“Agalelei i le Kariota,” Uo, Mat. 2023, 28–29.
Agalelei i le Kariota
Sa moomoo Damien maimau pe ana le ee atu o ia i lona tuafafine.
Ina ua savali atu Damien i le paka, sa ia faalogoina le tātā o musika fiafia. Sa ave e lona tinamatua o ia ma lona tuafafine laitiiti, o Adele, e tietie i lana kariota e sili ona fiafia i ai. Sa i ai se taaloga malie ma ni mama. Sa fiafia Damien e faaali atu ia Adele le auala e taalo ai.
E lei umi ae la i ai i le laina. O le kariota sa lapoa ma felanulanuai, ma le tele o tama’i solofanua vane na i ai. Sa saofafai tamaiti foliga ataata i luga o tama’i ma talotalo solo a o latou tietie faataamilo.
“Afai e te pikiina se tama’i i le faatausiusiuga, e mafai ona e taalo i le taaloga mama!” Sa ta’u atu ai e Damien ia Adele. “Vaai i laau o loo uu e tamaiti? Ma vaai i le tamaloa o loo i ai mama?”
Sa tusi atu Damien i le tagata faigaluega. Sa tu o ia i talaane o le kariota ma faalālā mai se mama. A o latou tietie atu i le kariota, sa taumafai tamaiti e tuu a latou laau i le mama e sapo ai. O taimi uma lava latou te sapoa ai se mama, e uu mai e le tagata faigaluega se mama fou.
Sa patipati lima o Adele. “Ou te manao e sapo uma mama!” o lana tala lea.
Sa iu ina latou taunuu i le pito i luma o le laina. Ae sa toe tasi lava le solofanua na totoe i luga o le kariota.
“Damien,” o le tala lea a Tinamatua, “aisea ta te le tuu ai Adele e ave le avanoa mulimuli lenei ona e lei tietie muamua o ia? E mafai ona e tietie i le isi avanoa e sosoo ai.”
“Ua lelei,” na memumemu atu ai Damien. Sa ia vaavaai atu i le tagata faigaluega o fesoasoani ia Adele i luga o le tama’i enaena. Ona tuu atu lea e le tagata faigaluega ia Adele se fasilaau e sapo ai mama.
Sa amata le musika, ma amata ona taamilo le kariota. Sa tilotilo atu Damien ia Adele mai autafa ma Tinamatua. Ae sa uu e Adele le laau faasaga i tua! Nai lo le uuina o le au o le laau, sa ia uuina i le pito umī, ma mimiti e faaaoga e sapo ai mama.
“Adele, liliu lau laau!” sa ia ee atu ai. Ae sa foliga mai e lei lagona e Adele o ia i le pisapisao. Ina ua ia pasia le mama, sa pa’i atu i ai lana laau. Ae sa telē naua le ’au e le ofi ai le mama.
“Adele, lau laau!” Sa toe taumafai Damien. “O le a le mafai ona e sapoa ni mama pe afai e te uuina faapena!”
Ae sa lei lagona e Adele o ia. Sa na ona ataata ma ata o ia a o taamilo le kariota. Sa papa’i pea lava pea lana laau i le mama. Ae na te lei mauaina se mama e tasi.
Sa oi Damien. Sa faamaimau e Adele lona avanoa! Ana i ai o ia i luga o le kariota, o le a ia sapoina uma mama.
Ina ua uma le tietiega, sa tamoe atu o ia ia Adele.
“Sa ou tau atu ia te oe le auala e uu ai le laau!” sa ia ee atu ai. “Aisea na e le faalogo ai ia te a’u? Sa sese atoa lou faiga!”
Sa lei toe ee mai Adele ia Damien. Sa le’i tagi o ia. Sa tu o ia iina ma pei ua laitiiti, laitiiti, laitiiti.
Sa tatavale le fatu o Damien, ma sa vevela ona foliga. Sa ita o ia i le matamata atu ia Adele o misi uma na mama! Ae sa na o lona taimi muamua lea. E le gata i lea, sa foliga mai sa fiafia o ia. Seia oo mai i le taimi lenei.
Sa le lelei lagona o Damien! Sa moomoo o ia na te le’i ee ia Adele.
“Ou te faatoese atu,” sa ia fai atu lemu ai. “E le lelei lena mea na ou faia.”
Sa ea a’e i luga Adele.
“Ae a pe a ou tuuina atu ia te oe ni nai fautuaga mo le sapoina o mama?” Na fai atu ai Damien. “O le a ou nofo i ou autafa i luga o le kariota ma fesoasoani ia te oe.”
Sa luelue le ulu o Adele.
Ona liliu atu lea o Damien ia Tinamatua. “E mafai ona toe maua ni ma pepa ulufale se lua ina ia mafai ai e Adele ona toe faataitai?”
Sa ataata tinamatua. “Ioe.”
O lenei tala sa tupu i Farani.
Ata na tusia e Violet Lemay