ʻAʻahi ki he Temipalé

ʻOku fēfē ʻa e loto temipalé? Vakai ki loto ʻi he Temipale Rio de Janeiro Brazil ke ke ʻilo ai. Ko e temipalé ko ha feituʻu ia ʻoku maʻu ai ʻe he kakaí ʻa e ngaahi ouaú (ngaahi ngāue toputapu pe ngaahi ouau ʻoku fakahoko ʻaki e mafai ʻo e lakanga fakataulaʻeikí, hangē ko e papitaisó).

Tesi Lekomení

ʻI hoʻo hū ki he temipalé, ʻe talitali koe ʻe ha tokotaha ngāue tokoni. Kapau ʻokú ke ʻi ai ke papitaiso mo hilifakinima maʻá e niʻihi kehé, te ke fakaʻaliʻali hoʻo lekomeni temipale pepá. ʻOkú ne fakahaaʻi ʻokú ke mateuteu ke hū ki he loto temipalé. Te ke lava ʻo maʻu ha lekomeni mei hoʻo pīsopé pe palesiteni fakakoló ʻi he taʻu ʻoku hoko ai ho taʻu 12.

Faiʻanga Papitaisó

ʻE lava ke papitaiso koe ʻi he temipalé maʻa hoʻo ngaahi kuí mo e niʻihi kehe kuo pekia ne teʻeki ke papitaisó. ʻE lava foki ke hilifakinima koe maʻanautolu ke nau lava ʻo maʻu ʻa e meʻafoaki ʻo e Laumālie Māʻoniʻoní.

Loki Ouaú

Te ke ako lahi ange heni ki he palani ʻo e fiefia ʻa e Tamai Hēvaní mo ʻEne taumuʻa maʻatautolú ʻi he māmaní. ʻE lava ke ke haʻu ki heni ʻi ha ʻaho ke fakahoko ha ngaahi fuakava, pe ngaahi palōmesi makehe mo Ia.

Loki Silesitialé

Ko e loki fakaʻofoʻofa mo nonga ko ʻení ko ha feituʻu ia ke lotu mo fakakaukau ai ki he ngaahi meʻa ʻoku mahuʻinga taha ʻi hoʻo moʻuí. ʻOkú ne fakamanatu mai kiate kitautolu ʻa e tuʻunga ʻe ʻi ai hotau ʻapi fakalangí.

Loki Silá

ʻE lava ke mali ʻo taʻengata ha husepāniti mo ha uaifi ʻi he lokí ni. ʻOku ui ʻeni ko e sila. ʻOku tūʻulutui ha ongomeʻa mali ʻi he ʻōlitá ke silaʻi kinaua. ʻE lava foki ke silaʻi heni ʻa e fānaú ki heʻenau mātuʻá kapau naʻe ohi pe fāʻeleʻi kinautolu kimuʻa pea toki silaʻi honau fāmilí.