O Paionia i Atunuu Uma
Kim Ho Jik
Tagata Muamua o le Ekalesia mai Korea
Sa aumaia o ia e le Atua iina mo se mafuaaga faapitoa.
Sa manava loloa ia Kim Ho Jik. O lona aso muamua lea na a’oga ai ma faiaoga ai i se iunivesite i le Iunaite Setete.
O le a’oa’oina sa taua ia Ho Jik. Sa manao o ia e a’oa’o le tele o mea na te mafaia e uiga i meaai paleni. Ona mafai lea ona ia faaleleia le olaga mo tagata i Korea i Saute, lea e sau ai o ia.
Sa sii atu e Ho Jik se pusa o tusi i luga o ni sitepu e agai atu i lona ofisa fou.
“Talofa,” sa fai atu ai se tamaloa mai le ofisa na sosoo ai. “O a’u o Oliva. O loo o’u aoga fo’i iinei.”
“Fiafia lava e feiloai atu ia te oe,” o le tala lea a Ho Jik.
Na mavae atu vaiaso. Na avea Ho Jik ma Oliva o ni uo. Sa la’ua talanoa e uiga i mea sa la a’oa’oina. Sa matauina e Ho Jik e le inu avamalosi pe ulaula ia Oliva. Sa le’i faigaluega fo’i o ia i Aso Sa. Ou te le iloa pe aisea, na mafaufau ai Ho Jik.
I se tasi aso na tuuina atu ai e Oliva ia Ho Jik se tusi. Sa faatatau i mataupu faavae o le faatuatua. “O loo ta’u atu e lenei tusi ia mea ou te talitonu i ai,” o le tala lea a Oliva. “Ta’u mai pe a e fia a’oa’o atili.”
Sa faamae’aina e Ho Jik le tusi i le itiiti ifo ma le vaiaso. Sa tuu atu e Oliva ia te ia se isi tusi e ta’ua o le Tusi a Mamona. Sa vave fo’i ona faitau e Ho Jik. Sa amata ona la o faatasi ma Oliva i le lotu. Peitai na te le’i mautinoa pe sa ia manao e papatiso.
E le’i umi ae oo i le aso mulimuli o Oliva i le iunivesite. Sa iloa atu o ia e Ho Jik i le alasavali. “Ou te talitonu na aumai oe e le Atua iinei mo se mafuaaga faapitoa,” o le tala lea a Oliva. “Ae e le na’o le faapea ina ia mafai ona e a’oa’o atu ou tagata e uiga i meaai paleni. E manaomia foi ona e a’oa’oina i latou e uiga i le talalelei. ”
Sa mafaufau Ho Jik i upu a Oliva mo se taimi umi. Na iu ina filifili o ia e papatiso. Sa papatisoina o ia i le vaitafe lava lea sa papatiso ai Iosefa Samita i le 122 tausaga na muamua atu!
Ina ua mae’a le a’oga a Ho Jik, sa alu atu o ia i lona aiga i Korea i Saute. Ua manao o ia e faasoa atu le talalelei i lona aiga. Sa ia a’oa’o atu le toatele o nisi e uiga i Le Ekalesia a Iesu Keriso o le Au Paia o Aso e Gata Ai.
Na avea Ho Jik ma se taitai. Sa i ai ni ana galuega taua i a’oa’oga ma le malo. Sa fesoasoani o ia i tagata i lona atunuu ia maua ni meaai e sili atu ona paleni. Sa ia faia se eseesega i o latou olaga.
Ae sa manao Ho Jik e faia se eseesega e sili atu. Sa le’i faatagaina faifeautalai e a’oa’o atu i Korea. Sa manao Ho Jik e suia lena mea. Sa ia iloa afai e fesili atu o ia i le malo ina ia tuu atu ia faifeautalai e a’oa’o iina, e ono afaina ai o ia. Peitai sa ia iloa, sa matua aoga lava. O le a ia lafoaia mea uma ina ia aumai ai le talalelei i Korea.
Sa talosagaina e Ho Jik le malo ina ia faataga faifeautalai e a’oa’o atu i Korea i Saute. Ma na fai mai le malo ioe! E le’i leva ae oo mai faifeautalai, ma sa fesoasoani Ho Jik ia i latou e a’oa’o le tele ma le tele o tagata.
Sa iloa e Ho Jik e sa’o lava Oliva. Sa auina atu o ia i lena iunivesite ina ia mafai ona ia a’oa’o ai e uiga i le talalelei. Sa faafetai o ia ona sa faamanuiaina o ia e le Atua i le talalelei faatasi ai ma le avanoa e faasoa atu ai.
O Korea i Saute o se Atunuu i Asia i Sasae.
I le taimi nei ua silia ma le 88,000 tagata o le Ekalesia i Korea i Saute.
O loo i ai fo’i se malumalu i le laumua, o Seoul.
Na avea Kim Ho Jik ma se tagata tomai faapitoa i le taua o le meaai o le soybean [pi soi].
O le fanau a Ho Jik o nisi ia o tagata muamua na papatisoina i totonu o le Ekalesia i Korea.
Sa faaliliuina e Ho Jik le mataupu faavae o le faatuatua i le gagana Korea.
Ata na tusia e Alyssa Tallent