Amigos (Uo) Fou
E nofo le tusitala i Iuta, ISA.
Sa lei iloa e Brigit le faaSipaniolo. E faapefea ona ia feiloai i se tasi?
“Sa fai a’u ma tagata ese, ona outou talia lea o a’u” (Mataio 25:35).
Sa sioa atu Brigit i fafo o le faamalama o le taavale a o tietie atu lona aiga i le vaapiapi o le auala o Caracas, Venesuela. Sa i ai ni fale lanu sesega ma ni mauga lanumeamata tetele. O se nofoaga matagofie. Sa fai mai Tina ma Tama o le nonofo iinei o le a avea o se faigamalaga fou.
Ae sa lagona pea e Brigit le popole. O le aso nei o lo latou taimi muamua lea e o ai i le lotu i lo latou atunuu fou.
Sa liliu atu tina ia Brigit. “O a mai oe, si au pele?” o lana fesili lea. “E foliga mai e te le o maua se lagona lelei.”
Sa femilosai e Brigit ona lima. “Ou te fefe. Ou te le mafai ona tautala faaSipaniolo. “E mafai faapefea ona maua ni a’u uo?”
Sa aapa atu tina e uu le lima o Brigit. “Ou te iloa o loo e popole. Ae o le a LELEI mea uma. Fai ni manava tetele i totonu.”
Sa autilo ifo Brigit i lalo i ona lima. Sa maluluina, e ui lava ina sa vevela ia fafo. Sa televave le tata o lona fatu, ma sa ese le faalogona i lona manava a o afe le latou taavale i le paka o le fale lotu. O le a faapeī le lotu? Pe o le a ia malamalama i se mea?
O le savali atu i totonu o le falesa, sa lagona e Brigit e pei o se tagata ese. Sa tilotilo solo o ia i isi aiga, o loo tautatala faaSipaniolo uma. Ona ia vaaia lea o ni teineiti se toalua o e e foliga mai e tai tutusa lo latou matutua.
O le taimi lava na vaai ai teineiti ia Brigit, sa la’ua faanatinati atu ia te ia. Sa vave ona la talanoa i ni leo fiafia, ma ni laufofoga fiafia.
Ae sa le mafai ona ia malamalama i se mea sa la’ua fai mai ai. Pe o le a la’ua o ese pe a la’ua iloa ou te le tautala faaSipaniolo? sa ia mafaufau ai.
Sa manava tele i totonu Brigit. “No hablo espanol,” sa ia fai atu ai, a’o lulu lona ulu. “Ou te le tautala faaSipaniolo.” Sa amata ona flomimatā ona mata.
Sa faamimigi tau’au o teineiti ma ataata atili ai lava. Sa tusi atu se tasi o teineitiiti ia te ia lava ma fai atu, “Dayana.” Ona ia tusi atu lea i le isi teineitiiti ma fai atu, “Andrea.”
Sa amata ona mou ese atu popolega o Brigit. Sa ataata atu o ia i teineiti ma faasino ia te ia lava. “Brigit.”
Sa saofafai i lalo Dayana ma Andrea i autafa o Brigit. Sa la’ua a’oa’oina o ia i le ala e fai atu ai “tusitusiga paia” i le faaSipaniolo ma ni nai isi upu. Ina ua amata le sauniga faamanatuga, sa lagona e le loto o Brigit le mafanafana ma le toafilemu.
Ina ua uma le Peraimeri, sa nonofo Brigit ma ana uo fou i le mutia i fafo o le lotu a o talanoa o latou matua. Na a’oa’o atu e Dayana ma Andrea ia Brigit nisi upu faaSipaniolo. Ona tusi lea o Dayana i se laau ma fesili atu, “¿[Igilisi] Inglés?”
Sa ataata foi Brigit ma faasino i ai. “Laau,” na ia fai mai ai. Sa ia ataata ma faasino atu i isi mea, ma fai atu upu i le gagana Peretania. Sa toe fai atu e Dayana ma Andrea upu faaPeretania. Ona la’ua a’oa’o atu lea ia Brigit le auala e fai atu ai i le faaSipaniolo. Na a’oa’oina e Brigit ituaiga uma o upu aoga, e pei o le libro (Tusi), Casa (fale), ma coche (taavale). Ae sili ai i lo mea uma, sa la’ua a’oa’oina o ia i le ala e fai atu ai amigos (uo).
E le’i umi ae o’o i le taimi e o ai i le fale. Sa talotalo atu Brigit e faatofa ia Dayana ma Andrea.
“Na faapefea mai lou aso muamua i le lotu i Venesuela?” O le fesili lea a Tama.
Sa ataata Brigit. “Sa manaia tele! Sa ou maua ni uo. Ma o loo la’ua a’oa’oina a’u i le faaSipaniolo!”
“Matuai manaia tele! Ua ou fiafia lava ua e maua se aso lelei.”
Sa mafaufau Brigit e uiga i le ala na faafeiloaia ai o ia e Dayana ma Andrea. Na te le’i toe lagona lona pei o se tagata ese. Sa ia iloa o loo fesoasoani le Tama Faalelagi ia te ia e maua ni uo. Ma sa le mafai ona ia faatali e vaai po o le a se mea o le a aumaia e lona taimi o totoe i Caracas!
Ata na tusia e Julia Castaño