Haʻu, ʻo Muimui ʻIate Au

Taimi Fiefia ‘i he Folofolá

ʻOku fakatatau ʻa e ngaahi fakakaukau ko ʻení ki he Haʻu, ʻo Muimui ʻIate Au—ma‘á e Fakafoʻituituí mo e Ngaahi Fāmilí ʻi he uike kotoa pē.

Fakafanongo pea Tataki.

Hiva‘i e “Fānau Au ʻa e ʻOtuá” (Tohi Hiva ʻa e Fānaú, 2–3).
Na‘e folofola ʻa Sīsū, “Ke ke loto-fakatōkilalo; pea ʻe tataki nima koe ʻe he ʻEiki ko ho ʻOtuá, pea foaki kiate koe ʻa e tali ki hoʻo ngaahi lotú” (Tokāteline mo e Ngaahi Fuakava 112:10). ʻOku finangalo ʻa e Tamai Hēvaní ke tokoniʻi kitautolu!
Fokotu‘utu‘u ha kiʻi hala faingataʻa ʻaki ha ngaahi meʻa ʻi tuʻa pe ʻi loto ʻi homou ʻapí. ʻAi ke haʻi e mata ʻo ha taha. ʻAi ha taha kehe ke ne puke honau nimá pea tataki fakalelei kinautolu ʻi he hala ʻoku fihí. Taufetongi ʻi hono takí mo e muimuí.

Hiva‘i e “Ko e Siasi ʻo Sīsū Kalaisí” (Tohi Hiva ʻa e Fānaú, 48).
Na‘e folofola ʻa Sīsū ʻe ui Hono Siasí ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní (vakai, Tokāteline mo e Ngaahi Fuakava 115:4). Te ke lava ʻo laukonga lahi ange fekauʻaki mo e hingoa ʻo e Siasí ʻi he peesi 42.
Pehē pē kuo teʻeki ai fanongo ha taha ʻiate kimoutolu ʻi he Siasí kimuʻa. Taufetongi ʻi hono vahevahe e meʻa ʻokú ke tui ki aí mo akoako lea ʻaki e hingoa kakato ʻo e Siasí.

Hiva‘i e “ʻOku Ongo ʻa e ʻOfá” (Tohi Hiva ʻa e Fānaú, 42–43).
‘Oku ʻikai tolonga ʻo taʻengata ʻa e ngaahi taimi faingataʻá. ʻE lava ke tāpuekina mo tokoniʻi kitautolu ʻe he Tamai Hēvaní mo Sīsū (vakai, Tokāteline mo e Ngaahi Fuakava 121:7–8).
Taufetongi ʻi hono hiki ha meʻa ʻoku mamafá. Talanoa fekauʻaki mo e founga ʻoku hangē ai hono toʻo e kavenga ko iá ko ha foua ha taimi faingataʻá. ʻE lava fēfē ʻe he ngaahi ʻahiʻahí ʻo ngaohi kitautolu ke tau mālohi ange mo tokoni ke tau tupulaki? Hiki hake leva ʻa e meʻa ko iá mo ha tokoni ʻa ha taha kehe. Fakamanatu ki he tokotaha kotoa pē ʻoku tokoniʻi kitautolu ʻe Sīsū Kalaisi ke tau fuesia ʻetau kavengá.

Hiva‘i e “Kuó u Fai ha Lelei?” (Ngaahi Himí, fika 129).
‘Oku fiefia ʻa Sīsū ʻi he taimi ʻoku tau feinga ai ke fai leleí (vakai, Tokāteline mo e Ngaahi Fuakava 124:15–21).
Kosi ʻo toʻo ha ngaahi foʻi haati pepa pea tā fakatātaaʻi koe ʻi he laʻipepa takitaha, ʻokú ke fai ha meʻa lelei. Fili ha foʻi haati he ʻaho takitaha he uiké ni pea fai e meʻa ʻoku hā he fakatātaá.

Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní