Feinga Fakataha
Naʻe fakaʻamu ʻa Siaki ne ‘ikai ke ne kaikailaʻi ʻa Mami.
“‘Oku totonu ke mou fefakamolemoleʻaki” (Tokāteline mo e Ngaahi Fuakava 64:9).
Na‘e mei kaivevela ʻa Siaki. Na‘á ne hoka hono ki‘i tuofefine ko Hāpá. Naʻe talaange ʻe Mami ke tuku. Na‘á ne huaʻi ʻene ʻū meʻavaʻingá ʻi he peitó. Naʻe kole ange ʻe Mami ke ne tufi. Na‘á ne toʻo kotoa e ʻū ipu pelesitiki ʻo vaʻinga ʻaki. Ne talaange ‘e Mami ke ne fakafoki kinautolu. Hili iá naʻá ne fuhu mo hono kiʻi tokoua siʻisiʻí, ʻa ʻĀtama. Pea ko e taimi ia ne kaikailaʻi ai ia ʻe Mamí. Ne kaikaila fakafoki mai ʻa Siaki. Pea fekau leva ʻe Mami ʻa Siaki ke ʻalu ʻo tangutu ʻi tuʻa.
Na‘e lele ʻa Siaki ‘i he peitó ʻo hū ki tuʻa ki he fakafaletoló. Na‘á ne tohoʻi tāpuni e matapaá ‘i he lahi taha te ne lavá. Na‘á ne lue fefokifokiʻaki. Naʻá ne ʻita!
Pea naʻá ne loto-mamahi. Na‘á ne fakaʻamu ne ʻikai kaikailaʻi ia ʻe Mami.
Na‘á ne tuʻu ‘o sio hifo ki he ʻū kā naʻe ʻi lalo ʻaupito he fale nofo totongí. Na‘á ne siofi e fanga kiʻi kā iiki mo e ʻū pasi lalahi na‘e lele haké. Na‘á ne fakaʻamu ne ʻikai ke ne kaikailaʻi ʻa Mami. Ne ‘ikai totonu ke ne fakamataliliʻi ʻa Haapa. Pe fuhu mo ʻĀtama. Kuo ʻikai ke ne fakahoko ha ngaahi fili lelei he ʻahó ni.
Na‘e mapuhoi ʻa Siaki. Na‘á ne toe sio hifo ki he halá peá ne lau ‘a e ʻū me‘alelé.
Ne taimi siʻi pē naʻe fakaava hake e matapaá. Ko Mami.
Naʻá ne lea leʻo siʻi ange, “Siaki?” Na‘á ne hū mai ki tuʻa peá ne tohoʻi tāpuni hake ʻa e matapaá. Na‘á ne tuʻu he tafaʻaki ʻo Siakí mo sio fakataha mo ia ki he ʻū kaá.
Naʻe pehē ange ʻe Siaki, “‘Oku ou kole fakamolemole atu he ‘ikai ke u fanongo atu kiate koé. Pea ‘oku ou kole fakamolemole atu ne ʻikai ke u fuʻu angalelei. Te ke fakamolemoleʻi au?”
“ʻIo!” Naʻe fāʻofua ʻa Mami kia Siaki. “Fakamolemole heʻeku kaikailaʻi koé. ‘Oku ou kei ako pē ʻo hangē ko koé, pea taimi ‘e niʻihi ‘oku ou fakahoko ha ngaahi fehālaaki.”
Naʻe fā‘ofua ʻa Siaki kia Mami.
Ne talaange ʻe Mami, “Ta toe ʻalu angé ʻo feingá.”
Na‘á ne muimui atu ʻia Siaki ki loto. Na‘á ne tokoni kiate ia ‘i hono tufi hake ‘a e ʻū ipú. Na‘á na tokoni kia Haapa ke kumi ki hono sipi kafú. Hili iá peá na vaʻinga ʻi ha keimi mo ʻĀtama mo Haapa. ʻI he taimi ne ʻita ai ʻa ʻĀtama ʻi heʻene foʻí, ne ʻikai toe ʻita atu mo Siaki. Naʻe malimali atu ki ai ʻa Mami. Na‘á na ako mo feinga fakataha.
Ngaahi tā fakatātā ʻa Bob Monahan