Dali, Sunod Kanako nga mga Kalihokan
Alang sa home evening [gabii sa pamilya], pagtuon sa kasulatan, o kalingawan lamang!
Craft sa Pagpamatuod
Alang sa Job 1–3; 12–14; 19; 21–24; 38–40; 42
Istorya: Maayong tawo si Job. Dayon nawad-an siya sa tanan nga anaa niya—iyang kahayopan, iyang mga anak, ug iyang kahimsog. Naguol siya, apan gihuptan niya ang iyang hugot nga pagtuo kang Jesukristo. Miingon siya, “Ako nasayod nga ang akong Manluluwas buhi” (Job 19:25). Ang Ginoo mipanalangin kang Job alang sa iyang hugot nga pagtuo.
Awit: “Buhi ang Akong Manunubos” (Mga Himno, nu. 79)
Kalihokan: Paghimo og koleksiyon sa mga hulagway [collage] nga magpakita sa inyong hugot nga pagtuo. Pangita diha sa karaan nga mga magasin sa Simbahan ug guntinga ang mga hulagway sa unsay inyong gituohan, sama kang Jesus, ang templo, o ang mga kasulatan. Dayon ipapilit kini ngadto sa usa ka piraso nga papel ug isab-it kini.
Pagsulat og usa ka Salmo
Alang sa Mga Salmo 1–2; 8; 19–33; 40; 46
Istorya: Ang mga tawo diha sa Biblia nagsulat og mga awit ug mga balak aron sa pagdayeg sa Dios. Mabasa nato kini diha sa basahon sa Mga Salmo. Nagtudlo kini kanato nga mosalig kang Jesukristo.
Awit: “Tudloi Ko Paglakaw sa Kahayag” (Songbook sa mga Bata, 70)
Kalihokan: Basaha ang istorya sa kasulatan sa pahina 8. Dayon pagsulat og inyong kaugalingon nga awit o balak nga nagdayeg sa Dios! Ang kalihokan sa pahina 12 makatabang kaninyo sa pagsugod.
Mga Istorya sa Pag-ampo
Alang sa Mga Salmo 49–51; 61–66; 69–72; 77–78; 85–86
Istorya: Pipila sa Mga Salmo susama sa mga pag-ampo ngadto sa Dios. Diha sa Salmo 86:7, si David nag-ingon, “Gisangpit ko ikaw sa panahon sa kalisdanan kay motubag ka man sa akong mga pag-ampo.” Si David nagtudlo kanato nga ang Langitnong Amahan motubag sa atong mga pag-ampo.
Awit: “Ampo sa usa ka Bata” (Songbook sa mga Bata, 6–7)
Kalihokan: Basaha ang istorya sa pahina 36. Pagsugilon mahitungod sa usa ka panahon sa dihang natubag ang inyong pag-ampo. Isulat kini o pagdrowing og hulagway sa inyong istorya. Dayon ipadala kini kanamo sa ang Higala! Tan-awa ang luyo nga hapin aron mahibalo kon unsaon.
Tag-ana kon si Kinsa?
Alang sa Mga Salmo 102–103; 110; 116–119; 127–128; 135–139; 146–150
Istorya: Diha sa Salmo 139:1–3, si David nagtudlo kanato nga ang Langitnong Amahan ug si Jesus nahigugma kanato ug nakaila sa matag usa kanato.
Awit: “Gibati Ko ang Gugma sa Akong Manluluwas,” (Songbook sa mga Bata, 42–43)
Kalihokan: Isulat ang ngalan sa matag tawo diha sa usa ka gamay nga piraso sa papel ug ibutang kini diha sa usa ka kahon o panaksan. Mohulbot ang usa ka tawo og ngalan. Magpuli-puli ang matag tawo sa pagpangutana og oo o dili nga mga pangutana hangtod adunay tawo nga makatagna sa ngalan. Paghisgot mahitungod kon sa unsang paagi ang Langitnong Amahan nakaila kanato—sa atong ngalan, unsay ganahan natong buhaton, ug sa tanan mahitungod kanato.
Mga paghulagway pinaagi ni Katy Dockrill