Ang Paghinulsol usa ka Maayong Butang!
Si Gemma wala masayod nganong siya nasuko og maayo.
Si Gemma ug ang iyang higala nga si Harper naglingkod ilawom sa punoan sa kahoy diha sa atubangan sa balay ni Gemma. Ang punoan sa kahoy puno sa blossom nga mga bulak nga kolor rosa. Usa kadto ka matahom nga adlaw.
“Abi nimo kon unsa?” miingon si Harper. “Ang akong ig-agaw mogradwar sa elementarya.”
Mipunit si Gemma sa sagbot. Nangandoy siya nga siya makagradwar usab.
“Nindot tingali, kana,” miingon siya.
“Aduna kami dakong hikay sa pamilya aron sa pagsaulog,” miingon si Harper. “Ang akong ig-agaw maghayskol na sa sunod tuig. Suwerte kaayo siya!”
“Ang akong igsoon nga lalaki naghayskol na,” miingon si Gemma.
“Nakahibalo ka ba nga sa hayskol aduna na kay imong kaugalingon nga locker?” Nangutana si Harper.
“Oo, nakahibalo ko!” miingon si Gemma. “Bag-o lang tika nga gisultihan—nga ang akong igsoong lalaki anaa na sa hayskol.” Nganong si Harper sige og pasigarbo? Naghunahuna si Gemma. Dili siya mohatag nako og kahigayonan nga mosulti og bisan unsang butang!
“Ug moadto sa gym! Sila moadto sa gym sa matag adlaw,” miingon si Harper. “Ang akong ig-agaw miingon—”
“Harper, wala koy labot unsa ang gisulti sa imong ig-agaw,” miingon si Gemma. “Kahibalo na ko sa tanan kabahin sa hayskol.”
Si Harper mitutok sa mga bulak diha sa ubos nga nangatagak gikan sa punoan sa kahoy. Nanginit ang pamati sa nawong ni Gemma. Wala siya masayod kon unsa ang buhaton o isulti.
Sa kataposan mibarog si Gemma. Gipaphaan niya ang mga yuta sa iyang karsones ug midagan ngadto sa iyang balay.
Nganong nasuko man siya og maayo? Walay gibuhat si Harper nga sayop. Milingkod si Gemma sa daplin sa iyang katre ug miginhawa og lawom. Nanghinaot siya nga wala unta siya misulti niadto ngadto ni Harper. Dili gayod kadto mabination.
Mitan-aw siya sa iyang lamesa ug nakita ang usa ka binder nga peach ang kolor nga dunay sinaw nga mga kasingkasing. Mao kadto ang libro sa bunyag nga gihimo sa iyang mama. Sa sulod mao ang mga litrato gikan sa iyang kinabuhi ug mga sulat gikan sa pamilya ug mga higala. Gikuha niya ang binder ug gipakli ang mga pahina.
Nakabantay siya og usa ka sulat. Mabasa kini, “Gusto ko nga masayod ka nga ang Langitnong Amahan mapasigarbohon sa imong pagpili sa pagpabunyag. Kon makahimo ka og kasaypanan ug maghinulsol, Siya mopasaylo kanimo. Ang paghinulsol usa ka maayong butang!”
Miginhawa og lawom si Gemma. Ang paagi sa iyang pagtratar ni Harper dili maayo nga pagpili. Apan nasayod siya unsa ang buhaton karon.
Midagan siya sa gawas ug milingkod tupad ni Harper. Miduko si Harper.
“Pasayloa ko sa unsay akong nasulti. Wala unta nako buhata ang kawalay pamatasan,” miingon si Gemma.
Mihangad si Harper. “OK ra na. Kahibalo ko nga wala kadto nimo tuyoa. Salamat sa pagpangayo og pasaylo.” Gihatagan niya si Gemma og usa ka bulak nga natagak gikan sa punoan sa kahoy.
Nianang gabhiona, si Gemma misulti ni Mama unsa ang nahitabo. “Gipasaylo ko ni Harper,” miingon si Gemma. “Apan nagkinahanglan gihapon kong maghinulsol ngadto sa Langitnong Amahan. Makatabang ka ba nako?”
“Siyempre,” miingon si Mama. Gigakos niya si Gemma pag-ayo. “Gusto ba nimo nga mag-ampo kabahin niini karon dayon?”
Si Gemma ug si Mama nangluhod.
“Minahal nga Langitnong Amahan,” nag-ampo si Gemma, “pasayloa ako nga ako walay pamatasan ngadto ni Harper. Gusto nakong maghinulsol ug maningkamot nga mahimong mas maayo.”
Si Gemma mibati og maayo sa kahiladman samtang siya nag-ampo. Nalipay siya nga iyang natarong ang mga butang ngadto kang Harper. Ug ngadto sa Langitnong Amahan. Ang paghinulsol usa ka maayong butang!
Mga paghulagway ni Carolina Farías