Ngaahi Lotu maʻa Tesá
ʻOku nofo ʻa e tokotaha naʻá ne faʻú ʻi Colorado, USA.
Naʻe pehē ʻe Tesa, “ʻOku ʻikai fie maʻu ʻe ha taha ke u kau ʻi heʻenau timí.”
“[Ko hai ʻoku kau mo e ʻEikí]? [Ko hai]? [Ko e taimi ʻeni ke fakahā aí]” (Ngaahi Himí, fika 163).
Naʻe sio hifo ʻa Tesa ki hono suú. Ne taimi ki he kalasi fakamālohisinó. Naʻe fili ʻe he fānaú ha ngaahi timi ke nau vaʻinga kickball (soka peisipolo). Naʻá ne ʻiloʻi ʻe fili fakamuimuitaha ia. Naʻe hoko maʻu pē ia kiate ia.
Ne ʻikai fuoloa kuo ʻikai toe ʻi ai ha taha kehe ka ko Tesa pē. Naʻe fanafana ange e kapiteni ʻo e timí ki hono kaungāmeʻá, Mahalo te tau toe kau pē mo ia .” Naʻá na fakatou mahuʻu.
Naʻe fakangalingali pē ʻa Tesa naʻe ʻikai ke ne fanongo ki ai.
ʻI ha ngaahi miniti siʻi lolotonga e vaʻingá, naʻe ʻakahi ʻe ha kiʻi taʻahine ʻi he timi ʻe tahá ʻa e foʻi pulú. Ne haʻu hangatonu mai pē ia kia Tesa!
Te u fakaʻaliʻali ange te u lava ʻo vaʻinga! Ko e fakakaukau ia ʻa Tesá. Naʻá ne puna atu ki muʻa ke hapo e foʻi pulú. Ka naʻe tau ia ʻi hono ongo nimá ʻo tō ki he kelekelé.
Naʻe pehē ange ʻe he kapiteni ʻo e timí, “ʻOku ʻikai nai ke ke lava ʻo fai ha meʻa ke tonu?”.
Naʻe tafoki hake ʻa Tesa ke fehangahangai mo ia. “Sai! ʻOku ʻikai fie maʻu ia ke ke toe kau mo au!” Naʻá ne lue atu ki he foʻi pulú ʻo ʻakahi mālohi ia.
Naʻe tulimui atu e kaungāmeʻa lelei ʻo Tesa ko Sonitulaá. Naʻe talaange ʻe Sonitulā, “ʻEi, ʻoku sai pē ia.” “ʻE lava ʻe ha taha pē ʻo fakatooki ha foʻi pulu.”
“ʻIo? Pea ko e hā leva ʻoku ʻikai fie maʻu ai au ʻe ha taha ki heʻenau timí?” Ko Tesa ange ia.
Naʻe talaange ʻe Sonitulā, “Mahalo pē koeʻuhí he ʻokú ke fuʻu ʻita ʻaupito.” Naʻá ne lue ʻo foki ki he feituʻu naʻe tatali ai e tamaiki kehé.
Naʻe tangutu ʻa Tesa ʻi ha sea ʻi he tuliki ʻo e malaʻe vaʻingá. Naʻá ne tangi. Naʻe ʻikai ke ne loto ke toe tā ʻa e ʻapiakó ki heʻene ongomātuʻá. Kuo nau ʻosi tā atu kimuʻa. Naʻe pehē ʻe he puleakó naʻe faingataʻa ke feohi ʻa Tesa mo e fānau kehé.
Naʻe ʻikai ʻilo ʻe Tesa pe ko e hā naʻá ne fai pehē aí. Naʻe ʻikai ke ne loto ke fakatupu ha palopalema. Naʻá ne ongoʻi ʻita mo loto mamahi he taimi ʻe niʻihi, pea naʻe faingataʻa ke ne fakamaʻumaʻu.
Naʻe māpuhoi ʻa Tesa. Naʻá ne pehē loto pē, “He ʻikai pē ke u teitei kau au ki ai.”
