Lo’u Itu, Lou Itu
“Faauta, o le mea e matua lelei ma le matagofie lava, pe a nonofo faatasi lava o uso!” (Salamo 133:1).
“Megan! O ou seevae ia o loo i lo’u itu o le potu!” Na fai atu ai Mia ma le ita.
“Ia, o loo i ai au tusitusiga paia i lo’u itu,” o le tala lea a Megan.
Sa onoono mai le ulu o Tina i totonu o le potu. “Suga, e le tele se tapenaga o ou faalogo mai o fai ii. E le mafai ona lua o i le paka seiiloga e mamā le lua potu.”
“Ae o le gasu uma lea a Megan!” O le tala lea a Mia. “E le fea lo’u tapenaina.”
“E le o ni a’u mea uma!” O le tala lea a Megan.
“Aue.” Sa piilima Mia. “Maimau pe ana i ai so’u lava potu. Aisea e tatau ai ona ma potu ma Megan? O Michael ua i ai lona potu na’o ia!”
Sa mapu’ea Tina. “Ua e iloa e le o i ai se isi potu. O Michael e matua atu. O le mafuaaga lena ua i ai lona ia potu.”
“Ia, fai i ai e aua nei oo mai ana mea i la’u itu.” Sa tusi e Mia se laina faafoliga i lona tamatamailima i le ogatotonu o le potu. “Vaai? O lou itu lena, Megan. O lo’u itu lenei.”
“Mmm,” o le tala lea a Tina. “Atonu e mafai ona tatou faia se pupuni e vaelua ai le potu. Faamata o le a fesoasoani lena mea ia lua fealofani ai? ”
Sa ataata Mia. “Sao!”
O le aso na sosoo ai, na su’i ai e Tina ni ie e fai ai se pupuni. Sa viole ma sa i ai se mamanu o se mu. Sa ia suiina foi se lipine ma ni lopateuteu e tautau i le pito i lalo. Mulimuli ane, sa fesoasoani Mia ma Megan ia Tama e faatautau le pupuni i se fasi uaea. Sa toso e tau atu i le isi itu o le potu.
Sa pati lima o Mia i le fiafia. “Ia lea la! E pei lava o le i ai o lo’u lava potu!”
Sa ia aumai i fafo ana vali e valivali ai se ata. Ae ina ua mavae ni nai minute, sa lelavā ma le to’a o ia. Sa ia mafaufau po o a mea a Megan na fai i le isi itu o le pupuni. E masani ona la’ua valivali faatasi. Sa ia lagona le pei ua tuuatoatasi i le faia nao ia lava.
O le po lena, sa tootuli ai Mia e fai lana lotu moe. Sa ia faafetai atu i le Tama Faalelagi mo lona fale ma mo lona aiga. O lena mea na ia lagona ai si faanoanoa teisi. Sa fiafia o ia i le i ai o lona lava ia avanoa, ae sa ia misia le taaalo ma Megan.
Sa pe’a Mia i lona moega. Ae sa le mafai ona moe o ia. Sa faliu i lona autafa. Sa mafai ona ia vaaia le ulu o Megan i le va o le pupuni ma le puipui.
“Megan,” o lana musumusu atu lea. “O e ala?”
“Ioe,” na toe musumusu mai ai Megan.
“Ae a pe a ta faia se tamai pusameli?” Sa fesili atu ai Mia. “E tuu ai ni faamatalaga mo le tasi ma le isi.”
“Manaia le manatu,” na fai mai ai Megan. E mafai ona ta’ua faia taeao?
“Ioe.” Sa moeiini mata o Mia ma se ataata. “Manuia le po, Megan.”
“Manuia le po, Mia.”
O le aso na sosoo ai, na maua ai e Mia se tamai pusa. Sa ia tuu i le va o itu uma e lua o le potu. Ona ia tusia lea o se faamatalaga ma tuu i totonu: Megan, e te fia taalo i a’u meataalo manufaovavae? Alofa atu, Mia.
Sa piki i luga e Megan le tusi ma faitau i ai. “Ou te fiafia lava i ai!”
O le vaiaso atoa, na tuua ai e Mia ma Megan ni faamatalaga mo le tasi ma le isi i la la’ua pusameli. Ma sa la taaalo faatasi i aso uma. O nisi taimi la’ua te taaalo ai i le itu a Mia. O nisi taimi la’ua te taaalo ai i le itu a Megan. Ae sa la’ua fiafia faatasi i taimi uma.
“E te iloa,” na fai atu ai Mia ia Megan i se tasi aso, “ou te le mautinoa pe ta te manaomia pea lenei pupuni.”
“E sao,” o le tala lea a Megan. “E fai si faalavelave i le auala.”
Sa fesoasoani Tama ia i la’ua e aveese le pupuni i lalo.
“Ua ou fiafia ua lua a’oa’o e fealofani,” o lana tala lea.
Sa ataata atu Mia ia Megan. “Ma a’u foi.”
Ata na tusia e Katherine Blackmore