Ko e Taumuʻa Fisifisimuʻa
Naʻe ʻikai faʻa tatali ʻa Tēvita ke ʻalu ki he Temipale Dubai ʻi ha ʻaho.
Naʻe ʻai ʻe Tēvita ha meʻi kulū ki ha foʻi kiupi suka. Naʻá ne fokotuʻu fakalelei leva ia.
“Mālie!” Ko e Faʻeé ange ia. “ʻOku fakaofo hoʻo temipale kiupi-suká.”
“Mālō!” Ko Tēvita ange ia. “Ko e Temipale Dubai. ʻOku ʻikai ke u faʻa tatali ke ʻosi ʻa e temipale moʻoní.”
Naʻe fiefia ʻa Tēvita talu mei hono fanongonongo ʻe Palesiteni Nalesoni ha temipale foʻou [ke langa] ʻi he fonua naʻá ne (Tēvita) nofo aí. Naʻe maʻu ʻe he Ngaahi Fonua Fakatahataha ʻo ʻAlepeá ha niʻihi ʻo e ngaahi fale māʻolunga taha ʻi he māmaní. Ka naʻe teʻeki ai ke ʻi ai ha temipale—ia ʻi ai. Ko e fuofua temipale ʻeni ʻi he Hahake Lotolotó kotoa.
Naʻe fakapipiki ʻe Tēvita ʻa e kiʻi kiupi suka fakaʻosí ki heʻene temipalé. Naʻá ne pehē mai, “Ko ʻEna! ‘Osi kotoa.”
Naʻe kiʻi punou hifo ʻa e Faʻeé ke sio lelei ange. “Tōatu ʻaupito! Ko e fē feituʻu ʻoku totonu ke tau tuku ki aí?”
Naʻe fakakaukau ʻa Tēvita. “Fēfē ʻi hoku lokí? Hoko atu ki heʻeku ngaahi lēlué.” Naʻe saiʻia ʻa Tēvita ʻi he ngaahi lēlué. Naʻá ne fie hoko ko ha ʻenisinia lēlue ʻi ha ʻaho.
Naʻe pehē ange ʻe he Faʻeé, “Ko ha fakakaukau lelei ia.”
Naʻe toʻo fakalelei ʻe Tēvita ʻene kiʻi temipale kiupi-suká ki hono lokí. Naʻá ne tuku lelei hifo ia ʻi he tafaʻaki ʻo ʻene ngaahi lēlué. Naʻe ʻikai ke ne faʻa tatali ke fakaʻaliʻali ki hono ngaahi tuofafiné mo e tangataʻeikí.
ʻI he ʻaho hono hokó, naʻe ʻaʻahi mai e mehikitanga ʻo Tēvita ko ʻAná. Naʻá na talanoa ki he ngaahi meʻa naʻá ne ʻamanaki lelei taha ki aí. Naʻá ne fakakaukau leva ki ha meʻa.
“ʻOkú ke fie ʻilo nai ki he meʻa ʻoku ou fiefia taha aí?” Ko e fehuʻi ange ia ʻa Tēvitá.
“ʻIo!” Ko e lea ange ia ʻa e mehikitanga ko ʻAná.
“ʻOku langa ʻe he siasi ʻoku ʻalu ki ai hoku fāmilí ha temipale ʻi Tupai!”
Naʻe malimali ʻa e Mehikitanga ko ʻAná. “ʻOku ongo makehe ʻaupito ia.”
“Ko ia!” Ko Tēvita ange ia. “ʻI he taimi ní, ʻoku ʻikai ha temipale ia homau siasí ʻe ofi mai, ko ia ʻoku mau ʻalu ai ki ha temipale ʻi Suisalani pe Siamane. ʻOku ou fiefia ʻe ofi mai ha temipale kiate kitautolu. Kuó u fokotuʻu ha taumuʻa ke u teuteu ke ʻalu ki ai.”
“Meʻa fakafiefia moʻoni!” Ko e lea ange ia ʻa e Mehikitanga ko ʻAná. “Ko e hā ʻa e meʻa ʻokú ke fai ke teuteu aí?”
Naʻe pehē ʻe Tēvita, “ʻOku ou lotu mo lau e folofolá. Pea ʻoku ou feinga ke muimui kia Sīsū Kalaisi. Pea te u mateuteu leva ke ʻalu ki he temipalé!”
Naʻe pehē ange ʻe he Mehikitanga ko ʻAná, “Meʻa fakaʻofoʻofa moʻoni. ʻOku ou tui te ke ngāue mālohi ke aʻusia hoʻo ngaahi taumuʻá.”
“Te u fakahoko ia!” Naʻe kamokamo fiefia ʻa Tēvita. Naʻe ongo fakafiefia ke vahevahe ha meʻa naʻe fuʻu mahuʻinga kiate ia.
ʻI he pō ko iá, naʻe kole ange ʻe Tēvita pe te ne lava ʻo ʻave ʻene temipale kiupi-suká ki peito.
“ʻOku ou fie tauhi ia ʻi ha feituʻu ʻe lava ke tau sio maʻu pē ki ai. ʻOku ou fie maʻu ke u manatuʻi ke kei teuteu pē ki he temipalé.”
Ne pehē ange ʻe he Tangataʻeikí, “Ko ha fakakaukau lelei ia. ʻOku ou tui ʻe tokoniʻi foki au ʻe heʻeku sio ki hoʻo temipalé he ʻaho kotoa pē.”
Naʻe tokoni ʻa e Tangataʻeikí kia Tēvita ke ʻave ʻa e temipale kiupi-suká ki he peitó.
Naʻe pehē ange ʻe he tuofefine ʻo Tēvita ko Kataliná, “ʻOku ʻasi fakaʻofoʻofa.”
“ʻI he taimi ʻe ʻosi ai ʻa e Temipale Dubai moʻoní, ʻe lava nai ke u fakaafeʻi hoku ngaahi kaungāmeʻá ke nau haʻu ʻo mamata ki ai?” Ko e fehuʻi ange ia ʻa Tēvitá.
Naʻe kamokamo ange ʻa e Fineʻeikí. “Ko ha fakakaukau lelei ia!”
“Pea mo e Mehikitanga ko ʻAná?”
“ʻIo,” ko e Tangataʻeikí ange ia.
Naʻe malimali ʻa Tēvita. Naʻá ne ʻosi houngaʻia ʻaupito koeʻuhí ko e Temipale Dubai!
Tā fakatātā ʻa Mark Robison