Tohi ʻe Koe
Te u Toe Mamata ki Hoku Tuongaʻané
Fai ʻe Isabella S., taʻu 11, ʻIutā, USA
Ne hoko e ʻaho ʻo hoku kiʻi tuongaʻané ʻi he uike atú. Naʻá ne mei taʻu fitu, ka naʻe moʻua ʻi he mamateá ʻo ne mālōlō ai ʻi he taʻu ʻe ua kuohilí. Ne mau hivaʻi ʻi he Palaimelí ʻa e “Ketisemaní.” Naʻe mahino pea ʻuhinga mālie ʻa e ngaahi leá. Naʻá ne fakafonu ʻa e lokí ʻaki ʻa e Laumālié.
Hili ʻa e hivá, naʻe fakahoko ʻe Sisitā Uepisitā ʻa ʻene fakamoʻoni ki he Fakalelei ʻa Sīsū Kalaisí. Naʻá ne fakafonu lahi ange ʻa e lokí ʻaki ʻa e Laumālié. Peá ne talanoa leva fekauʻaki mo e ʻuhinga ne mālōlō ai hono tuongaʻané ʻi he ngaahi taʻu lahi kuohilí. Naʻá ne ʻai au ke u fakakaukau kia Kepaleli pea naʻá ku mei tangi. Naʻá ku fakakaukau ki he taimi naʻá ku fua fakaʻosi ai ʻa Keipí. Naʻá ku loto mamahi, ka naʻá ku ongoʻi nonga pē.
Naʻe talanoa ʻa Sisitā Uepisitā fekauʻaki mo ʻene fiefia ʻi hono ʻiloʻi te ne lava ʻo toe mamata ki hono tuongaʻané. Naʻá ne pehē naʻá ne ʻiloʻi te tau mamata ki hotau ngaahi ʻofaʻanga kuo nau ʻosi mālōloó.
ʻI he hili ʻa e Palaimelí, naʻá ku fāʻofua ʻia Sisitā Uepisitā. Naʻá ma fetāngihi ʻi ha kiʻi miniti siʻi. Naʻe mālohi fau e Laumālié. Naʻá ne talamai te u toe mamata ki hoku kiʻi tuongaʻané. Naʻá ne pehē ʻoku ʻikai ngata pē ʻa e Fakalelei ʻa Sīsū Kalaisí ʻi heʻene ʻaonga ki he kau faiangahalá ka ʻoku kau foki ai mo kinautolu ʻoku mamahí. Naʻá ne fehuʻi mai pe ko e hā ʻa e meʻa ʻoku fakangalongataʻa lahi taha kiate au fekauʻaki mo Keipí, peá u talaange ʻoku fakangalongataʻa ʻaupito kiate au ʻa ʻene katá.
Naʻá ku talaange kia Sisitā Uepisitā ʻa ʻeku lotomamahi koeʻuhi ne hoko e ʻaho ʻo Kepalelí ʻi he uike ko iá pea naʻá ku fuʻu fie maʻu ke u ʻiloʻi pe te u toe lava ʻo mamata ki hoku tuongaʻané. Naʻá ne talamai kiate au, ko e ngaahi loʻimata ʻoku toó, ko e ngaahi loʻimata ia ʻo e fiefia. Naʻá ku ongoʻi ʻa e Laumālié, pea naʻá ku ʻiloʻi naʻe moʻoni ʻa e meʻa naʻá ne lea ʻakí. ʻOku ou ʻiloʻi fakapapau te u toe mamata kia Kepaleli, pea ʻoku ou fiefia lahi ai. ʻOku ou ʻofa ʻiate ia. ʻOku ou ʻiloʻi ia koʻeuhí ʻoku ʻofa ʻa Sīsū Kalaisi ʻiate au, naʻá Ne foaki mai ʻa ʻEne moʻuí koeʻuhí ke u lava ʻo toe mamata kia Kepaleli.
Tā fakatātā ʻa Judy Bloomfield