ʻApiako Foʻou, Kaungāmeʻa Foʻou
ʻOku lava fēfē nai ke fakakaungāmeʻa ʻa ʻAita lolotonga iá ʻoku ʻikai ke ne poto lea faka-Siaina?
Naʻe pehē ʻe ʻAita, “ʻOku ou ilifia.” Ko hono ʻuluaki ʻaho ia ʻi he akó ʻi Taiuani. Ka naʻe ʻikai ke ne poto he lea faka-Siaina ʻo hangē ko e fānau ako kehé. ʻE lava fēfē nai ke ne fakakaungāmeʻá? Ko hai te ne vaʻinga mo ia ʻi he taimi mālōloó?
Naʻe fāʻofua ʻa e Fineʻeikí kia ʻAita. “ʻOku SAI pē ke ilifia”.
Naʻe fakafulofula ʻa ʻAita. “ʻOku ʻikai ke u ʻilo e founga ke fakakaungāmeʻa ai hení.”
Naʻe toe fāʻofua ange ʻa e Fineʻeikí kiate ia. “Kapau te ke manavasiʻi, mahalo te ke lava ʻo fakakaukau ki ha foʻi hiva Palaimeli. ʻE tokoni nai ia?”
Naʻe kamokamo pē ʻa ʻAita. Naʻá ne lue leva mo e Fineʻeikí ki hono lokiakó. Naʻe talitali mai ʻene faiakó kiate ia. Naʻe pehē ange ʻa e faiakó, “ Ni hao!” Naʻe feinga ʻa ʻAita ke ne malimali. Naʻe ʻikai ke ne ʻilo e ʻuhinga ʻo e ngaahi lea ko iá.
Naʻe lea māvae ʻa ʻAita ki he Fineʻeikí. Naʻá ne maʻu leva ha tesi peá ne tangutu ki lalo.
Naʻá ne sio ki he fānau kehé. Naʻe fepōtalanoa hanau niʻihi. Naʻe tangutu fakalongolongo pē ʻa e toengá ʻo hangē ko ʻAitá. Naʻe manavasiʻi ʻa ʻAita. Naʻá ne ongoʻi hangē naʻe mumuhú ʻa e fanga honé ʻi hono keté.
Naʻe sio atu leva ʻa ʻAita ki ha kiʻi taʻahine naʻe tangi. Naʻe fie tokoniʻi ia ʻe ʻAita. Ka ʻe lava fēfē nai ke ne tokoni lolotonga iá naʻe ʻikai ke poto he lea faka-Siainá? Fēfē nai kapau naʻe ʻikai fie maʻu tokoni ʻa e taʻahiné?
Ka naʻe fakahoko ʻe ʻAita e meʻa naʻe lea ʻaki ʻe he Fineʻeikí. Naʻá ne fakakaukau ki he fakalea ʻo e hiva Palaimeli ʻokú ne saiʻia taha aí: “Ke mou feʻofaʻaki [ʻo hangē ko e ʻofa ʻa Sīsū ʻiate kimoutolú.]” Naʻe ʻiloʻi ʻe ʻAita naʻe kole ange ʻe he Laumālie Māʻoniʻoní ke ne tokoni.
Naʻe tangutu ʻa ʻAita he tafaʻaki ʻo e kiʻi taʻahiné. Naʻá ne puke mai ʻa e kiʻi taʻahine kiate ia. Hili iá naʻá ne tātaaʻi hono tuʻá ʻo hangē ko e meʻa naʻe fai ʻe he Fineʻeikí ʻi he taimi naʻe loto mamahi ai ʻa ʻAitá. Naʻe tuku e tangi ʻa e kiʻi taʻahiné! Naʻá ne fāʻofua kia ʻAita.
Naʻe tuhu pē ʻa ʻAita kiate ia. “ʻAita.”
Naʻe tuhu pē ʻa e kiʻi taʻahiné kiate ia. Naʻá ne pehē ange, “Mei.”
Naʻe malimali ʻa ʻAita. Naʻá ne tangutu ʻi he tafaʻaki ʻo Meí ʻi he toenga ʻo e ʻahó. Neongo naʻe ʻikai ke na lea ʻaki ʻa e lea fakafonua tatau, ka naʻá na fiefia fakataha. Naʻá na maʻu meʻatokoni hoʻatā fakataha. Naʻá na vaʻinga fakataha ʻi he mālōlō siʻí. Pea naʻe tokoni ʻa Mei ke ako ʻe ʻAita ha ngaahi lea foʻou ʻi he lea faka-Siainá!
Naʻe ʻikai faʻa tatali ʻa ʻAita ke talanoa ki he Fineʻeikí fekauʻaki mo hono kaungāmeʻa foʻoú. Naʻá ne ʻilo kapau te ne muimui kia Sīsū, he ʻikai ke ne ilifia ʻi ha faʻahinga meʻa.
ʻŪ tā fakatātā ʻa Shawna J. C. Tenney