Kaumeʻa ki he Kaumeʻa
Taukaveʻi e Meʻa ʻOkú Ke Tui Ki Aí
Fai ʻe ʻEletā James R. Rasband
ʻO e Kau Fitungofulú
Mei ha ‘initaviu mo Sydney Squires.
ʻI heʻeku tupu haké, naʻe talanoa mai ʻeku faʻeé kiate au fekauʻaki mo e ongoongoleleí. Naʻá ne talanoa fekauʻaki mo ia ʻi he ʻaho kotoa pē, kae ʻikai ʻi he Sāpaté pē. Naʻá ne saiʻia ʻi he ngaahi talanoa mei he Fuakava Motuʻá.
Ko e talanoa ʻoku ou manako taha aí ko e talanoa ʻo Tēvita mo Kolaiaté. Ko ha tauhisipi kei talavou pē ʻa Tēvita. Ko ha sōtia lahi mo mālohi ʻa Kolaiate. ʻI he taimi naʻe ʻalu ai ʻa Tēvita ke tau mo Kolaiaté, naʻe ʻikai tui ʻe Tēvita ha teunga tau. Ko ʻene meʻataú pē ko e maka-tā ke lisingi ʻaki ha fanga kiʻi foʻi maka.
Ka naʻe taukaveʻi ʻe Tēvita ʻa e meʻa naʻá ne tui ki aí. Naʻe ʻikai ke ne tuenoa. Naʻe ʻiate ia ʻa e mālohi ʻo e ʻOtuá. Naʻá ne ikunaʻi ʻa Kolaiate.
Naʻe saiʻia ʻeku faʻeé ke talamai kiate au ʻa e meʻa naʻe lea ʻaki ʻe Tēvita kia Kolaiaté: “ʻOkú ke haʻu kiate au ʻaki ʻa e heletā, mo e tao, pea mo e pā: ka ʻoku ou ʻalu atu kiate koe ʻi he huafa ʻo [e ʻEiki] ʻo e ngaahi kau taú” (1 Samuela 17:45). Naʻá ku ʻiloʻi naʻe falala ʻeku faʻeé ʻe ʻiate kimaua ʻa e ʻOtuá. Te Ne tokoniʻi kimaua neongo te ma fehangahangai mo e ngaahi faingataʻa lahi ʻo hangē ko Kolaiaté.
Ko ha lēsoni mahuʻinga ʻeni kiate au. ʻI he feituʻu ne u tupu hake aí, ne u faʻa hoko maʻu pē ko e mēmipa pē ʻe toko taha ʻo e Siasí ʻi he akó, ʻi heʻeku ngaahi timi sipotí, pe hoku ngaahi kaungāmeʻá. Koeʻuhí ko e ngaahi meʻa ne u tui ki aí, naʻe kehe ʻeku leá mo e tōʻongá mei he tokolahi ʻo hoku ngaahi kaungāmeʻá. Naʻe iku ʻeni ki ha ngaahi fepōtalanoa ʻaki lahi mo hoku ngaahi kaungāmeʻá fekauʻaki mo e Siasí. Naʻe fakaʻapaʻapaʻi au ʻe hoku ngaahi kaungāmeʻa mamaé. Naʻe fakamataliliʻi au ʻe he kakaí ʻi he taimi ʻe niʻihi. Ka naʻe ʻikai ke u teitei fakamāʻia ʻi he ngaahi meʻa naʻá ku tui ki aí. Naʻá ku laukau ʻaki ʻeku taukaveʻi ha meʻá.
Te tau kehe pē ʻi he taimi ʻoku tau moʻui ʻaki ai ʻa e ongoongoleleí. Naʻe pehē ʻe he ʻAposetolo ko Pitá te tau “makehe” (1 Pita 2:9). Pea ʻoku sai pē ia. ʻOku ʻikai fie maʻu ke tau hohaʻa ki heʻetau kehé ʻi he taimi ʻoku tau taukaveʻi ai e meʻa ʻoku tau tui ki aí.
Tā fakatātā ʻa Jared Beckstrand