Si Carolina Mitabang
Sa unsang paagi makatabang si Carolina sa iyang higala?
Naningkamot si Carolina nga maminaw sa iyang magtutudlo. Apan dili siya makahunong sa pagtan-aw sa iyang higala nga si Ramón. Wala gayod siyay buhok!
Taudtaod na nga nangatangtang ang iyang buhok. Karon upaw na siya.
Nakadungog si Carolina og tingog sa iyang luyo. Si Cesar ug si Luis nag-agik-ik. Naglaom siya nga wala nila kataw-i si Ramón.
Sa tibuok buntag, giyukbo [hunched] ni Ramón ang iyang mga abaga. Wala siya miisa sa iyang kamot. Magul-anon siya nga tan-awon. Buot ni Carolina nga makatabang siya nga moarang-arang ang iyang pamati.
Sa kataposan panahon na nga magdula sa gawas. Si Ramón mao ang una nga migawas sa lawak klasehanan. Sa dihang nakagawas si Carolina, dili siya makakita kaniya bisan asa! Wala siya nagdula og soccer. Wala siya nagkatkat sa mga bar. Ug wala siya nagdula og bikobiko [hopscotch] duol sa magtutudlo.
Tua ra siya! Nagbarog si Ramón didto sa suok sa nataran. Ug si Cesar ug si Luis anaa didto usab. Mipaduol si Carolina.
“Tan-awa kon unsa ka dako ang iyang ulo!” Misinggit si Cesar.
Mikatawa si Luis. “Kagisan pod nako ang akong ulo kon ako adunay ingon ka maot nga buhok.”
Nagpangumo ang mga kamot ni Ramón. Mura siya og kahilakon.
Midagan si Carolina padulong ni Ramón. “Gusto ka bang makigdula kanako?” nangutana siya. Gitunol niya ang iyang kamot, ug dungan silang milakaw palayo. Mipadayon sila sa paglakaw hangtod duol na sila sa magtutudlo. Wala nay mosamok kanila didto.
“Gusto ka ba nga magdula og bikobiko?” Nangutana si Carolina.
Mitando si Ramón. Midrowing siya [Ramón] og mga linya sa chalk diha sa yuta.
“Ok ra ka?” nangutana siya [Carolina].
“OK na ko karon.” Mipahiyom si Ramón. “Salamat sa pagtabang kanako.”
Mipahiyom si Carolina. Nalipay siya nga igo ang iyang kaisog sa pagtabang sa iyang higala!
Mga paghulagway pinaagi ni Hollie Hibbert