Hangē Pē Ko Ia Na‘á Ne Sioloto Mai Ki Aí
Naʻe hoko ʻa e talanoa ko ʻení ʻi Kivi, ʻIukuleini.
Na‘e fiefia ʻa Kavitika ke papitaiso, ka na‘á ne loto-mamahi ʻi he ʻikai tokolahi ange ʻa e kakaí.
“Tuʻu ko e kau fakamoʻoni ʻo e ʻOtuá ʻi he taimi kotoa pē, pea ʻi he meʻa kotoa pē, pea ʻi he feituʻu kotoa pē” (Mōsaia 18:9).
Ko e ʻaho papitaiso ‘eni ʻo Kavitiká. Ne fuoloa pē ʻene fakakaukauloto mai ki he ʻahó ni. Kuó ne sioloto kotoa ki ai. ʻOkú ne tui ha kofu hinehina makehe. Ko hono papitaiso ia ʻe Tato (Tamai). Pea ʻi ai mo hono kaungāme‘á mo e fāmilí kotoa, ʻo nau malimali loto-fiefia.
Ka ʻe kiʻi kehe ʻa e ʻahó ni mei he meʻa naʻe sioloto ki ai ʻa Kavitiká.
Ne tatau pē ‘a e ngaahi meʻa ‘e niʻihi. Na‘á ne tui ha kofu hinehina makehe, hangē pē ko ia naʻá ne sioloto ki aí. Naʻe tuitui ʻe Babusya (Kuifefine) e kofu ko ʻení maʻa Mama ke papi ʻaki ʻi heʻene kei siʻí. Pea ko ‘eni ko e taimi ʻeni ʻo Kavitiká.
Na‘e teu ke papitaiso ia ʻe Tato. Hangē pē ko ia kuó ne sioloto mai ki aí. Naʻe sio ʻa Kavitika ki heʻene unu hono nimá ki he loto vai ʻi he faiʻanga papitaisó.
Na‘á ne pehē ange, “Māfana lelei.” Naʻá ne malimali mai kia Kavitika. Naʻá ne malimali atu. Pea na‘á ne sio leva ki he ʻū sea naʻá ne tokoni kia Tato ke fokotuʻutuʻú.
Naʻe ‘ikai ke loko lahi. Ko e faikehekehe lahi tahá ia. Naʻe sioloto maʻu mai pē ʻa Kavitika ʻe tokolahi e kakai te nau omi ki hono papitaisó. Ka ne ‘i ai pē ha niʻihi tokosiʻi.
Talu mei he kamata hono fakatupunga ʻe he COVID-19 e puke ʻa e kakaí, mo e lahi ʻa e ngaahi meʻa ne liliú. Na‘á ne ako pē ʻi ʻapi mo hono tuongaʻane siʻisiʻi ko Vilasí. Na‘a nau tui ha meʻa maluʻi ki he ihú mo e ngutú ʻi he taimi naʻa nau mavahe ai mei honau falé. Pea naʻe ʻikai ha taha na‘e fakataha ʻi ha ngaahi tokolahi. ‘I ha faʻahinga feituʻu pē. Naʻe fie tokoni ʻa Kavitika ke malu‘i ʻa e kakaí, ka na‘e faingataʻa he taimi ‘e niʻihi.
Hangē ko e ‘ikai lava ke ke fakaafeʻi e tokotaha kotoa pē ki hoʻo papitaisó.
“Kavitika! ʻOkú ke hā fakaʻofoʻofa!”
Na‘e sio hake ʻa Kavitika kia Babusya ʻokú ne lue mai ‘i he matapaá.
“Mālō e lelei, Babusya!” Naʻe hifo atu ʻa Kavitika mei hono seá ʻo lele atu.
Naʻe talaange ʻe Babusya, “‘Okú ke [hā fakaʻofoʻofa] ʻo hangē pē ko hoʻo mamí.” Na‘á ne ala ki he ngaahi matalaʻi ‘akau lanu hinehina ʻi he ‘ulu ʻo Kavitiká. Na‘a nau tatau mo e ngaahi matalaʻi ‘akau leisi ʻi hono kofú. Na‘e saiʻia ‘a Kavitika ʻi he ngaahi matalaʻi ‘akaú. Ko hono hingoá ʻoku ʻuhinga ia ki he “matalaʻi ʻakau” ʻi he lea faka-ʻIukuleiní.
