Ang 15 Minutos nga Milagro
Hapit na molarga ang bus. Makaabot kaha sila?
“Tan-awa!” Mihunghong si Sasha. “Adunay laing squirrel.” Nalingaw siya sa pagsuroy-suroy sa Sochi Arboretum. Ang dako kaayo nga parke adunay tanang matang sa matahom nga mga bulak ug mga kahoy. Didto sa panimalay, sa tunga-tungang Russia, nag-ulan pa gihapon og niyebe ug hilabihan ka tugnaw. Apan dinhi sa Sochi, nagsidlak ang adlaw, ug ang hangin matimahoan nga ingon og tingpamulak.
Gitan-aw ni Sasha ang squirrel nga nagkitkit sa usa ka liso [nut]. Anaa pa gihapon niini ang baga nga balahibo alang sa tingtugnaw, apan gibanabana ni Sasha nga sama kaniya mahinamon kini alang sa tingpamulak. Mingisi siya samtang ang squirrel nagdali-dali og saka sa usa ka kahoy.
Diha dayon mibagting ang telepono ni Mama. “Hello?” Miingon si Mama. Mihunong siya. “Apan nagtuo ko nga ang among mga tiket para ugma! Karon diay?” Sa wala madugay gibutang niya ang telepono.
“Sasha! Kinahanglan na kitang molakaw karon. Ang atong pagsuroy-suroy sa Skypark kay karong buntag, ug ang bus molarga na sulod sa 15 minutos!”
“Makaabot kaha kita sa hunonganan sa bus og ingon niana ka dali?” Nangutana si Sasha.
“Hinaot unta. Kinasingkasing kitang mag-ampo ug buhaton nato angtanan.” Gigunitan ni Mama ang iyang kamot, ug misugod sila sa pagdagan.
Dako ang Sochi Arboretum. Dili segurado si Sasha kon makit-an nila ang agianan pagawas! Kinasingkasing siyang nag-ampo. Palihog tabangi kami nga makaabot sa hunonganan sa bus sa hustong oras. Ganahan gayod kami nga moadto sa Skypark.
Ang Skypark usa ka parke sa kalingawan didto sa taas sa kabukiran. Kini adunay dagko nga mga swing, mga bungbong nga makatkatan, mga zipline, ug malatay-latayan nga mga pisi [ropes course]. Aduna usab kini Skybridge—usa ka taas kaayo nga taytayan nga nagbitay didto sa taas sa langit. Naglaom si Sasha nga makaabot sila didto sa hustong panahon.
Sa kataposan nakit-an nila ang punoan nga dalan ug nangita og taxi. Nakakita ra dayon sila og taxi! Misakay sila ug gisultihan ni Mama ang drayber sa ngalan sa hunonganan sa bus.
“Swerte mo!” miingon ang drayber. “Nakahibalo ko og shortcut.”
Naglantaw sa gawas sa bentana si Sasha samtang gilabyan nila ang mga kahoy.
“Makaabot kaha ta?” Nangutana si Sasha kang Mama.
Mitan-aw si Mama sa iyang relo. “Ambot lang. Apan nag-ampo kita. Ug bisan kon dili kita makaabot, OK ra. Anaa kita sa usa ka pagpanimpalad!”
Sa wala madugay miabot na sila sa hunonganan sa bus. Ang bus wala pa gani didto! Nalangay kini.
Naghangos pa gihapon si Mama ug Sasha, apan mipahiyom si Sasha. “Husto kadto nga drayber! Swerte gayod kita.”
“Para nako dili lang kadto swerte, langga,” miingon si Mama. “Usahay aduna kitay ginagmay nga mga milagro nga magpahinumdom kanato kon unsa kita ka mahal sa Langitnong Amahan.”
Diha dayon, miabot ang bus. Misakay si Mama ug si Sasha ug mipadulong ngadto sa Skypark. Mapasalamaton si Sasha alang niining gamay nga milagro!
Paghulagway pinaagi ni Mitch Miller