Ko e Kau Paionia ʻi he Fonua Kotoa Pē
Ko e Fekumi Fuoloa a Maikoló
Naʻe fifili ʻa Maikolo pe ko e fē ʻa e siasi ʻoku moʻoní.
Naʻe ʻai ʻe Maikolo ʻene kató ʻi hono umá. Ko e ʻuluaki ʻaho ia ʻo e akó, pea naʻe ʻikai ke ne faʻa tatali! Naʻá ne nofo mo hono fāmilí ʻi ʻInitia. Naʻe tokolahi ha fānau ʻi hono koló ne ʻikai ke nau lava ʻo ʻalu ki he akó. Naʻe houngaʻia ʻa Maikolo ʻi heʻene maʻu e faingamālie ke akó.
Naʻá ne saiʻia he akó—tautautefito ki he fiká. Naʻá ne saiʻia foki ʻi hono lau e ngaahi makasiní. Naʻá ne huke hake ʻa e ʻū lauʻi peesi lanu kehekehé. Naʻá ne lau ʻo kau ki ha fanga monumanu mo ha ngaahi feituʻu kehekehe ʻi he funga ʻo e māmaní.
ʻI ha ʻaho ʻe taha naʻe lau ai ʻe Maikolo ha faʻahinga makasini kehe. Ko e makasini mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe saiʻia ʻa Maikolo ʻi hono laú. Naʻá ne fie ako lahi ange.
Naʻe ʻalu ʻa Maikolo ki he ngaahi siasi kehé kimuʻa. Naʻá ne saiʻia ke ako ʻo kau kia Sīsuú. Ka naʻá ne ongoʻi puputuʻu he taimi ʻe niʻihi. Ko e siasi fē ʻa e siasi moʻoní?
Naʻá ne lau kimui ange ha kiʻi tohi fekauʻaki mo e palōfita ko Siosefa Sāmitá. Naʻá ne ongoʻi ha meʻa makehe ʻi heʻene lau iá. Naʻe ʻalu foki ʻa Siosefa Sāmita ki he ngaahi siasi kehekehe ʻo fekumi ki he moʻoní. Naʻe fakakaukau ʻa Maikolo, mahalo pē ʻoku ou hangē ko Siosefá.
Naʻe fie ʻalu ʻa Maikolo ki he siasi foʻou ko ʻení ke vakaiʻi pe ʻoku fēfē. Ka naʻe ʻikai ke ʻi ai ha ngaahi siasi ʻo e Kau Māʻoniʻoni ʻi he Ngaahi ʻAho Kimui Ní ʻi ʻInitia. Naʻe loto-mamahi ʻa Maikolo. Naʻá ne hokohoko atu hono ako e meʻa kotoa naʻá ne lavá. Naʻá ne lau ‘a e Tohi ʻa Molomoná mo lotu. Naʻá ne ʻiloʻi ʻoku moʻoni ia! Naʻá ne fie papitaiso. Ka naʻe pau ke ne tatali.
Ne ʻosi mei ai ha ngaahi taʻu. ʻI he taʻu 21 ʻa Maikoló, naʻe haʻu ha ongomātuʻa faifekau matuʻotuʻa ki ʻInitia. Ne faifai pea papitaiso ʻa Maikolo! Naʻe ʻikai fuoloa kuó ne lava ʻo ngāue fakafaifekau ʻi ʻIutā, USA.
Naʻe ʻosi mei ai mo ha ngaahi taʻu lahi. Naʻe tā ange hano kaungāmeʻa ʻi ha ʻaho ʻe taha. Naʻe kumi ʻe he Siasí ha kakai ke tokoni ki hono liliu ʻo e konifelenisi lahí maʻá e kakai ʻi ʻInitiá. Naʻe manavasiʻi ʻa Maikolo ʻi he kamataʻangá. Ka naʻá ne fiefia ke tokoni.
ʻI ha hoʻatā ʻe taha ʻi ʻOkatopa naʻe liliu ai ʻe Maikolo ha lea naʻe fai ʻe Palesiteni Nalesoni ʻi he konifelenisi lahí. Naʻá ne fanongo ki hono fanongonongo ʻe he palōfitá ʻe langa ha temipale ʻi ʻInitia! Naʻe fie kaila fiefia ʻa Maikolo. Naʻá ne tangi ko e loʻimata ʻo e fiefia.
Naʻe houngaʻia ʻa Maikolo ʻi he meʻa kotoa naʻá ne ako ʻi he ʻapiakó. Ka ko e meʻa lahi tahá, ko ʻene houngaʻia ʻi heʻene ako fekauʻaki mo e ongoongolelei ʻo Sīsū Kalaisí. Naʻá ne fiefia he ʻe tokolahi ange ʻa e kakai ʻi hono fonuá te nau lava ʻo ako kau kiate Ia foki!
ʻE vavé ni pē ha ʻi ai ha temipale ʻi ʻInitia!
ʻOku lahi hake ʻi he lea fakafonua fakaʻofisiale ʻe 20 ʻi ʻInitia.
ʻOku ʻi ai ha misiona ʻe ua ʻi ʻInitia he ʻahó ni.
Ko e meʻakai ʻoku saiʻia taha ai ʻa Maikoló ko e biryani (laise mo e kakanoʻi manu ne ngaohi ʻaki e sipaisí).
Ko e talanoa fakafolofola ʻokú ne manako taha aí ko e talanoa kia Siosefa ʻi he Fuakava Motuʻá.
ʻI he ʻaho ní, ʻoku tokoni ʻa Maikolo ki hono liliu ʻo e konifelenisi lahí maʻá e kakai ʻi ʻInitiá.
Tā fakatātā ʻa Oriol Vidal