Imong Sinulat
Kaisog gikan sa Espiritu Santo
Ako mihigda human nga gipahimutang ko ni mama sa higdaanan nianang gabhiona. Naghunahuna ko mahitungod sa pipila ka sekreto nga akong gitipigan. Ang akong hunahuna napuno sa kahasol sa tanlag. Dayon nakahinumdom ko sa pag-ampo. Samtang gibuhat nako, ang Espiritu Santo misulti nako nga makig-istorya sa akong mama mahitungod sa unsay anaa sa akong hunahuna.
Sa pipila ka rason, nagduha-duha ako nga makig-istorya sa akong mama mahitungod niini. Nasayod ko nga si Satanas naningkamot sa paghimo kanako nga mobati og kahadlok. Nasayod usab ako pinaagi sa Espiritu Santo nga ang pagpakig-istorya sa akong mama mao ang hustong butang nga buhaton.
Sa kataposan nakadawat ko og kaisog nga hangyoon ang akong mama kon mahimo ba ming mag-istoryahanay. Gisultihan nako siya mahitungod sa unsay akong nabuhat ug unsa ang akong gibati. Sa akong katingala, wala gayod siya masuko. Misulti siya nako kon unsa siya ka malipayon nga nagmaisugon ko sa pagpakig-istorya kaniya. Naggakos kami, ug nanghangyo kaniya sa pagpasaylo kanako. Gibati nako nga nahuwasan ug malipayon.
Ako nag-ampo pag-usab ngadto sa akong Amahan sa Langit ug mihangyo Kaniya sa pagpasaylo kanako usab. Nindot kaayo ang pamati nga mosunod sa Espiritu ug mobuhat sa unsay matarong. Mapasalamaton ako ni Jesus, nga mihimo niini aron ako makahinulsol kon ako makahimo og sayop. Mapasalamaton usab ko alang sa Espiritu Santo, kinsa mitabang kanako nga mobati og mas maayo. Ug ako mapasalamaton alang sa usa ka mahigugmaon nga mama kinsa naminaw ug nakasabot kanako.
Mga paghulagway pinaagi ni Adam Howling