Ang mga Pioneer sa Matag Yuta
Naluwas ni Margaret ang Lisod nga Adlaw
Ang barko nagkaunlod Unsa ang buhaton ni Margaret?
Si Margaret mibarog diha sa deck ug mitan-aw sa asul nga dagat sa iyang palibot. Ang barko nagtuya-tuya pataas ug paubos diha sa higanteng mga balod.
Ang pamilya ni Margaret mibaligya sa hapit tanan nilang kabtangan aron makalawig ngadto sa Estados Unidos. Ang biyahe molungtad og unom ka semana. Naguol si Margaret nga mobiya sa ilang panimalay sa Wales. Apan mahinamon usab siya kabahin sa iyang bag-ong panimalay.
Pipila ka bulan ang milabay, ang pamilya ni Margaret nakahimamat og mga misyonaryo gikan sa Ang Simbahan ni Jesukristo sa mga Santos sa Ulahing mga Adlaw. Si Margaret ug ang iyang mga ginikanan nabunyagan. Ug karon sila moapil sa uban nga mga Santos sa Zion.
Ang biyahe lisod sa pagkakaron. Ang inahan ni Margaret nagmasakiton. Ug ang iyang amahan nasakit gumikan sa mga katuigan nga nagtrabaho sa minahan sa karbon [coal]. Busa si Margaret miamuma nila. Iya usab nga giamumahan ang iyang manghod nga lalaki ug iyang batang manghod nga babaye. Dako kadto nga trabaho. Apan si Margaret wala mireklamo.
Usahay ang barko motuya og maayo diha sa tubig nga makapalain sa tiyan ni Margaret. Sa laing mga panahon mahadlok siya. Sa higayon nga siya nahadlok, iyang piyongon og maayo ang iyang mga mata ug mangayo og tabang sa Langitnong Amahan.
Usa ka adlaw nakadungog si Margaret og syagit. “Dunay buslot ang barko! “Malunod kita!”
Ang tanan nalisang. Ang kapitan misulti sa tanan sa pagpangita og mga balde. Gikandos sa mga tawo ang tubig gamit ang mga balde aron iyabo sa kilid sa barko.
Gustong motabang ni Margaret. Miluhod siya kilid sa iyang higdaanan ug nag-ampo og maayo kutob sa iyang mahimo. “Palihog Langitnong Amahan, tabangi ako nga makahunahuna og mga paagi sa pagtabang.”
Usa ka malinawon nga pagbati ang milukop sa kasingkasing ni Margaret. Nasayod siya nga ang Langitnong Amahan nagbantay kaniya. Siya motabang kanila.
Dayon nakaideya siya.
Iyang gibira ang duha ka puti nga habol nga delana [wool] diha sa iyang higdaanan ug midagan aron sa pagpangita sa kapitan. “Dia ra o,” miingon siya. “Ibutang kini diha sa buslot aron mohunong ang pagsulod sa tubig.”
Nakauyon ang kapitan sa ideya ni Margaret. Iyang gisungsong ang mga habol ngadto sa buslot. Dayon iyang gibuboan kini og dakong balde sa init nga alkitran. Sa dihang nabugnaw na ang alkitran, ang liki nabulitan na!
“Salamat sa paghatag sa imong mga habol,” miingon ang kapitan. “Ang imong paspas nga paghunahuna nakaluwas sa lisod nga adlaw.”
Mipahiyom si Margaret. Nasayod siya nga gidungog sa Langitnong Amahan ang iyang mga pag-ampo. Ang iyang pioneer nga panaw nagsugod pa lang, ug siya nasayod nga Siya motabang sa iyang matag lakang.
Ang unang mga misyonaryo miabot sa Wales niadtong 1840.
Usa ka balangay sa Wales adunay kinatas-ang ngalan sa lungsod sa kalibotan.
Adunay mas daghang karnero didto sa Wales kay sa mga tawo!
Si Margaret Griffiths 11 anyos pa sa dihang siya nabunyagan.
Sa dihang midako na si Margaret, naminyo siya ug nakabaton og walo ka anak.
Miserbisyo siya isip presidente sa Relief Society sulod sa 26 ka tuig.
Mga paghulagway pinaagi ni Laura Catrinella