Dili Kaayo Nag-inusara
Kini nga istorya nahitabo sa Ecuador.
Nangandoy si Damián nga ang iyang pamilya magkadungan sa pag-adto sa simbahan.
Gitan-aw ni Damián ang iyang bakpak aron masusi nga siya aduna sa unsay iyang gikinahanglan. Pangsimba nga sinina? Tsek. Sapatos? Tsek. Basahon ni Mormon? Tsek. Iyang gisira ang iyang bakpak, gikabiba sa iyang abaga, ug mipadulong sa pultahan.
“Mamá!” Misangpit si Damián. “Moadto ko sa ilang Abuela [Lola] ug Abuelo [Lolo]!”
Si Mamá namilo sa mga tualya. “Siguroha nga makatabang sa imong mga apohan.” Siya mihunong aron mogakos ni Damián. “Nasayod ko nga gusto ka nga moadto sa simbahan uban nila. Ayo-ayo ugma.”
“Sige!” miingon si Damián. Apan nanghinaut ko nga makauban ka nako, siya naghunahuna.
Si Damián milakaw paingon sa hununganan sa bus. Matag Sabado, mosakay siya og bus gikan sa iyang lungsod sa Ecuador paingon ngadto sa balay ni Abuela ug Abuelo. Matulog siya og usa ka gabii uban kanila. Dayon mouban siya nila sa simbahan pagkasunod adlaw.
Sa Dominggo sa buntag, nag-ilis si Damián aron mosimba. Gibutonisan ang iyang pulo. Gisul-ob ang iyang sapatos. Dayon miadto sa simbahan uban ni Abuela ug Abuelo.
Ganahan si Damián sa simbahan. Ganahan siya mokanta sa mga awit ug moambit sa sakramento. Ganahan siya nga makakita usab sa iyang mga higala. Apan nangandoy siya nga ang tanan sa iyang pamilya uban kaniya.
Nianang hapona, si Damián, si Abuela ug Abuelo miadto sa balay nilang Brother ug Sister Ruiz. Mopahigayon sila og home evening. Si Abuela nagdala og usa ka bandihado nga flan alang sa panghinam-is [dessert].
Ang leksiyon mahitungod ni Jesus. Gikoloran ni Damián ang usa ka hulagway ni Jesus samtang siya naminaw ngadto sa leksiyon. “Si Jesus nakasabot sa tanan natong bation,” miingon si Brother Ruiz. “Bisan kon kita mobati og kaguol.”
Mitan-aw si Damián sa iyang hulagway ni Jesus. Nakapalipay kini kaniya nga si Jesus nasayod kon unsa ang iyang gibati.
Human sa panapos nga pag-ampo, miingon si Abuela, “nagdala ko og flan. Kinsay gusto?”
“Ako!” Miingon si Damián. Ang makrema, tam-is nga dessert mao ang paborito ni Damián! Ug si Abuela mihimo sa kinalamian nga flan.
Human sa home evening, giubanan ni Abuela si Damián ngadto sa hununganan sa bus aron makapauli na siya. Mitan-aw si Damian sa yuta.
“Aduna bay problema?” Nangutana si Abuela.
Nagmug-ot si Damián. “Maayo unta ang tanan sa akong pamilya miadto sa simbahan uban kanato.”
“Ako sab,” miingon si Abuela. Gigakos niya si Damian. “Apan gimahal kaayo ka sa imong pamilya. Ug ingon usab si Abuelo ug Ako ug daghan pa!”
Mihunong ang bus. Milingkod si Damián tungod sa bintana ug miwara-wara ngadto kang Abuela samtang milarga ang bus.
Naghunahuna si Damian mahitungod sa unsay gisulti ni Abuela. Naghunahuna siya mahitungod ni Mama ug sa iyang igsoong lalaki ug babaye. Nasayod siya nga gimahal siya nila. Dayon naghunahuna siya mahitungod sa iyang magtutudlo sa Primary. Ug ang pamilyang Ruiz. Ug nilang Abuela ug Abuelo. Silang tanan nagmahal usab kaniya.
Labaw sa tanan, nasayod si Damian nga ang Langitnong Amahan ug si Jesus nahigugma kaniya. Ug kana nakapahimo kaniya nga mobati nga dili kaayo nag-inusara
Mga paghulagway pinaagi ni Julissa Mora