Tusia e Oe
O Se Taumafataga Faapitoa o le Aoauli
Baylor B., 8 tausaga, Texas, ISA
Ona o le KOVITI-19, sa ou amataina ai le vasega tolu i le a’oa’o i luga o le Initoneti. Ina ua mavae se masina o le a’oa’o i luga o le Initoneti, sa mafai ona ou toe alu i le a’oga. Sa ou fiafia e toe faatasi ma isi tamaiti! Ae sa faigata ona maua ni uo. Sa ou faaaluina ni nai malologa na o a’u.
I se tasi aso sa faasilasila mai ai e lo’u faiaoga o le a i ai ni tagata a’oga fou se toalua i le matou vasega. Sa matuai o’u fiafia lava! O le aso na taunuu mai ai ni tama fou e toalua, sa ou fesoasoani ia i la’ua ia maua a la’ua sapalai. Sa ou manatuaina lo’u vaiaso muamua o le a’oga ma le faigata o le mauaina o ni uo. Sa ou manao e taumafai ia faia lo la aso ia faapitoa. Sa ou iloa o le mea lena o le a faia e Iesu. Ona oso a’e lea o se manatu i totonu o lo’u ulu: sa i ai ni au kuponi se lua mo le taumafataga o le aoauli ma se uo ma le faiaoga. E mafai ona ou fai i tama e toalua e o mai faatasi ma a’u.
Ina ua oo i le malologa, sa ou valaaulia i la’ua i le taumafataga o le aoauli. Sa la’ua fai mai o le a la’ua fiafia e o! Sa uu mai a matou taumafataga ma savavali atu i le auala savali i lo matou potuaoga. O se lagona lelei le faaaofia ai o i la’ua ma faia ia la’ua lagona le taliaina.