Mateuteu ki he Temipalé
“ʻE lava fēfē ke u maʻu ha lekomeni?” Ko e fehuʻi ange ia ʻa ʻAsaní.
“Mou tokanga ke fai ʻa e meʻa kotoa pē ʻi he anga ʻoku feʻunga” (Molomona 9:29).
Naʻe malimali lahi ʻa ʻAsani ʻi heʻene fanongo ki ha tukituki ʻi he matapaá. Naʻe fakaafeʻi ʻe Madda (Fineʻeikí) ʻa ʻenau tokotaha ngāue fakaetauhí ke tokoni ʻi ha efiafi fakafāmili makehe ʻi ʻapi.
Naʻá ne fakaava ʻa e matapaá. “Wah gwaan, Brother Viliami!” (“Ko e hā e meʻa ʻoku hokó?”)
“ʻOku lelei e meʻa kotoa!” Ko e lea ange ia ʻa Brother Viliamí. (“ʻOku sai pē e meʻa kotoa!”) Naʻá ne ʻoange kia ʻAsani ha tangai mango mei heʻene fuʻu mangó.
Naʻe tangutu hifo ʻa Brother Viliami ʻi he seá. Naʻe kole ʻe he fineʻeikí ki he kiʻi tuofefine ʻo ʻAsani ko Taná, ke ne fai ha lotu.
ʻI heʻene ʻosí, naʻe pehē ʻe Brother Viliami, “ʻE hoko e taʻu 12 ʻo ʻAsaní he taʻú ni. ʻOku ʻilo nai ʻe ha taha ʻa e ʻuhinga ʻoku hoko ai ʻeni ko ha taʻu makehe kiate iá?”
Naʻe ngaungaue fiefia holo e kiʻi tehina ʻo ʻAsani ko Tihaní. “Koeʻuhí he te ne lava ʻo maʻu ʻa e lakanga fakataulaʻeikí mo tufa ʻa e sākalamēnití!”
“ʻOku tonu ia!” Ko e tali ange ia ʻa Brother Viliamí. “Ka ʻoku ʻi ai foki mo ha ʻuhinga ʻe taha.”
Naʻá ne fakaava hake ʻene kato paʻangá ʻo toʻo hake ha kiʻi laʻipepa. “Ko ha lekomeni temipale ʻeni.”
Naʻá ne ʻoange ia kia ʻAsani.
“Tōatu!” Naʻe ala hifo ʻa ʻAsani ki he temipale koula ʻi he kātí. “Ko e hā ʻokú ke fakaʻaongaʻi ki aí?”
“ʻOku ou fakaʻaliʻali ia ki he tokotaha ʻoku tangutu ʻi he tesi talitali ʻi he temipalé. ʻOkú ne fakahoko kiate kinautolu ʻoku ou taau ke hū ki loto.”
“ʻOku ou fie sio!” Naʻe toʻo ia ʻe Tana meia ʻAsani ʻo ne sio fakalelei ki ai.
“ʻOkú ke pehē ko e hā hoʻo ongó kapau naʻe ʻi ai haʻo lekomeni pē ʻaʻau?” Ko e fehuʻi ange ia ʻa Brother Viliamí.
“Te u ongoʻi makehe!” Naʻe sio hake ʻa ʻAsani mei he kātí. “Ka ʻoku ʻikai ke u ʻilo pe ʻe lava ke u ʻalu ki he temipalé. ʻOku mamafa hono totongi ʻo ha tikite vakapuna ke ʻalu ki ai.”
Naʻe pehē ʻe Brother Viliami, “ʻOku ʻikai ke u faʻa lava mo au ʻo ʻalu ki he temipalé. Ka ʻoku fakamanatu mai ʻe heʻeku lekomení ke u mateuteu maʻu pē ke hū ki loto.”
Naʻe fakakaukau ʻa ʻAsani ʻi ha kiʻi taimi siʻi. Naʻá ne pehē, “ʻOku ou fie mateuteu foki mo au. Te u maʻu fēfē ha lekomeni?”
Naʻe pehē ange ʻe Brother Viliami, “ʻOkú ke fakataha mo e pīsopé. Te ne fai atu ha ngaahi fehuʻi ke vakaiʻi pe kuó ke mateuteu.”
“ʻA ia ʻoku hangē ha siví?” Ko e fehuʻi manavasiʻi ange ia ʻa ʻAsaní.
Naʻe pehē ʻe Brother Viliami, “ʻoku hangē pē ia ha fepōtalanoaʻakí. Ko ho kaungāmeʻa ʻa e pīsopé, pea ʻokú ne fie tokoni atu ke ke mateuteu.”
Naʻe kamo pē ʻa ʻAsani. Naʻá ne saiʻia ʻi he pīsopé.
“Te ke fie sio nai ki he ngaahi fehuʻí?” Naʻe ʻoange ʻe Brother Viliami ha laʻipepa kia ʻAsani ʻoku ʻi ai ha ngaahi fehuʻi. Naʻe haʻohaʻo takai ʻa Tana mo Tihani ʻiate ia ke na sio foki.
Naʻe lau ʻe ʻAsani, “Fika ʻuluakí. ʻOkú ke tui pea ʻi ai haʻo fakamoʻoni ki he ʻOtua, ko e Tamai Taʻengatá; Mo Hono ʻAlo, ko Sīsū Kalaisí; pea mo e Laumālie Māʻoniʻoní?
Naʻá ne fiefia. Naʻe faingofua ia. “ʻIo!”
Naʻá ne hoko atu ʻo lau taha taha ʻa e ngaahi fehuʻí. Naʻe fakamatalaʻi ʻe he fineʻeikí mo Brother Viliami ʻa e ʻuhinga ʻo e ngaahi meʻa ʻe niʻihi.
Pea toe lau ʻe ʻAsani ha fehuʻi ʻe taha: “ʻʻOku mahino nai kiate koe pea ʻokú ke tauhi ʻa e Lea ʻo e Potó?” Naʻá ne mata mamahi. Naʻá ne pehē, “Naʻe tuʻo taha hono ʻomi ʻe ʻAnitelū kiate au ha inu kavamālohi (rum punch) ʻi heʻeku ʻi hono ʻapí. Ka ʻoku ʻikai pē ke u toe fie inu ia ʻe au. ʻOku ʻuhinga nai ia he ʻikai ke u lava ʻo maʻu ha lekomeni temipale?”
Naʻe pehē ʻe Brother Viliami, “ʻOku ʻuhinga ʻa e tauhi e Lea ʻo e Potó ke ʻoua ʻe inu kavamālohi, he ʻoku ʻi ai ʻa e kavamālohi ʻi he inu ko iá (rum punch). Ka te ke lava maʻu pē ʻo fakatomala mo moʻui taau ke hū ʻi he temipalé.”
Naʻe talaange ʻe Tihani, “Koeʻuhí ko Sīsū!”
“Ko ia!” Ko e tali ange ia ʻa Brother Viliamí. “ʻE lava leva ke fakamanatu atu ʻe hoʻo lekomeni temipalé ke ke tauhi maʻu pē ʻa e Lea ʻo e Potó. Pea ke mateuteu maʻu pē ke ʻalu ki he temipalé.”
Naʻe mamali ʻa ʻAsani. Naʻá ne ongoʻi fiemālie ange ai.
Naʻe talaange ʻe ʻAsani, “Mahalo pē ʻe vavé ni haʻaku lava ʻo ʻalu ki he temipalé. Pea ʻi heʻeku lava ʻo fai iá, te u mateuteu!”
Tā fakatātā ʻa Shawna J. C. Tenney