Lima Fesoasoani i le Lalolagi atoa
Feiloai ma Eleanor mai le ISA
Feiloai i tamaiti o le Peraimeri o loo fesoasoani atu i isi, e pei ona sa faia e Iesu.
Mea uma e uiga ia Eleanor
Tausaga: 7
Mai: Florida, ISA
Gagana: Igilisi
Aiga: Tina, Tama, uso matutua e toalua ma ona tuagane matutua e toalua, faaopoopo i ai ma lana maile, o Coco, ma lana pusi, o Sushi!
Sini ma miti: 1) Fai ni mea lelei e 100 i le vaiaso e tasi. 2) Avea ma se faia’oga manua [dolphin] ma se fomai.
O Lima Fesoasoani a Eleanor
Ina ua mavae se afā i Florida, ISA, sa faaleagaina le fale o Eleanor. Sa faaleagaina foi fale o ona tuaoi. O lea na faia ai e Eleanor ma ona tei a latou lava galuega faatino o lima fesoasoani i le latou pitonuu. Sa latou valaaulia a latou uo e o mai foi i ai! Sa latou fesoasoani faatasi i se ulugalii matutua ina ia aveese se laau tele sa poloka ai le faitotoa i luma. Sa fesoasoani Eleanor ia aveese ni lala mai le auala ma fesoasoani e aveese ni fasi laau o le laau a o tipiina.
O uo i le pitonuu sa galulue malosi mo le tele o aso e fesoasoani e aveese le lapisi ma lala laau mai auala ta, auala taavale, ma fanua. Ina ua toe o mai nisi o volenitia e fesoasoani i le mae’a ai o le afā, sa tuua e Eleanor lona potumoe ina ia i ai so latou nofoaga e nonofo ai. Sa fai mai Eleanor, “ou te mulimuli ia Iesu e ala i le fesoasoani atu i isi, ma sa ou fiafia lava e fesoasoani i le tapenaina o mea o le afā. Sa ou lagonaina le fiafia. Na oo lava ina le toe i ai se lagona o le faigata ona sa ou lagonaina le fiafia tele.”
Mea e fiafia i ai Eleanor
Nofoaga: Aiga
Tala e uiga ia Iesu: Ina ua fanau mai o Ia i Peteleema
Pese peraimeri: “E Alofa Lo’u Tama Faalelagi Ia te A’u” (Tusipese a Tamaiti, 16)
Meaai: Umala
Lanu: lanumoana vaivai
Mataupu i le a’oga: Saienisi
Ata na tusia e André Ceolin