O le Lesona o le Pulouaitu
E alala le tusitala i Bavaria, Siamani.
Sa folafola atu e Ane ma isi ia avea ma tagata e faalogo lelei.
“O le mana o le Agaga Paia e mafai ona outou iloa ai le moni o mea uma lava” (Moronae 10:5).
Sa matuai fiafia lava Ane. O le o alu Tina e ao pulouaitu vao ma lana uo, o Miss Maria. Ma sa fai mai o ia, e mafai foi ona sau Ane! E faapena foi e nai ona tei e toatolu ua lava le matutua.
“Ua lelei,” o le tala lea a Tina ae latou te le’i o ese. “O le a ou faatagaina outou e o mai aua ou te iloa e mafai ona tou matuai faalogo lelei. E taua tele lena mea a o tatou sueina ia pulouaitu. O nisi o pulouaitu vao e matuai tofo lelei lava. Ae o nisi pulouaitu e oona. E tou te mama’i ai. Ee mafai la ona outou folafola mai e faia le mea tonu e fai mai ai Miss Maria?”
“Ioe!” Sa feei atu ai Ane ma nai ona tei. Sa uu mai e Ane, Autumn, Kitiona, ma Adelaide a latou ato ma savavali atu i le togavao e fetaui ai ma Miss Maria.
O Miss Maria o se tagata atamai tele i mea tau pulouaitu. Sa a’oa’oina o ia i le auala e maua ai pulouaitu e sefe e aai ai i le vaomatua o Bavarian i Siamani.
“Ei, tamaiti!” Na fai mai ai Miss Maria. “O ai ua sauni e su’e ni pulouaitu?”
Sa alalaga atu Ane ma ona tei. “O A’u! O A’u!”
“Lelei tele!” Na fai mai ai Miss Maria. “Ia manatua, e mafai ona e pa’i atu pe ao na’o pulouaitu ou te fai atu e sefe.”
Sa toe folafola atu Ane ma isi o le a faalogo lelei. Ona latou mulimuli ai lea ia Miss Maria i le togavao.
Sa susulu le la a o latou savalia le eleele na ufitia i limulimu. Sa i ai uma ia pulouaitu! Sa i ai pulouaitu lanumoli, pa’epa’e, mumu, ma le enaena. O nisi e lapopoa. O nisi e laiti.
O pulouaitu e sili ona fiafia i ai Ane e lanumumu e i ai togitogi pa’epa’e. Sa latou faamanatu atu ia te ia, ia tala faafagogo. Ae sa ia faalogo ina ua fai atu ia Miss Maria ia te ia e ’aua ne’i pa’i atu i ai. O na pulouaitu sa matagofie ae sa matua oona lava!
Na taitaiina ma le faaeteete i latou e Miss Maria. O Ane ma ona tei sa faalogo lelei, e pei lava ona sa latou folafola atu.
Sa latou fesoasoani foi i nisi auala. Sa pueina e Autumn ni ata o pulouaitu. Ina ua maua e Miss Maria ia pulouaitu sa saogalemu e aai ai, sa ’oti ma le faaeteete e Kitiona ia ’au. Ona ave lea e Ane ma Adelaide i totonu o ato.
Mulimuli ane ua oo i le taimi e o ai i le fale. Na faamanatu atu e Miss Maria ia i latou e fufulu o latou lima i le fasimoli ma le vai i le taimi lava na latou toe taunuu ai.
“Faafetai mo le faaali mai ia i matou o le vaomatua ma le fesoasoani mai ia i matou i pulouaitu,” o le tala lea a Ane.
Sa ataata Miss Maria. “Faafetai atu ia te outou mo le faalogo lelei!”
Mo le ’aiga o le afiafi i lena po, sa kukaina ai e Tama ni pateta, sosisi, ma fuamoa faatasi ma se mea faikuka sili ona faapitoa. Pulouaitu!
“Manaia,” o le tala lea a Ane a o toe sauni e ai. “E ese le tofo lelei o nei mea!”
“O se mea lelei le iloa e Miss Maria ia pulouaitu e sefe i le ’ai,” o le tala lea a Tina.
“Ma o se mea lelei sa matou faalogo i le mea na fai mai ai Miss Maria!” o le tala lea a Autumn.
Sa mafaufau Ane mo sina taimi. “Pe tai faapena le ala e tatau ona tatou faalogo ai i le Agaga Paia?” Sa sauniuni Ane e papatiso ma faamauina. Sa ia a’oa’o e uiga i le mauaina o le meaalofa o le Agaga Paia.
Sa luelue atu le ulu o Tina. “Ioe! E mafai e le Agaga Paia ona fesoasoani ia i tatou ia iloa le mea e sa’o ma lelei. E pei o le auala na fesoasoani ai Miss Maria ia i tatou e iloa ai po o le fea pulouaitu e lelei ona ’ai.”
“O lea e taua ai le faalogo ma le toto’a i le Agaga Paia,” o le tala lea a Tama.
“O lena tonu lava!” na fai atu ai Tina.
“Ou te fiafia e mafai e le Agaga Paia ona fesoasoani ia i tatou ia saogalemu,” o le tala lea a Ane. Ma i lena mea, sa ataata o ia ma tago atu toe ’ai le pulouaitu manaia.
Ata na tusia e Simini Blocker