“‘Okú ke fiefia ke ke papitaisó? Na‘e fehuʻi ange ʻe Babusya.
Ne talaange ʻe Kavitika, “ʻIo. “Ka ko e meʻá pē, ‘oku ʻikai ha taha heni.”
“‘Ikai ha taha!” Na‘e pehē ange ʻe Babusya. Naʻá ne vakai takai holo. “Ka ʻoku ou sio au kia Mama, Tato, Vilasi, mo Melania siʻi. Pea ko e pīsopé ee. Pea pehē ki he ongo faifekaú. ʻOku ʻikai ko e ʻikai ha tahá ia.”
Ne hiki mo tukuhifo pē ‘e Kavitika hono ongo umá. “Ka ‘oku ʻikai ha taha ‘o hoku kaungāmeʻá ʻi heni.”
Ne pehē ange ʻe Babusya, “Pau pē ʻoku fakatupu loto-mamahi ia kiate koe. Ka ‘oku ʻi ai haʻatau ongo fakaafe fakaʻohovale ʻe ua.”
Naʻe fiefia hake ʻa Kavitiká. “Ko hai?”
Ne talaange ʻe Babusya, “Ko hoʻo mehikitanga ko Paviliná. Pea mo ho kāsini ko ʻEmá!”
“Moʻoni?” Naʻe ʻeke loto-vēkeveke atu ʻe Kavitika.
Na‘e malimali ʻa Babusya. “‘I he taimi te na a‘u mai aí, te ke fai nai ha kiʻi ngāue maʻaku?”
Na‘e kamo pē ʻa Kavitika. “Ko e hā?”
“Sai, ‘i he taimi ʻoku papitaiso ai koé, ko e me‘a ʻe taha ‘okú ke palōmesí ke ke tuʻu ko ha fakamoʻoni ‘o Sīsū Kalaisi. ʻOkú ke ʻilo ʻa e ʻuhinga ʻo e meʻa ko iá?”
Na‘e ʻosi ʻilo ia ‘e Kavitika. Kuo ako ‘e hono fāmilí kau ki he ngaahi fuakava ʻo e papitaisó ‘i ha ngaahi uike!
“‘Oku ʻuhinga ia ke hoko ko ha faifekau!”
Ne peheange ʻe Babusya, “Sai ‘aupito. Kuo teʻeki hū tuʻo taha ho mehikitangá mo hoʻo kāsiní ʻi ha falelotu ‘o hotau Siasí. Te ke hoko ko ha faifekau peá ke tokoni ‘o ʻave kinaua ʻo takimamata?”
Ne tali ange ʻe Kavitika. ʻʻʻIo!”
‘I he aʻu atu ‘a ʻAnitī Pavilina mo ʻEmá, naʻe fakahoko ia ʻe Kavitika mo Babusya. Na‘á na fakaʻaliʻali kiate kinaua ʻa e loki ‘o e Palaimelí, hono lokiakó, pea mo e falelotú. Pea ne nau a‘u mai ki he faiʻanga papitaisó. Na‘e talaange ʻe Kavitika na‘á ne fie papitaiso ke ne muimui ‘ia Sīsū Kalaisi. Na‘á ne ongoʻi ha ongo maʻamaʻa, mo fakafiemālie ‘i he taimi naʻá ne lea aí. Na‘e malimali atu ʻa ʻAnitī Pavilina mo ‘Ema ki ai. Na‘á ne fakaʻamu ne na ongo‘i ʻa e ongo tatau.
Ne taimi nounou pē kuo hokosia e taimi ke fai ai e papí. Naʻe fakamanava loloa ʻa Kavitika ʻi hono fakauku kakato ia ʻe Tato ki he loto vaí—hangē pē ko ia naʻá ne sioloto mai ki aí. Neongo ko ha niʻihi tokosiʻi pē ne nau mamata maí, ka ne nau malimali ʻo hangē pē ko ia naʻá ne sioloto mai ki aí. Pea na‘á ne ʻilo pau naʻe malimali hifo foki mo e Tamai Hēvaní mo Sīsū Kalaisi. Na‘e faingofua ke sioloto atu ki ai.
Ngaahi tā fakatātā ‘a Stephanie Dehennin