Mga Awit ug mga Bula sa Sabon
Miagik-ik si Alice sa dihang naghunahuna siya mahitungod ni Presidente Kimball nga nagkanta uban sa usa ka baka.
Gibutangan ni Alice og usa ka takos nga noodles ang panaksan sa iyang igsoon nga lalaki. Gihigugma niya ang iyang manghod nga mga lalaki ug mga babaye—ang tanang lima kanila! Nindot ang pagbati sa pagtabang kanila. Apan usahay lisod nga mao ang kinamagulangan. Sukad miabot sa panimalay ang bag-ong masuso, gikanahanglan niyang mas motabang pa gayod. Daghan kaayo ang nangahitabo sa iyang panimalay!
“Unsay imong nakat-onan sa simbahan karon?” Nangutana si Papa.
“Jesus!” Miingon si Sarah ang manghod nga babaye ni Alice. Giyabo niya ang applesauce sa iyang plato.
Mipahiyom si Alice. Si Sarah matahom gayod. Ug kusog usab mamungkag.
“Nakat-onan nako ang mahitungod ni Presidente Kimball …” nagsugod sa pagsulti si Alice. Apan dayon nanawag si Mama gikan sa pikas kwarto. Nagkinahanglan siya sa tabang ni Papa alang sa masuso.
“Pasensiya,” miingon si Papa. “Mobalik ra dayon ko.”
Samtang gitabangan ni Papa si Mama, gitabangan ni Alice ang uban. Nayabo ni Eric ang iyang baso sa gatas. Gilimpyohan kini ni Alice. Nagsugod sa paghilak si Sarah. Gigakos siya ni Alice. Gusto pa ni Clara og dugang noodles. Gihatagan siya ni Alice og dugang pa.
Bisan mibalik na si Papa, ang kusina banha ug gubot gihapon. Nangandoy si Alice nga unta mas sayon nga mobati nga malinawon.
Sa kataposan, nahuman na gayod ang paniudto. Gitabangan ni Alice ang iyang mga igsoon sa pagdala sa ilang mga plato ngadto sa lababo. Igo na ang pangidaron ni Alice nga dili makabuak og mga butang. Mao nga siya ang gitahasan sa pagpanghugas sa mga plato. Gipuno niya ang lababo og tubig nga dunay sabon.
Unta dili ko kinahanglan mobuhat og mga buluhaton sa balay, naghunahuna si Alice. Dayon nakahinumdom siya sa unsay iyang nakat-onan sa Primary mahitungod ni Presidente Spencer W. Kimball. Sa dihang bata pa siya, gikinahanglan usab niyang mobuhat og mga buluhaton sa balay. Mikanta siya kaniadto og mga himno sa dihang gigatasan niya ang baka!
Gihunahuna ni Alice si Presidente Kimball nga nag-duet uban sa baka. Miagik-ik siya.
Dayon nakaideya siya. Pwede siyang mahimong sama sa propeta! Gikuha niya ang hymnbook ug giablihan kini ngadto sa unang himno.
Gikinahanglan niyang mangita og paagi nga ipabilin kini nga abli. Gibutang ni Alice ang hymnbook sa kurdiso sa bentana [windowsill]. Gisuksok niya ang usa ka kilid sa hymnbook sa luyo sa usa ka tanom nga gibutang sa kaang. Dayon gisuksok niya ang pikas kilid sa luyo sa usa ka bug-at nga tasa. Karon makita na niya kini samtang nagtrabaho siya.
Samtang gikuskosan ni Alice ang mga panaksan, mga tasa, ug mga kutsara, gikanta niya ang himno. Nindot ang pamati sa mainiton, sabonon nga mga bula diha sa iyang mga kamot. Ug ang awit nakapalipay sa iyang kasingkasing.
Pagkasunod adlaw, mikanta na usab si Alice. Ug sa adlaw human niana. Naningkamot siya nga mahinumdoman ang mga pulong sa matag himno. Dayon mipadayon siya sa sunod nga himno. Nakakat-on usab si Alice og bag-ong mga himno! Mikuha siya og mga leksiyon sa piano sulod sa pipila ka tuig. Kon dili siya kahibalo sa usa ka himno, gikat-onan niya ang mga nota sa piano.
Sa wala madugay wala na kaayo maghunahuna si Alice sa pagpanghugas og mga plato. Usahay gani ingon og ganahan siya niini! Nindot nga mokanta ug maghunahuna mahitungod ni Jesus. Ang pagkat-on sa matag bag-o nga himno sama sa pagbaton og usa ka bag-o nga higala. Dili igsapayan kon unsa ka banha ang kinabuhi sa iyang palibot, ang mga himno nakatabang kaniya nga mobati og kalinaw.
Mga paghulagway pinaagi ni Erin Taylor