Ko Ha Lotu maʻa Papi
ʻOku nofo ʻa e tokotaha naʻá ne faʻú ʻi Sakatepekisi, Kuatemala.
Naʻe mata mamahi ʻa Papi. ʻE founga fēfē ha tokoni ki ai ʻa Tana?
“Ako‘i ʻa kinautolu ke nau feʻofa‘aki mo fetauhiʻaki ‘iate kinautolu” (Mōsaia 4:15).
Naʻe sio atu ʻa Tana ki tuʻa ʻi he matapā sioʻatá. Na‘á ne lava ʻo sio kia Papi ʻoku foki mai mei he ngāué. Na‘á ne tōmui ange ʻi he taimi angamahení.
“ʻOku ʻi ai ha meʻa ʻoku hoko, Papi?” Naʻe fehuʻi ange ʻe Tana ʻi he hū mai ʻa Papi ki he loto falé. Na‘á ne mataʻi ongosia mo loto-mamahi.
Ne tali ange ʻe Papi, “Naʻá ku moʻumoʻua lahi he ngāué he ʻahó ni. Pea ʻi he taimi ní ʻoku ou tōmui ki ha fakataha mahu‘inga ʻi he ʻapisiasí.”
“ʻE lava ke u tokoni atu?” Ko e ʻeke ange ia ʻa Taná. Na‘á ne hohaʻa kau kia Papi.
“Kātaki te ke lava ‘o kole kia Mami pe te ne lava ʻo ngaohi mai ha meʻa ke u kai ʻi he kaá?” Ko e kole ange ia ʻa Papí. “‘Oku fie maʻu ke u fakavavevave mo fetongi ki hoku vala lotú.”
Na‘e lele ʻa Tana ke tala kia Mami. Na‘e ʻosi ‘i peitó ia ʻo ngaohi ha sanuisi.
Ne ʻeke ange ʻe Tana. “Ko e meʻa ia ka Papí? Na‘á ne talamai ʻokú ne tōmui.”
Ne tali ange ʻe Mami, “‘Io, ko e meʻa ʻa Papi.” Na‘á ne tuku ha foʻi ʻāpele mo ha inu ʻi he tafaʻaki ʻo e sanuisí.
Ne ʻeke ange ʻe Tana. “‘Oku loto-mamahi ʻa Papi, pea ʻoku ‘ikai ke u ʻilo e me‘a ʻoku hokó. ʻOkú ke ʻilo?”
Na‘e mapuhoi ʻa Mami. “ʻOku lahi e ngaahi ngāue ke fakahoko ʻe Papí. Kuo mamahi foki mo hono tuʻá kimuí ni mai.”
Ne pehē ange ʻe Tana, “‘Oku ou fie fai ha meʻa ke tokoni kiate ia.”
Ne talaange ʻe Mami, “Fēfē kapau te ke fai ha lotu? Te ke lava ‘o kole ki he Tamai Hēvaní ke tokoniʻi ia ke ne ongo‘i sai.”
Na‘e ʻalu ‘a Tana ki hono lokí. Naʻá ne lotu ʻo pehē, “Tamai Hēvani, fakamolemole ʻo tokoniʻi ʻa Papi. Pea fakamolemole ‘o tokoniʻi au ke ‘ilo e founga te u lava ʻo tokoni ai kiate iá. ʻI he huafa ʻo Sīsū Kalaisí, ʻēmeni.”
Hili ‘ene lotú, naʻe to‘o mai ʻe Tana ha la‘ipepa. Naʻe ‘i ai haʻane fakakaukau!
Naʻá ne tohi, Kia Papi, Fakamālō atu ʻi he meʻa kotoa pē. Fakamālō atu hono fua ho fatongiá, neongo ʻokú ke foki helaʻia mai ki ʻapi he taimi ʻe niʻihi. ‘Okú ke hoko ko ha faʻifaʻitakiʻanga kiate au. Ko ha foha koe ʻo e ʻOtuá pea ʻokú Ne ʻofa ʻiate koe! ʻOfa atu, Tana.
Naʻe tuku ʻe Tana e tohí ‘i peitó ʻi he tafaʻaki ʻo e me‘akai ʻa Papí. Hili iá na‘á ne lue fakalongolongo leva ki tuʻa.
Ne va‘inga ʻa Tana mo hono ngaahi tokouá ʻi he hū mai ‘a Papi ki tuʻa ʻi ha ngaahi miniti siʻi pē mei ai. Naʻá ne fofonga malimali. Naʻá ne pehē ange, “Tana, fakamālō atu he tohí.” Na‘á ne fāʻofua mo ‘uma kiate ia. “Naʻá ke tokoniʻi au ke u ongoʻi e ʻofa ʻa e Tamai Hēvaní.”
Hili e mavahe atu ʻa Papi ki heʻene fakatahá, naʻe ʻeke ange ʻe Mami pe ko e hā e meʻa ne hokó. Na‘e fakamatala ange ʻa Tana fekau‘aki mo e tohí. Na‘e malimali ʻa Mami pea fā‘ofua kia Tana.
“Mālō, Tana. ‘I he kiʻi tohi ko iá, naʻá ke ngāue fakaetauhi ai kia Papi.”
Naʻe fāʻofua ʻa Tana kia Mami. Naʻá ne fakamālōʻia kuo tali ʻe he Tamai Hēvaní ʻene lotú. Na‘e ongo fakafiefia ke ne tokoniʻi ‘a Papi ʻo hangē ko ia ne mei fai ʻe Sīsuú.
Ngaahi tā fakatātā ʻa Carolina Farias