Mamata kia Musa
ʻOku nofo ʻa e tokotaha naʻá ne faʻú ʻi Iowa, USA.
Mahalo pē naʻe ʻikai anga taʻeʻofa ʻa e kiʻi tamasiʻi foʻoú.
“He ʻoku sio ʻa e tangatá ki he anga ʻoku hā ʻi tuʻá, ka ʻoku ʻafioʻi ʻe he [ʻEikí] ʻa e lotó” (1 Samuela 16:7).
“Fineʻeiki, naʻe hoko ha meʻa he akó he ʻahó ni ʻokú ne fakahohaʻasi moʻoni au.” Naʻe fakatooki ʻe ʻEnisī ʻene kato āfeí ki he falikí peá ne tō hifo ki he seá.
Naʻe sio hake e Fineʻeikí mei he tohi naʻá ne laú. “ʻIo? Ko e hā e meʻa ne hokó?”
“Sai, ʻoku ʻi ai ha kiʻi tamasiʻi foʻou ko Musa ʻi heʻeku kalasí.”
“ʻOku sai ia!” Ko faʻeé atu ia. “Naʻá ke talanoa mo ia?”
“ʻIkai, pea ʻoku ʻikai ke u fie fai ia!” Ko ʻEnisī ange ia. “ʻOkú ne anga taʻeʻofa.”
“Ko e hā e meʻa naʻá ne faí?”
Naʻe fakafulofula pē ʻa ʻEnisī. “Naʻá ku sio ki heʻene luelue ki he akó mo hono tuofefiné. Naʻá ne ʻai ke luelue pē ʻi mui ʻiate ia ʻi he halá kotoa! Ko e taimi kotoa pē naʻá ne feinga ai ke lue ʻi hono tafaʻakí, naʻá ne fakavavevave ʻo lue ʻi muʻa ʻiate ia. Ne u ʻita lahi ai.”
Ne mata mamahi e fineʻeikí. “ʻOku ʻikai ongo lelei ia. Mahalo te ne fie maʻu ha kaungāmeʻa hangē ko koé ke fakahaaʻi ange ʻa e founga ke feohi ai mo e niʻihi kehé ʻi he ʻofá.”
ʻI he taimi pē ko iá, ne fakatovave atu ʻa e tehina ʻo ʻEnisī ko Meikení. “Fineʻeiki, ʻiloʻi ha meʻa? ʻOku ʻi ai ha taʻahine foʻou ʻi heʻeku kalasí! Ko hono hingoá ko Talia Kata. ʻIkai ko ha hingoa fakaʻofoʻofa ia?
Naʻe pehē ʻe ʻEnisī, “ʻOku ou tui ʻoku ʻi heʻeku kalasí hono tuongaʻané.”
“Moʻoni? ʻOkú ke monūʻia.”
Naʻe fakafulofula pē ʻa ʻEnisī. “Monūʻia? Ko e hā hono ʻuhingá?”
“Naʻe fakamatalaʻi mai ʻe Talia fekauʻaki mo ia!”
Naʻe tali ange ʻe ʻEnisī, “Pau pē naʻá ne fai ia.”
“Naʻá ne pehē naʻe pau ke tuluʻi hono matá ʻi he pongipongí ni, pea naʻe totonu ke ne tui ha matasioʻata laʻā ke maluʻi hono matá, ka naʻe ngalo ia ʻiate ia. Ko ia ʻi heʻena lue ki he akó, naʻe luelue ʻa Musa ʻi muʻa ʻiate ia ʻi he halá kotoa ke fakamalumalu ia mei he laʻaá. ʻIkai ko ha anga lelei ia?”
Naʻe fuʻu ʻohovale ʻa ʻEnisī. Kuó ne fakamaau halaʻi nai ʻa Musa?
Naʻe pehē ange ʻe he Fineʻeikí, “Hangē ko ha tuongaʻane angaʻofa iá.”
“Ko ia!” Ko Meikeni ange ia. “Pea ʻi heʻena aʻu ki he akó, naʻá ne lue mo ia ki he ʻōfisí ke na lava ʻo telefoni ki ʻapi. Pea naʻá ne nofo mo ia kae ʻoua kuo ʻomi ʻe heʻene faʻeé ʻa e matasioʻata laʻaá.”
Naʻe fakakaukau ʻa ʻEnisī,mani . Mahalo naʻe ʻikai ke u sio ki he meʻa totonu naʻe hokó.
Naʻe tangutu hifo ʻa Meikeni ʻi he seá ʻi he tafaʻaki ʻo ʻEnisií. “ʻOku fakaʻofoʻofa ʻaupito e matasioʻata laʻā ʻo Taliá! ʻOku lanu vāleti pea ʻi ai ha ngaahi siueli ai. Fineʻeiki, ʻe lava ke u fakaafeʻi mai ia he uiké ni? Te ma fakatou lava ʻo tui homa matasioʻata laʻaá mo vaʻinga teuteu!”
Naʻe pehē ange ʻe he Fineʻeikí, “Ko ha fakakaukau lelei ia.” “Fēfē kapau te ke fakaafeʻi mai ai pē mo Musa? ʻOku ou fie feʻiloaki mo kinaua fakatouʻosi. Ko e hā hoʻo fakakaukaú, ʻEnisī?”
“ʻOku ou fie feʻiloaki foki mo kinaua.” Ne malimali pē ʻa ʻEnisī. “ʻOku ou tui ʻe hoko ʻa Musa ko ha kaungāmeʻa lelei.”
Ngaahi tā fakatātā ʻa Jörg Saupe