Fai atu o Tala Mananaia
E nofo le tusitala i Iuta, ISA.
Sa i ai ia Ionatana se manatu fou sa ia manao e faata’ita’i.
“O upu matagofie … e suamalie i le loto” (Faataoto 16:24).
Sa mapu’ea Ionatana a o savali atu o ia i le fale mai le a’oga. Sa masani ona ia tulimatai atu i faaiuga o vaiaso. Ae talu ai nei sa tele atu le taufaalili ma le fefinauai i lona aiga. Sa moomoo Ionatana ina ia mafai ona sili atu ona latou maua faatasi le fiafia.
I lena po, sa tootuli ai Ioantana i ona tulivae e tatalo. “Tama Faalelagi, ou te manao e fesoasoani i lo’u aiga ia fealofani atili. Faamolemole fesoasoani mai ia te a’u e mafaufau i se auala e fesoasoani ai ia i latou uma ia lagona le alofaina. Ma faamolemole fesoasoani ia i latou ia fealofani atili. I le suafa o Iesu Keriso, amene.”
Sa lagona e Ionatana le fiafia tele ina ua oso i luga o le moega. Sa ia iloa o le a fesoasoani le Tama Faalelagi ia te ia ia iloa le mea e fai.
Ina ua uma le meaai i le afiafi o le Aso Sa, sa tuu atu e Tama ia tofiga mo le afiafi faaleaiga. “Ionatana, o oe e taitai,” o le tala lea a Tama.
Sa ataata Ionatana. Sa fiafia o ia i le afiafi faaleaiga. O se taimi faapitoa lea na latou faaaluina faatasi uma. Sa fesoasoani ia te ia e lagona ai le latalata atu i tagata taitoatasi o lona aiga.
Na tuuina atu e lena mea se manatu ia Ionatana! Atonu sa i ai se auala e tausia ai lena lagona faapitoa i le vaiaso atoa.
I le po o le Aso Gafua, na osooso ai Ionatana i lona nofoa a o faatalitali o ia mo le afiafi faaleaiga e amata ai. O le mea muamua o lona uso laititi, o Chris, sa faia le tatalo amata.
Na tu i luga Ionatana. “Faafetai mo lena tatalo manaia, Chris,” na ia fai atu ai. “Ia, ou te fia faailoa atu se mea fou. Ua ta’ua, ‘Fai atu o Tala Mananaia.’”
“O le fai atu o tala mananaia?’” o le fesili lea a Chris.
“Ioe! Po o ai lava e taitai e fai atu se tala manaia e uiga i tagata uma o lo tatou aiga. Ma e le mafai ona galo ia te ia le fai atu o se mea lelei e uiga ia te ia lava! Ou te taitai i le vaiaso lenei. O lea o a’u ou te faia atu ni tala mananaia.”
Sa ataata atu Ionatana ia Chris. “Chris, e te ala fiafia i aso uma. O oe o se faataitaiga lelei, aemaise lava pe a o’u lagona le vaivai tele.”
Sa ataata Chris. “Faafetai!”
Sa lagona e Ionatana le mafanafana o lona loto. “Ioana, e te galue malosi lava, ae ou te le faalogo lava o e tomumu. Ma e te faaavanoaina lava lou taimi mo a’u.”
“Auu, ou te alofa ia te oe,” o le tala lea a Ioana. Sa ia faaveuveu lona lauulu ma tuu atu ia te ia se opo lapoa.
Sa lagona e Ionatana le mafanafana atili o lona loto. “O Tag o se tagata e lelei tele le faalogo. Pe a ou valaau atu ia te ia i le kolisi, na te tuuina mai lava ia te a’u se fautuaga lelei ma ta’u mai ia te a’u e faaauau pea. Ma a o le’i alu atu Benson i lana misiona, sa ia fesoasoani mai ia te a’u ia ou fiafia i tusitusiga paia. Ua ou misia lava o ia, ae o loo ia faia se galuega lelei tele o le a’oa’oina o tagata e uiga i le Tama Faalelagi.”
Na liliu atu Ionatana ia Tama. “Tama, e te fesoasoani ia i matou ia maua le fiafia e tusa lava po o a mea o loo matou faia.”
Sa ata Tama. “E tusa lava pe tatou te susū ma palapala e taumafai e totō la tatou togalaau mo le taimi lona fa?”
“E tusa lava pe tatou te faia lena mea!” Sa ata Ionatana. “Ma, Tina, e te faia le ti o le taeao sili ona matagofie mo i matou i aso uma a o le’i amataina le a’oga. O le mea lena na mafai ai ona ou aluese mai le moega i le taeao!”
“Oi, ioe!” Sa faauouo e Tama ia Tina.
Sa ataata atu Tina ma feula atu se kisi ia Ionatana.
“Ei, o lea la ua tatau ona e fai atu se tala manaia e uiga ia te oe lava, Ionatana!” O le tala lea a Chris.
Sa susulu fiafia foliga o Ionatana. “Faatasi ai ma le fesoasoani a le Tama Faalelagi, sa ou mafaufau ai e uiga i le ‘Fai atu o Tala Mananaia.’ O le mea lena ou te maua ai le fiafia!”
Sa ataata atu tagata uma ia Ionatana. O le “Fai atu o Tala Mananaia” sa fiafia ai foi lona aiga.
Ata na tusia e Garth Bruner