Kaungāmeʻa ki he Kaungāmeʻa

Fuaʻi Piisi ʻe Taha he Taimi

Fai ʻe Sisitā Sharon Eubank

Tokoni ʻUluaki ʻi he Kau Palesitenisī Lahi ʻo e Fineʻofá

Mei ha ‘initaviu mo ʻEmipā Hīlī.

‘I heʻeku kei si‘í, naʻe ‘ave au heʻeku ongomātu‘á mo hoku tokouá ki ha ngoue ʻakau fua naʻe maʻu ‘e he Siasí. Na‘a mau ʻi aí ke tokoni ‘i hono toli ʻo e pīsí. Ne mau kaka ʻi ha ngaahi tu‘unga maʻolunga mo feinga ‘i ha ngaahi lauʻiʻakau matolu ke toli e ngaahi foʻi pīsí mei he ngaahi fuʻu ʻakaú.

Naʻá ma fiefia ʻi he kamatá. Ka na‘e ʻikai fuoloa ne hanga ʻe he fanga kiʻi fulufulu ʻo e pīsí ʻo fakatupu ʻa e veli ʻi he kotoa homa ongo nimá! Ne ma talaange ki heʻema faʻeé, “‘Oku ʻikai ke ma toe fie fai ʻeni. ʻOku ʻikai ke ma toe fie hoko atu.”

Na‘e ʻeke mai ‘e heʻeku fa‘eé pe naʻá ma ‘iloʻi ʻa e feituʻu ʻoku ‘ave ki ai ʻa e piisi kotoa pē. ‘I heʻema talaange ‘ikaí, naʻá ne fakamatala‘i mai ia kiate kimaua.

“ʻOku ʻave ʻa e ngaahi foʻi piisi takitaha ko ʻení ki ha fale ʻa ia ʻoku faʻo ia ʻe ha kau ngāue tokoni ki ha ngaahi kapa. Pea ‘oku foaki leva ʻa e ngaahi kapa ko iá ki he kakai ‘oku nau fie maʻu ha me‘akaí. ʻI he ta‘u kotoa pē ʻoku foaki ʻe he Siasí ha ngaahi kapa meʻakai ʻe lauiafe.”

Naʻe fakafokifā pē, ne ʻikai ke u toe hohaʻa mo hoku tokouá ki he veli homa ongo nimá. Ne ma tokoniʻi ‘a e kakai naʻa nau fie ma‘u me‘akai! Hili iá, ne fakafiefia ʻema kaka hake ‘i he ngaahi tuʻungá mo toli ‘a e fuaʻi‘akau lanu moli fulufuluá.

ʻI he taʻu ní kuo mau kole atu ke mou kau ki he fakaafe ‘o e Ngaahi Nima Fietokoní (vakai ki he, Kaumeʻá Sānuali 2021). Ko e taha ʻo e ngaahi meʻa mahuʻinga taha te ke lava ʻo fakahokó ko hoʻo tokoniʻi e niʻihi kehé ʻo hangē ko ia naʻe fakahoko ʻe Kalaisí. ‘Oku ʻi ai e founga makehe ʻoku fakatokangaʻi ai ʻe he fānaú ʻa kinautolu ‘oku faingataʻa‘iá mo foaki atu ʻenau tokoní. ‘E ngali siʻisiʻi ha kiʻi ngāue tokoni ʻi he kamatá. Ka ‘o kapau ʻe fekumi ʻa e fānau kotoa pē ʻi he māmaní ki ha ngaahi founga ke ngāue tokoni ai, ʻe tānaki fakataha ia ki ha ngaahi meʻa fakaofo!