Mga Pioneer sa Matag Yuta
Si Dinis Nakakaplag og Tubag
Migiot [squeaked] ang kutson sa double deck samtang miligid si Dinis. Naglimbaglimbag siya tibuok gabii. Apan dili lang gayod siya makatulog!
Unsa kaha kon sayop ang mga misyonaryo? Naghunahuna si Dinis. Unsa kaha kon human sa tanan kini dili ang tinuod nga simbahan? Unsa kaha kon anaa ako sa sayop nga dalan? Ang mga pangutana nagpadayon sa paghasol kaniya.
Ang pamilya ni Dinis nagpamiyembro sa Simbahan duha ka tuig na ang milabay, sa dihang nag-edad siya og 10. Sa dihang una silang gitudloan sa mga misyonaryo, nabati ni Dinis dihadiha dayon nga unsay ilang gitudlo tinuod. Si Dinis ug ang iyang pamilya mao ang pipila sa unang mga tawo nga nagpamiyembro sa Simbahan sa Portugal. Si Dinis usa ka pioneer!
Apan bag-ohay lang nagsugod siya sa pagkabalaka. Unsa kaha kon ang pagpabunyag dili mao ang husto nga pagpili?
Walay bisan kinsa nga gisultihan si Dinis nga nabalaka siya. Wala niya sultihi ang iyang mga igsoong lalaki o iyang igsoong babaye. Wala gani niya sultihi ang iyang mga ginikanan. Apan karong gabhiona, kini mao lamang ang iyang mahunahuna.
Nanghupaw si Dinis. Mitan-aw siya sa ubos sa kilid sa higdaanan. Hinanok nga nangatulog ang iyang mga igsoong lalaki diha sa ubos nga higdaanan sa double deck. Nag-inusara si Dinis.
Nasayod siya nga kinahanglan niyang mangutana sa Dios kon tinuod ba ang Simbahan. Miluhod siya sa tunga-tunga sa iyang higdaanan. Miduko siya ug misugod sa pag-ampo.
“Palihog, Dios,” malumo nga miingon si Dinis. “Pahibaloa ako kon si Joseph Smith nakakita ba gayod kanimo ug ni Jesus.”
Makadaghan nang nag-ampo si Dinis kaniadto. Apan kining higayona lahi. Gikinahanglan gayod ni Dinis nga masayod. Mas naningkamot gayod siya nga mag-ampo alang sa tabang karon kay sa kaniadto.
“Dili ko gusto nga masayop,” mihunghong siya. “Gusto lang ko nga mahibalo kon unsay husto.”
Dayon adunay gibati si Dinis. Ang pagbati kusog ug mainiton. Kini midako hangtod nabati niya kini sa tibuok niyang lawas. Gibati niya nga tingali mobuto siya sa tumang kalipay!
Nasayod si Dinis nga ang pagbati mao ang Espiritu Santo. Ang Dios mitubag sa iyang pag-ampo! Husto ang mga misyonaryo. Si Joseph Smith usa gayod ka propeta. Ug ang pagpabunyag dili lang usa ka maayo nga pagpili. Kadto mao ang labing maayo nga pagpili.
Si Dinis mihigda nga naghayang ug mitan-aw sa kisami. Nawala na ang iyang mga kabalaka. Gibukot niya ang iyang habol. Wala lang siya nakabantay, nakatulog na siya.
Samtang nagkatigulang si Dinis, kanunay niyang gihinumdoman ang gabii sa dihang nag-ampo siya diha sa iyang double deck. Nasayod siya nga anaa siya sa hustong dalan isip usa ka miyembro sa Simbahan ni Jesukristo. Ug nasayod siya nga ang Langitnong Amahan kanunay nga maminaw sa iyang mga pag-ampo.
Ang Portugal usa ka nasod sa kasadpang Europa.
Ang Portugal adunay usa ka templo. Gipahinungod kini niadtong 2019.
Anaa sa Portugal ang labing karaan nga tindahan sa libro sa kalibotan.
Gibunyagan si Dinis diha sa swimming pool sa mission home.
Miserbisyo siya og misyon sa mga isla duol sa baybayon sa Spain, Portugal, ug Africa.
Si Dinis ug ang tanang tulo sa iyang mga igsoon miserbisyo og mga misyon sa samang higayon!
Mga paghulagway pinaagi ni Sammie Francis