Imong Sinulat
Unsay Makapalipay Kanako
Sama sa tanan, aduna akoy pipila ka tumong ug mga pangandoy. Gusto kong motabang sa mga tawo, sama sa gibuhat ni Jesus. Gusto kong mahimong buotan ngadto sa tanan. Ug gusto kong mahimong malipayon sa pagbuhat sa mga butang nga akong ganahan.
Ang musika nagtugot kanako sa pagbuhat niining tanan nga mga butang. Moapil ako sa mga pasundayag sa musika sa simbahan pinaagi sa pagkanta, pagtukar sa piyano, ug pagtukar sa biyolin. Alang sa usa ka programa sa Primary, mipatukar ako sa piyano samtang mikanta ang ubang mga bata. Gikinahanglan nakong maningkamot ug magbansay og maayo. Apan malipayon kaming tanan sa pagbuhat niini. Ang akong manghod nga lalaki ug akong manghod nga babaye ganahan usab og musika. Mao nga gitabangan nako sila nga magbansay sa ilang mga instrumento. Ug mokanta ako ug mga himno ug mga awit uban kanila.
Magmalipayon usab ako pinaagi sa pagtabang diha sa panimalay. Ang akong papa nagserbisyo diha sa kasundalohan, mao nga gitabangan nako si Mama pinaagi sa pag-atiman sa akong igsoon nga lalaki ug igsoon nga babaye. Basahan nako sila og mga istorya. Makigdula ako kanila. Maminaw ako kon gikinahanglan nila nga moistorya. Ug ganahan kong magluto.
Ang akong iro, si Ricky, nagtabang usab kanako nga mahimong malipayon. Nakuha namo siya gikan sa usa ka dangpanan sa mga hayop [shelter]. Karon ingon og kabahin na siya sa pamilya. Motabang ako sa pag-atiman kaniya.
Ganahan kong magpadala og mga kard sa adlawng natawhan ngadto sa akong pamilya ug mga higala. Makapalipay kana kanila, ug makapalipay usab kini kanako. Bisan og maulawon ako og gamay, naningkamot ako nga makahimo og bag-ong mga higala. Naningkamot ako nga magmabination tungod kay nasayod ako nga kana mao ang buhaton ni Jesus. Mobati ako nga malipayon kon motabang ako sa uban tungod kay nasayod ako nga ako nagsunod Kaniya.
Mga paghulagway pinaagi ni Kristin Sorra