Agalelei i le polokalama a le Peraimeri
Sa savavali atu Paulo ma ona matua i le lotu. Sa lagona e Paulo le fiafia. O nei o le polokalama a le Peraimeri! O tamaiti uma o le a usuina ia pese ma faasoa atu tusitusiga paia i le taimi o le lotu. O le taimi muamua lea o Paulo i le polokalama.
Ina ua latou taunuu i le lotu, sa vaaia e Paulo ia faifeautalai. Sa la a’oa’oina le aiga o Paulo e uiga i le talalelei.
“Ua e sauni?” O le tala lea a Sister Walker.
Sa luelue le ulu o Paulo. Sa ia a’oa’oina se mau. Sa faatatau i le ala na fetalai mai ai Iesu ia i tatou ia alolofa i tagata uma. Sa saunia Paulo e faasoa atu!
Sa latou o atu uma i totonu ma nonofo i lalo. E le’i umi ae fai atu le epikopo i tamaiti e o mai i le pito i luma o le falesa. Sa tutu faatasi Paulo ma ana uo fou. Sa ataata atu o ia i se ataata tele. Sa mafai foi ona ia vaai i lona tina ma lona tama o ataata foi. Ona amata lea o le musika.
“Ana faapea e tu mai le Faaola i o’u autafa, mata ou te faia mea o loo ou faia?” Sa taumafai Paulo e usu ma le manino upu uma. Sa ia vaai faalemafaufau o loo faalogologo mai Iesu.
I le ogatotonu o le pese, sa iloa atu e Paulo se tagata o tatalaina le faitotoa i le pito i tua o le falesa. Sa savali mai i totonu se tamaitiiti e igoa ia Mareko. Sa o mai ma lona aiga. Na tilotilo atu Mareko i isi tamaiti o pepese. Sa foliga faanoanoa o ia.
Atonu na faanoanoa o ia i le tuai ona oo mai, o le mafaufau lea o Paulo. Sa amata ona savali lemu atu Mareko i luga o le tulaga.
Na manatua e Paulo le taimi na sau ai o ia i le Peraimeri mo le taimi muamua. Sa fiafia o ia ona o isi tagata sa nonofo i ona autafa ma sa agalelei.
Sa manao Paulo e fesoasoani ia Mareko. Sa ia talotalo atu mo Mareko e sau ia te ia. “Sau i luga iinei!” Sa memu atu e Paulo ia upu.
Sa vave ona savali atu Mareko i luga o le tulaga. Na faia e Paulo se avanoa mo Mareko.
Sa ia tuu atu ia Mareko se opo lapo’a. “Faafetai mo lou auai mai,” na musumusu atu ai Paulo.
Sa ataata tele atu ia Mareko ia Paulo.
E le’i umi ae uma le pese. Sa nonofo faatasi Paulo ma Mareko. Sa fiafia Paulo na mafai ona ia fesoasoani i se uo ia lagona le alofaina ma le taliaina.
Ata na tusia e Alexandra Colombo