Ko e Hiva ʻOku Manako Taha ai ʻa Fātimá
Naʻe punopuna atu ʻa Fātima ʻi he halá. Naʻá ne lue ki ʻapi mo Mamá mei he akó. Naʻá ne ngūnguuʻi ha foʻi hiva lolotonga ʻene punopuná.
Naʻe pehē ʻe Fātima, “Naʻe kole mai ʻe Miss Lōpesi ke mau ako ha foʻi hiva. Te ke lava nai ʻo akoʻi mai ha foʻi hiva?”
Ne malimali pē ʻa Mamá. “ʻIo!”
ʻI heʻena aʻu ki ʻapí, naʻe hivaʻi fakataha ʻe Mamá mo Fātima ha ngaahi foʻi hiva. Naʻá na hivaʻi ha ngaahi foʻi hiva lahi. Ka naʻe teʻeki ai ke na hivaʻi e foʻi hiva naʻá ne manako taha aí.
“ʻE lava nai ke u hivaʻi ha foʻi hiva Palaimeli?” Ko e fehuʻi ange ia ʻa Fātimá.
“ʻIo,” ko e tali ange ia ʻa Mamá.
Naʻe hivaʻi ʻe Fātima ʻa e “Ko e Fāmilí ke Taʻe Ngata.” Naʻá ne akoako ʻa e ngaahi leá mo Mamá. Naʻá ne hivaʻi toko taha leva ia. Naʻá ne hivaʻi ia kae ʻoua leva kuo tonu kotoa ʻene maʻu ʻa e ngaahi leá.
ʻI he akó, naʻe fiefia ʻa Fātima ke vahevahe ʻene foʻi hivá mo ʻene kalasí.
“ʻOku fie vahevahe nai ʻe ha taha ʻene hivá?” Ko e lea ange ia ʻa Miss Lōpesí.
Naʻe hiki hake ʻe Fātima hono nimá. “Te u fakahoko ia!”
Naʻá ne tuʻu hake mo malimali. [“ʻOku ʻi heni hoku fāmilí ʻi māmani. ʻOku nau angalelei kiate au,”] ko ʻene hivá ia.
Lolotonga e hiva ʻa Fātimá, naʻá ne ongoʻi fiefia. Pea naʻá ne manatuʻi ʻa e foʻi hivá kotoa! Naʻe pasipasi ʻa e tokotaha kotoa pē ʻi heʻene kalasí.
Hili e kalasí, naʻe haʻu ʻa Mamá ke ʻave ʻa Fātima. Naʻe talanoa ʻa Miss Lōpesi kia Mamá.
“Naʻá ne hivaʻi ha foʻi hiva fakaʻofoʻofa. Pea naʻe hangē naʻe ʻikai ke ne ilifiá.
Naʻe malimali ʻa Fātima. Pea pehē pē foki mo Mamá.
“ʻOku mau hivaʻi ha ngaahi hiva fakaʻofoʻofa he uike kotoa pē ʻi he lotú!” Ko Fātima ange ia.
Naʻe talaange ʻe Mamá, “Te ke lava ʻo haʻu mo kimautolu ʻi ha faʻahinga taimi pē.”
Naʻe malimali ʻa Miss Lōpesi. “Mālō ʻaupito.”
Naʻe hiva ʻa Fātima ʻi heʻene lue ki ʻapi mo Mamá. Naʻá ne saiʻia ke vahevahe ha foʻi hiva mo ʻene kalasí. Naʻá ne ongoʻi fiefia ʻi heʻene hivá.
Ngaahi tā fakatātā ʻa Alessia Girasole