Dali, Sunod Kanako nga mga Kalihokan
Alang sa home evening, nga pagtuon sa kasulatan, o alang lamang sa kalingawan!
Ang Atong Langitnong Panimalay
Istorya: Kitang tanan nagpuyo uban ni Jesus ug sa Langitnong Amahan sa wala pa kita matawo. Ang Langitnong Amahan mihimo og usa ka plano alang kanato aron moanhi sa yuta. (Tan-awa sa Abraham 3:24–25.)
Awit: “Ako Nasay[o]d Akong Amahan Buhi” (Songbook sa Mga Bata, 8)
Kalihokan: Basaha ang istorya sa kasulatan sa pahina 8. Dayon paghimo og pipila ka mga art nga gama sa bato! Pagpundok og lain-laing mga bato. Paghimo og usa ka talan-awon sa Langitnong Amahan, ni Jesus, ug kanimo sa wala pa kita moanhi sa yuta.
Mapasalamaton sa Dula sa Pagmemorya
Alang sa Genesis 1–2; Moises 2–3; Abraham 4–5
Istorya: Ang Langitnong Amahan misugo ni Jesukristo sa paglalang sa yuta alang kanato aron puy-an (tan-awa sa Genesis 1–2). Si Jesus milalang sa mga tanom ug mga hayop alang kanato aron amumahon. Kita mahimong magmapasalamaton alang sa yuta.
Awit: “Gihigugma Ako sa Langitnong Amahan” (Songbook sa mga Bata, 16)
Kalihokan: Karon dulaa ang usa ka dula! Ang unang tawo moingon nga, “Mapasalamaton ko sa …” ug dayon mosulti og butang nga gilalang sa Langitnong Amahan ug ni Jesus. Ang sunod nga tawo mosubli niini ug dayon magdugang og usa ka butang nga bag-o. Padayon sa paglibot kutob sa inyong mahimo.
Pagpasa sa Maayo nga Pagpili
Alang sa Genesis 3–4; Moises 4–5
Istorya:Didto sa Tanaman sa Eden, mipili si Eva nga mokaon sa bunga sa kahoy sa kahibalo. Siya mitanyag sa bunga ngadto ni Adan. Siya mipili usab sa pagkaon sa bunga. (Tan-awa sa Moises 4:12.) Human sila mikaon sa bunga, sila nakahibalo sa kalainan tali sa husto ug sayop.
Awit: “Pilia ang Matarung nga Paagi” (Songbook sa mga Bata, 82)
Kalihokan: Mag-alirong og lingkod ug ipasa ang bola sa palibot. Kon imong masalo ang bola, mosulti mahitungod sa usa ka maayo nga pagpili nga imong gihimo niining semanaha.
Basahon sa Pagpamatuod sa Pamilya
Istorya: Ang pamilya ni Adan ug ni Eva mihimo og usa ka “basahon sa handumanan” (Moises 6:5). Sila misulat mahitungod ni Jesukristo ug sa plano sa Langitnong Amahan. Kini nga basahon mao ang sinugdanan sa mga kasulatan.
Awit: “Ang Gugma Gipamulong Dinhi” (Songbook sa mga Bata, 102–03)
Kalihokan: Kamo makahimo usab og usa ka basahon sa handumanan! Hangyoa ang tanan sa inyong pamilya sa pagsulat sa ilang pagpamatuod ni Jesukristo. Dayon ilakip ang mga pahina aron mahimong usa ka basahon. Idugang kini ngadto sa inyong mga kahon sa bahandi diha sa pahina 30.
Pagpalig-on og Gugma
Alang sa Moises 7
Istorya: Si Enoch ug ang iyang mga katawhan mitukod og usa ka siyudad nga gitawag og Zion. Ang mga katawhan sa Zion mga matarong ug “sila usa sa kasingkasing ug sa hunahuna” (Moises 7:18). Kana nagpasabot nga sila naghigugma ug nag-atiman sa usag usa. Sila wala makig-away o mopasakit sa usag usa.
Awit: “Gugma sa Panimalay” (Mga Himno, nu. 184)
Kalihokan: Basaha ang Moises 7:19–21. Dayon pagtukod og siyudad gamit ang mga bloke, mga bato, o mga tukog. Samtang ikaw maghimo, hisgoti ang mahitungod kon unsaon nimo sa paghimo ang imong pamilya nga mas mahimong Zion. Mahimo nimong ipadala ang mga litrato sa imong nahuman nga siyudad ngadto sa ang Higala!
Mga paghulagway pinaagi ni Katy Dockrill