ʻOku Ou ʻIloʻi ha Foʻi Hiva fekauʻaki mo Ia!
ʻOku nofo ʻa e tokotaha naʻá ne faʻú ʻi Lenisitā, ʻAealani.
Ne ako ʻa ʻEni ʻi ha ʻapiako Katolika ʻo hangē ko ha tokolahi ʻo e longaʻi fānau ʻi ʻAealaní. Ko ia toko taha pē ʻa e mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi heʻene kalasí.
Ko ha faiako lelei ʻa e faiako ʻa ʻEní, he naʻá ne akoʻi ha ngaahi meʻa lahi. Naʻe aʻu pē ki heʻene ako fekauʻaki mo Sīsū. Naʻe manako ʻaupito ʻa ʻEni ʻi he fanongo ki he ngaahi talanoa fekauʻaki mo Sīsuú. Ko e ngaahi talanoa tatau pē ia naʻá ne ako ʻi he Palaimelí mo ʻapi foki.
ʻI he ʻaho ʻe taha, ne talanoa ange ʻe he faiakó ki heʻene kalasí ʻa e taimi ne hāʻele ai ʻa Sīsū ʻi he fukahi vaí. Ne malimali ʻa ʻEni. Ko e talanoa ia ʻokú ne saiʻia taha aí!
Ne ako ʻe ʻEni ʻa e foʻi hiva “Ko e Maná” ʻi he Palaimelí. Naʻe talanoa ʻa e foʻi hiva ko iá fekauʻaki mo e hāʻele ʻa Sīsū ʻi he fukahi vaí. Naʻe ongoʻi māfana maʻu pē ʻa ʻEni ʻi hono lotó ʻi he taimi naʻá ne hivaʻi ai iá. Naʻá ne fakakaukau ki he ngaahi lea ʻi he hivá.
“Sīsū he fukahi vai. Taʻofi e hoú mo e matangí.”
Ne fie maʻu ʻe ʻEni ke ʻiloʻi ʻe heʻene kalasí ʻa e foʻi hivá! Naʻá ne hiki hake hono nimá ʻo pehē atu, “ʻOku ou ʻilo ha foʻi hiva fekauʻaki mo ia!”
Naʻe malimali ʻene faiakó. Naʻá ne kole ange kia ʻEni ke vahevahe ia ki he kalasí ʻi he ʻaho hono hokó.
Naʻe fiefia ʻa ʻEni ʻi heʻene aʻu ki ʻapí. Ne tokoni ange ʻa e fineʻeikí ke kumi ʻa e foʻi hivá ʻi he komipiutá ke tā ʻe he faiako ʻa ʻEní ʻi heʻene kalasí.
ʻI he ʻaho hono hokó, ne fanongo fakataha ʻa ʻEni mo e kotoa ʻo ʻene kalasí ki he foʻi hivá. Naʻe ongoʻi ʻe ʻEni ʻa e ongo māfana ʻokú ne ongoʻi maʻu pē ʻi he Palaimelí. Naʻá ne fiefia ʻi heʻene vahevahe ʻa e foʻi hiva makehé ni fekauʻaki mo Sīsuú.
Tā fakatātā ʻa Sinéad Poznanski