Ko ha Fai‘aho Temipale
Naʻe ʻamanaki ke hoko e ʻaho fāʻeleʻi ʻo Lītiá.
“Ko e hā ʻokú ke fie maʻu ki ho ʻaho fāʻeleʻí, Lītia?” Ko e fehuʻi ange ia ʻa e fineʻeikí.
Ne fakakaukau ʻa Lītia ʻi ha ngaahi miniti siʻi. Naʻá ne fie maʻu nai ha meʻavaʻinga foʻou? Naʻá ne fie maʻu nai ha tohi ke lau? Naʻe ʻiloʻi leva ʻe Lītia ʻa e meʻa naʻá ne fie maʻu lahi tahá.
Naʻe pehē ʻe Lītia, “ʻOku ou fie ʻaʻahi ki he temipalé.” Naʻá ne fie maʻu ke nofo mo hono fāmilí. Naʻá ne fie ʻalu ki ha feituʻu ʻoku fakafiefia. Pea ko e fē ha feituʻu ʻe toe fakafiefia ange ʻi he temipalé?
ʻI he ʻaho fāʻeleʻi ʻo Lītiá, naʻe teuteu ʻa e Fineʻeikí, Tangataʻeikí, Lītia, mo hono ngaahi tokouá ke nau ō ki he temipalé. Naʻe aʻu ʻo fakaafeʻi ʻe Lītia hono kaungāmeʻa ko Kalānité.
Ko ha fakaʻuli lōloa ia. Ka ne SAI pē ia. Naʻe fakakata ʻa Lītia mo Kalānite mo hono tokoua ko Lusí. Naʻá ne fai ha talanoa ki hono ongo tehina ko ʻIlisa mo ʻElí.
Pea fakaʻosí, naʻe lava ʻa Lītia ʻo sio ki he temipalé. Naʻa nau aʻu ki ai!
“Sio ki he ʻāngelo ko Molonaí!” Ko Lītia ange ia. Naʻá ne tuhu hake ki he temipalé.
ʻI heʻene hū pē ki tuʻa mei he kaá, naʻe lele atu ʻa Lītia ki he matapā ʻo e temipalé.
Naʻe ʻi ai ha ngaahi fuʻu ʻakau fakaʻofoʻofa ʻi he temipalé. Naʻe ʻi ai ha lauʻiʻakau lanu moli mo engeenga ʻi he ʻuluʻakaú. Naʻe longolongoaʻa ʻa e lauʻiʻakau ʻi he kelekelé ʻi he lue takai ʻa Lītia mo hono fāmilí ʻi he temipalé.
Naʻe angi mālohi ʻa e havilí ʻi he ʻuluʻakaú. Naʻe siofi ʻe Lītia e puna ʻa e lauʻiʻakaú ʻi he ʻeá. Naʻá ne lele ke maʻu ha lauʻi ʻakau kimuʻa pea tō ki he kelekelé. Naʻe fakaʻofoʻofa! Naʻá ne faʻo ia ki hono kató.
Naʻe lau ʻe he Tangataʻeikí ʻa e fakaʻilonga ʻi he temipalé. Naʻe pehē, “Māʻoniʻoni ki he ʻEikí: Ko e Fale ʻo e ʻEikí.”
Naʻe pehē ange ʻe he Fineʻeikí, “ʻOku ʻuhinga ia te tau lava ʻo ongoʻi ofi kia Sīsū ʻi heni.”
Naʻe ongoʻi nonga ʻa Lītia. Ko ha feituʻu fakafiefia ʻaupito ʻeni!
ʻI heʻenau fakaʻuli atú, naʻe toʻo hake ʻe Lītia ʻene laʻi ʻakaú. ʻI heʻene aʻu ki ʻapí naʻá ne faʻo ia ki heʻene puha makehé. ʻI he founga ko iá, te ne lava ʻo manatuʻi maʻu pē ʻa e ʻaho fakaʻofoʻofa ko ʻení!
Ngaahi tā fakatātā ʻa Tina Finn