Tohi ʻe Koe
Naʻe Papitaiso Auʻe Hoku Tuongaʻané
‘I he ofi ki hoku taʻu valú, ne ʻeke mai ‘e heʻeku ongomātu‘á pe naʻá ku loto ke papitaiso au ʻe hoku tuonga‘ane ko ʻEnisoú. Ne ʻikai ke u ʻuluaki fakapapauʻi pe naʻá ku loto ke ne fakahoko ia. Ka na‘á ku fakakaukau ke u kole ange ke ne papitaiso au.
Naʻá ma akoako mo hoku tuongaʻané peá ne talamai ʻa e meʻa te ne lea ʻakí mo e taimi ʻe totonu ke u puke ai ‘a hoku ihú ke teuteu ke uku hifo ki he loto vaí. Na‘e tokoni ʻeku tamaí kia ʻEnisou ke ne ma‘uloto e lotu papitaisó.
Naʻe kau kotoa hoku fāmilí ‘i hoku ouau papitaisó. Ne hoko hoku ongo taʻokete ko Koloi mo Mākó ko e ongo fakamoʻoní. Naʻá ku kole foki ki hoku tokoua ko Mākó pea mo ‘eku faʻeé ke na fakahoko e ongo leá. Ne tā ʻe Kolouī ha hiva ʻi he vaioliní. Na‘e papitaiso au ʻe ʻEnisou, pea hilifakinima au ʻe heʻeku tamaí ko ha mēmipa ʻo e Siasí mo foaki mai ʻa e me‘a-foaki ʻo e Laumālie Mā‘oniʻoní.
‘I heʻeku teuteu ke hifo ki he loto vaí, ne u ongo‘i fiefia. Na‘á ku ongoʻi ʻoku tuʻutuʻukina hoku sinó kotoa. ‘I heʻeku hifo ki lotó, ne u ongo‘i māfana ʻaupito naʻe ‘ikai ai ke u fie mavahe mei ai.
‘I he ʻaho hono hokó ne u lava ʻo ma‘u ʻa e sākalamēnití ko ha mēmipa fo‘ou ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Na‘e tāpuakiʻi foki ʻe hoku tuongaʻané e sākalamēnití ko e fuofua taimí ia.
Ne u ongoʻi makehe ʻaupito ʻi he ʻosi hoku papitaisó. Ne u ongo‘i ʻa e ivi tākiekina ‘o e Laumālie Māʻoni‘oní kimuʻa ʻeku papitaisó, ka ʻoku ou ongoʻi lelei ange ia he taimí ni. ʻOku ou feinga ke muimui ʻia Sīsū Kalaisi. ‘Oku ou ongoʻi ‘oku tokoniʻi au ʻe he Laumālie Mā‘oniʻoní ke u fiemālie mo fakahoko ha ngaahi fili lelei ange. ‘Oku ou ongoʻi malu ange, pea ‘oku ou ʻilo ‘oku tokangaʻi au ‘e he Tamai Hēvaní.