Ngaahi ʻEkitivitī ki he Haʻu, ʻo Muimui ʻIate Aú
Ako e folofolá pe fakahoko ha meʻa fakafiefia ʻi he efiafi ʻi ʻapí!
Ko e Kihiʻi Leʻo Siʻi
Maʻá e 1 Ngaahi Tuʻi 17–19
Talanoá:Ko ʻIlaisiaá ko ha palōfita. Naʻá ne ʻilo ʻoku folofola mai ʻa e Laumālie Māʻoniʻoní ʻi ha kihiʻi leʻo siʻi. Te ke lava ʻo lau ʻa e talanoa ko ʻení ʻi he peesi 8 pe ʻi he 1 Ngaahi Tuʻi 19:11-12.
Hiva: “Ko e Laumālie Māʻoniʻoní” (Tohi Hiva ʻa e Fānaú, 56)
ʻEkitivitī: ʻAi ke tangutu ʻa e tokotaha kotoa ʻi ha laine. ʻOku fanafana atu e tokotaha ʻuluakí ha ngaahi foʻi lea ki he tokotaha hokó. ʻE fanafana ʻe he tokotaha takitaha ʻa e ngaahi leá ki he tokotaha hokó. ʻOku tala ʻe he tokotaha fakamuimui tahá ki he tokotaha kotoa pē ʻa e meʻa ne nau fanongo ki aí. Ko e hā te ke lava ʻo fai ke ke fanongo lelei ange ai ki he Laumālie Māʻoniʻoní?
Ko Neamani mo e Maná
Maá e 2 Ngaahi Tuʻi 2–7
Talanoá: Naʻe puke ʻa Neamani ʻi he mahaki ko e kiliá. Naʻe talaange ʻe he palōfita ko ʻIlaisá kiate ia ke ne kaukau tuʻo fitu ʻi he Vaitafe Soataní ke fakamoʻui ia. ʻI he kamataʻangá, naʻe ʻikai ke fie fakahoko ia ʻe Neamani. Ka ʻi he taimi naʻe fai ai ʻe Neamani ʻa e meʻa naʻe lea ʻaki ʻe ʻIlaisá, naʻe fakamoʻui ia! (Vakai, 2 Ngaahi Tuʻi 5.)
Hiva: “Te u Talangofua Leva”(Tohi Hiva ʻa e Fānaú, 71)
ʻEkitivitī: Ngaohi pe tā ha vaitafe fakangalingali ʻo fakaʻaongaʻi ha ngaahi foʻi maka, vaʻakau, sioka, pe sipi kafu. Hili iá peá ke puna tuʻo fitu ʻi hoʻo vaitafé. Talanoa fekauʻaki mo e founga ʻe lava ke tokoniʻi ai kitautolu ʻi hono fai e ngaahi meʻa faingofua ʻoku kole mai ʻe he ʻOtuá ke tau faí.
ʻE Lava ke Tokoniʻi Au ʻe he Folofolá
Maʻá e 2 Ngaahi Tuʻi 17–25
Talanoá: Naʻe angatonu ʻa e Tuʻi ko Sosaiá. ʻI he taimi naʻe maʻu ai ʻa e ngaahi folofola naʻe molé, naʻá ne lau ia ki hono kakaí. Naʻá ne palōmesi ke tauhi ʻa e ngaahi fekaú. (Vakai, 2 Ngaahi Tuʻi 23:2–3.)
Hiva: “Fekumi, Fifili pea mo Lotu” (Tohi Hiva ʻa e Fānaú, 66).
ʻEkitivitī: Hiki, tā, pe fakatātaaʻi ha talanoa fakafolofola ʻi he Fuakava Motuʻá ʻokú ke saiʻia aí. Kuo tokoniʻi fēfē nai koe ʻe he talanoa ko ʻení? Talanoa ki he ʻuhinga ʻoku mahuʻinga ai ʻa e folofolá.
Faʻu ha Temipale
Maʻá e ʻĒsela 1; 3–7; Nehemaia 2; 4–6; 8
Talanoá: Naʻe fakaʻauha ʻa e temipale ʻi Selusalemá. Hili ha ngaahi taʻu mei ai, naʻe toe langa ia ʻe he kakaí. Naʻa nau fiefia ʻaupito! Naʻa nau “fakafetaʻi ki he ʻEikí” mo “kalanga leʻo-lahi ʻi he fiefia” (ʻĒsela 3:11, 12).
Hiva:Fie Siofia Ha Temipale” (Tohi Hiva ʻa e Fānaú, 99)
ʻEkitivitī: Pelu ua ha laʻipepa. Tā pe fakapipiki ha fakatātā ʻo e temipalé ʻi muʻa. Hili iá pea fakaava ʻa e laʻipepa naʻe pelú pea tā pe fakapipiki ha tā ʻoʻou ʻi loto. Hiki ʻa e ngaahi foʻi lea, “Te u hū ki loto ʻi ha ʻaho.” Talanoa fekauʻaki mo e founga ʻe lava ke tau fiefia ai ʻi he ʻalu ki he temipalé.
Ko ʻĒseta mo e Tuʻí
Maʻa ʻĒseta
Talanoá: Naʻe mali ʻa Kuini ʻĒseta mo e tuʻi ʻo Papiloné. Naʻe feinga ha tangata ke kākaaʻi ʻa e tuʻí ke tamateʻi hono (ʻĒseta) kakaí, ʻa e kau Siú. Naʻe fie maʻu ʻe ʻĒseta ke tokoni ki hono kakaí. Naʻá ne kole ange ke nau ʻaukai mo lotua ia. ʻI he taimi naʻe lea ai ʻa ʻĒseta ki he tuʻí, naʻá ne (tuʻí) palōmesi ange ʻe hao pē ʻa e kau Siú.
Hivá:ʻOku Moʻui ʻEku Tamaí” (Tohi Hiva ʻa e Fānaú, 8)
ʻEkitivitī: Huke ki he peesi 16 pea kosi ʻo toʻo ʻa e fanga kiʻi tamapuá ke tui ʻi he louhiʻinimá. Fakaʻaongaʻi leva ʻa e ʻū tamapua ke tui ʻi he louhiʻinimá ke fai ʻaki e talanoa ʻo ʻĒsetá.
Ngaahi tā fakatātā ʻa Katy Dockrill