Haʻu, ʻo Muimui ʻIate Au
Taimi Fiefia ʻi he Folofolá
ʻOku ʻalu fakatatau ʻa e ngaahi fakakaukau ko ʻení mo e Haʻu, ʻo Muimui ʻIate Au—ma‘á e Fakafoʻituituí mo e Ngaahi Fāmilí ʻi he uike kotoa pē.
Te Ke Lava ʻo Fili
Ki he Tokāteline mo e Ngaahi Fuakava 60–62
-
Hiva ʻa e “ʻOku ou Feinga ke Hangē ko Sīsuú,” (Tohi Hiva ʻa e Fānaú, 40).
-
‘Oku ʻomai ʻe he Tamai Hēvaní kiate kitautolu ha ngaahi fekau. ʻOkú Ne finangalo foki ke tau fai ha ngaahi fili ke fakahoko ha ngaahi me‘a kehe ʻoku leleí (vakai, Tokāteline mo e Ngaahi Fuakava 62:5, 7–8).
-
Lau ‘a e talanoa ʻi he peesi 4 mo e talanoa kau ki he fili ‘a Sungú. Ko e hā ha ngaahi fili lelei kuó ke fakahoko he ‘ahó ni? Ngaohi fakataha, ha pā (shield) ʻo e FKT ke fakamanatu kiate koe ke ke fili ki he totonú. Te ke lava ʻo tā ia ʻi ha pousitā pe ngaohi e fuó ʻaki e ngaahi me‘a ʻi ho ‘apí.
Te u Lava ʻo Loto ʻApasia
Ki He Tokāteline mo e Ngaahi Fuakava 63
-
Hiva ʻa e “ʻApasia Ko e ʻOfá,” (Tohi Hiva ʻa e Fānaú, 12).
-
Naʻe akonaki ‘a Sīsū Kalaisi, “Ko e meʻa ʻoku ha‘u mei ʻolungá ‘oku toputapu, pea kuo pau ke tokangaʻi ʻi hono lea ʻaki” (Tokāteline mo e Ngaahi Fuakava 63:64). ‘Oku ʻuhinga ia ‘oku totonu ke tau fakahaaʻi ‘a e fakaʻapa‘apá mo e ʻofa ki he Tamai Hēvaní pea mo e ngaahi me‘a ʻoku mahu‘inga kiate Iá.
-
Huke ki he peesi 24 ke ako lahi ange fekauʻaki mo e fakahaaʻi ʻo e fakaʻapaʻapá. Hili ia pea fakahoko fakataha ‘a e ekitivitií.
ʻOfa ʻo Hangē ko Sīsuú
Ki he Tokāteline mo e Ngaahi Fuakava 64–66
-
Hiva ʻa e “Tokoniʻi Au Tamai” (Tohi Hiva ʻa e Fānaú, 52).
-
Na‘e akoʻi ‘e Sīsū ʻoku totonu ke tau fakamolemole‘i ʻa e tokotaha kotoa pē (vakai, Tokāteline mo e Ngaahi Fuakava 64:9–10). Lau ‘a e talanoa ʻi he peesi 20 ke vakai ki he founga na‘e ako ai ha talavou mo ‘ene faʻeé ke na fefakamolemoleʻakí.
-
Tā leva he taimí ni ha fakatātā ʻo koe, mo ho fāmilí, mo e Fakamoʻuí. Talanoa kau ki ha ngaahi founga te ke lava ʻo fakahaa‘i ʻaki ʻa e feʻofaʻakí, ʻo hangē ko Sīsuú. Te ke lava ‘o akoako ʻa e kole fakamolemolé mo e fefakamolemoleʻakí ʻi hano fakatātaaʻi pē ia.
Ngaahi Fakamanatu ‘o e Papitaisó
Ki he Tokāteline mo e Ngaahi Fuakava 67–70
-
Hiva ʻa e “ʻI heʻeku Papitaisó” (Tohi Hiva ‘a e Fānaú, 53).
-
Na‘e akonaki ‘a Sīsū ʻe lava ke papitaiso ‘a e fānaú hili honau ta‘u valú (vakai, Tokāteline mo e Ngaahi Fuakava 68:27). Te ke lava ‘o lau ha talanoa kau ki ha kiʻi ta‘ahine ʻoku papitaiso ‘i he peesi 16.
-
Kumi ha ngaahi meʻa ʻi homou ‘apí ʻa ia ʻokú ne fakamanatu atu ʻa e papitaisó. ʻE lava ke fakamanatu atu ha ipu vai ‘a e founga ʻoku tau papitaiso ai ‘i he fakaukú. ʻE lava ke fakamanatu atu ha konga tupenu hinehina ‘a e founga ʻoku tau teunga hinehina aí. ʻE lava ke fakamanatu atu ʻe ha sipi kafu ‘a e ongo māfana ʻo e Laumālie Mā‘oniʻoní. Ko e hā mo ha toe meʻa te ke lava ʻo fakakaukau ki ai?
Ngāue Tokoni Fakafufū maʻa Pīsopé
Ki he Tokāteline mo e Ngaahi Fuakava 71–75
-
Hiva ʻa e “Akoʻi Au Ke u ‘Eva He Maamá” (Tohi Hiva ʻa e Fānaú, 70).
-
Na‘e akoʻi ‘e Sīsū ʻoku totonu ke ʻi ai ha kau pīsope ʻi Hono Siasí ha kau pīsope ke tataki mo tokoniʻi e kāingalotú (vakai, Tokāteline mo e Ngaahi Fuakava 72:2).
-
Fakamālō ki ho‘o pīsopé pe palesiteni fakakoló ʻaki hono fakahoko ha ngāue anga‘ofa. ‘E lava ke ke tohi ki ai ha fanga kiʻi pōpoaki lelei pe ʻave ki ai ha meʻa lelei. Te ke lava foki ke fakahoko ʻa hoʻo palaní ʻo ʻikai te ke ʻai ke ne ʻilo pe ko hai naʻá ne fakahoko iá!
Ngaahi tā fakatātā ʻa Katy Dockrill