Tohi ʻe Koe
Ta‘o Mā ki Heʻeku Ngāue Fakafaifekaú
ʻI he lolotonga ʻo e tutuku e akó ʻi hoku ta‘u valú, naʻe ʻeke mai heʻeku tangata‘eikí pe ‘oku ou fie fai ha meʻa ke ma‘u ai ha paʻanga ki he‘eku ngāue fakafaifekaú. Ne u fakakaukau ko ha fakakaukau lelei ia, ka na‘e ʻikai ke u fakapapau‘i pe ko e hā te u faí. Hili ha ngaahi fakakaukau, na‘á ma fakakaukau ke taʻo ha mā. ‘I he pō ko iá, ne ma ngaohi ha ngaahi foʻi mā ʻe 20. Na‘e ʻikai ke ma ‘ilo pe ʻe fakatau atu ia, ka naʻe hili ʻemau fakamatalaʻi ia ‘i he mītia fakasōsialé, ne fakatau kotoa atu ia ʻi ha pō pē ‘e taha!
Ne u fokotuʻu ha taumu‘a ke hokohoko atu ʻa hono ngaohi mo hono fakatau atu ‘o e maá. Ne fakafiefia ʻi he kamataʻangá. Ka na‘e ʻalu pē taimi, ne ʻikai ke kei ongo fakafiefia ia. Ne faingata‘a! Ne pau ke u ‘ā hake ʻi he ono pongipongí kimuʻa e akó ke ngaohi e toú. Pea tokoni mai ʻeku faʻeé ke ta‘o ia ʻi he lolotonga ʻo e ‘ahó. ‘I heʻeku foki ki ‘api mei he akó, naʻe pau ke u faʻo kato e ngaahi fo‘i maá, tufa kinautolu, mo fakama‘a ʻa e ngaahi meʻangāue ki hono taʻó.
Naʻe pau foki ke u talanoa mo e kakai na‘e ʻikai ke u ‘iloʻi leleí. Naʻe ʻi ai ha ngaahi taimi ʻe niʻihi ne ʻikai ke u ʻilo pe ko e hā te u lea ʻakí. Ko e taha ia ‘o e ngaahi konga ne faingataʻa tahá. Na‘e fakamatalaʻi mai ‘e heʻeku ongomātu‘á naʻe ‘ikai ko e ʻuhingá pē ke maʻu ai ha pa‘anga ki heʻeku ngāue fakafaifekaú ka ko e ʻuhingá foki ke ako ke ngāue mālohi mo talanoa ki he kakaí. Naʻe kamata ke u ongoʻi fiemālie ange. Pea hili ha taimi si‘i, naʻá ku fiefia ‘i hono fai iá!
Naʻe akoʻi moʻoni au ʻe he‘eku pisinisi maá ki he anga ʻo e ngāué! ‘Oku ou ʻilo ko e me‘a kuó u ako mei he taumuʻa ko ‘ení ʻe tokoni ia kiate au ‘i heʻeku ngāue fakafaifekaú.
Ngaahi tā fakatātā ʻa Steve Brown