ʻI he tuku ʻa e akó, naʻe fakavavevave atu ʻa Tesa ki tuʻa. Naʻe ʻi ai e fineʻeikí ke ʻave ia. Naʻá ne fakafanongo ki he fakamatala ʻa Tesa fekauʻaki mo hono ʻahó.
Naʻe pehē ʻe Tesa, “ʻOku ʻikai ke nau teitei fili au ke u kau ʻi heʻenau timí. ʻOku ou ongoʻi ʻoku ʻikai ha taha ʻe poupou mai kiate au.”
Ne pehē ange heʻene fineʻeikí, “Fakamolemole atu, ʻofaʻanga. ʻOku anga taʻeʻofa ʻa e kakaí ʻi he taimi ʻe niʻihi. Ka ʻoku ʻi ho tafaʻakí maʻu pē ʻa e Tamai Hēvaní. Pea pehē pē mo ho fāmilí.” Naʻá ne fāʻofua kia Tesa. “Ta ʻalu ā ki ʻapi. ʻOku ʻi ai haʻaku meʻaʻofa maʻau.”
ʻI heʻena aʻu ki ʻapí, naʻe ʻi ai ʻa e Kuifefiné! Naʻe saiʻia maʻu pē ʻa Tesa heʻene ʻaʻahi angé.
Naʻe pehē ange ʻe heʻene kuifefiné, “ʻOku ou fie ʻilo ki he meʻa kotoa pē ʻoku hoko ʻi hoʻo moʻuí. ʻOku fēfē ʻa e akó?”
Naʻe sio pē ʻa Tesa ki lalo. “ʻIkai ke fuʻu lelei.”
Naʻe pehē ange ʻe heʻene kuifefiné, “Naʻe talamai ʻe hoʻo faʻeé ʻokú ke faingataʻaʻia. ʻOkú ke ʻiloʻi nai ʻokú ne lotua mo hoʻo tamaí koe?”
“ʻIo.”
“Pea ʻokú ke ʻiloʻi ʻoku ou lotua mo hoʻo kuitangatá koe?”
Naʻe kamo pē ʻa Tesa.
“Sai, ʻoku tokolahi foki mo ha kakai kehe ʻoku nau lotua koe!”
“Ko e hā hoʻo ʻuhingá?” Ko e fehuʻi ange ia ʻa Tesá.
Naʻe pehē ʻe heʻene kuifefiné, “ʻOku ou hiki ho hingoá ʻi he lisi ʻo e lotú ʻi he temipalé. ʻI he founga ko iá, ʻoku lotua ai koe ʻe ha kakai tokolahi—ʻo aʻu pē ki he kakai ʻoku ʻikai ke nau ʻiloʻi koé.”
“ʻA ia ʻoku hangē pē ʻoku mau kaungā kau fakatahá?” Ko Tesa ange ia.
Naʻe pehē ange ʻe heʻene kuifefiné, “ʻIo, te ke lava ʻo sio ki ai ʻi he founga ko iá. ʻOku poupouʻi maʻu pē koe ʻe he Tamai Hēvaní! Pea ko ʻeni, ʻoku pehē pē mo e kakai kotoa pē ʻoku nau lotua koé.”
“Malō ʻaupito, Kuifefine.” Naʻe fāʻofua ʻa Tesa ki heʻene kuí.
ʻI he toe ongoʻi loto-mamahi ʻa Tesa ʻi he akó, naʻá ne kuikui pea mihiʻi ʻene mānavá. Naʻá ne manatuʻi ʻa e kakai kotoa pē naʻa nau lotua iá. Naʻe hanga ʻe he meʻa ko iá ʻo ʻai ke ne kiʻi ongoʻi lelei ange. Naʻe punou leva hono ʻulú ke fai haʻane lotu.
Naʻá ne lotu ʻo pehē,Fakamālō atu, ʻe Tamai Hēvani. Fakamālō atu ʻi hoʻo poupouʻi aú.
Ngaahi tā fakatātā ʻa Rayanne Vieira