʻa nau ngāue pea ako fakataha kotoa pē.
Naʻe fakahaaʻi ange ʻe Sūlia ki he fānau ʻi he lotú ʻa e founga ke tokoni ai ʻi heʻene ngoué. Naʻá ne pehē, “Kuo pau ke fakavaivaiʻi hotau lotó, hangē ko e kelekele ko ‘ení.” “Kuo pau ke tau tuku ha feituʻu ʻi hotau lotó maʻá e ongoongoleleí. Kuo pau ke tau fakaʻatā ha feituʻu ki he ʻofá.”
ʻI he hili ha taʻu ʻe hongofulu mā tolu mei hono papitaiso ʻo Sūliá, ne taʻofi e ngaahi lao naʻá ne fakamavahevaheʻi ʻa e kakai ʻUliʻulí mei he kakai Hinehina ʻi ʻAfilika Tongá.
ʻOku meimei ke ʻi he toko 70,000 ʻa e kāingalotu ʻo e Siasí ʻi ʻAfilika Tonga ʻi he ʻahó ni.
ʻOku ʻi ai ha ngaahi lea fakafonua fakaʻofisiale ʻe 11 ʻi ʻAfilika Tonga.
Naʻe tokoni ʻa Sūlia ki hono kamataʻi ʻo e Kau Fafine maʻá e Melinó, ko ha kulupu ke paotoloaki ʻa e uouangatahá mo e melinó ʻi ʻAfilika Tongá.
Ko e taha ia ʻo e kau fuofua ngāue temipale ʻi he Temipale Johannesburg South Africa.
Naʻe hoko ʻa Sūlia ko ha faiako. Naʻá ne akoʻi ʻa e fānaú ke laukonga ʻi he taimi naʻa nau ngāue ai ʻi heʻene ngoué.
Tā fakatātā ʻa Tracy Bishop