“Na o Lillian Lava,” Uo, Mat. 2023, 40–41.
Na o Lillian Lava
Sa lei manao Lillian ia na o ia lava i le Tamaitai Talavou.
O le asō o le aso mulimuli lea o Lillian i le Peraimeri. O le a misia e Lillian isi tamaiti Peraimeri. Sa na o le toatolu i latou—e toalua teineiti laiti ma lona tuagane laitiiti, o Mikaele.
“O a ni ou lagona e uiga i le siitia atu i Tamaitai Talavou?” na fesili atu ai lona faiaoga Peraimeri.
“E le mafai ona ou faatali ou te alu i le vasega faatasi ma teineiti matutua!” Na fai atu ai Lillian.
“Ua ou fiafia o loo e fiafia,” o le tala lea a lona faiaoga. “O ai se isi o le a i ai faatasi ma oe i Tamaitai Talavou?”
Sa mafaufau Lillian i teineiti matutua i le uarota. Na faatoa uma le aoga maualuga a Summer ma Cova. Ma ua siitia ese atu le aiga o Melvina. Faatali. Na totoe ai . . . na o Lillian.
Mata o le a faape’i lana vasega a Tamaitai Talavou? Na o faiaoga ma ia? Sa foliga le manaia—ma tuuatoatasi. O le mafaufau i ai na popole ai Lillian. Sa ia faanonou. Sa lei manao o ia e na o ia lava i Tamaitai Talavou.
Mo le taimi atoa o le aso na totoe, sa mafaufau ai Lillian i le na o ia le tamaitai talavou. I le taumafataga o le afiafi, sa ia faaminoi solo meaai i luga o lana ipu e aunoa ma le ‘aia. Sa memumemu o ia pe a oo i lona taimi e faitau ai i le suesuega faaleaiga o tusitusiga paia.
Sa tuu i lalo e tina ana tusitusiga paia. “O le a le mea ua tupu?” o lana fesili lea.
Sa mapuea Lillian. “O le a na o au i Tamaitai Talavou!”
Sa see atu Tina e nofo i talaane o Lillian. Sa ia fusi mai o ia. “O le a le faigofie lena mea,” o lana tala lea. “O le a se mea e mafai ona tatou faia e fesoasoani ai ia te oe?”
Sa mafaufau Lillian mo sina taimi. “Atonu e mafai ona tatou tatalo ia siitia atu se isi teineitiiti i totonu o le uarota. Ma atonu e mafai e Tama ona tuuina mai ia te a’u se faamanuiaga.”
Sa ataata Tama. “O ni manatu maoae na.”
Sa tootutuli le aiga e tatalo. “Tama Faalelagi,” na amata ai Lillian, “Ua ou fiafia ua ou siitia atu i Tamaitai Talavou. Ou te le fia tuuatoatasi, ae afai o Lou finagalo lena, ua lelei lena. Faamolemole fesoasoani mai ia ou iloa le mea e mafai ona ou faia ia maua ai se lagona lelei atu. Ma afai E te finagalo e musuia se aiga e i ai se teineitiiti o lo’u matua e siitia mai i le matou uarota, o le a manaia tele foi lena mea.
Ina ua uma le tatalo, sa tuu e Tama ona lima i luga o lona ulu. “Ou te faamanuia ia te oe ia lagona le toafilemu e uiga i le siitia atu i Tamaitai Talavou,” o lana tala lea. “O le a faamanuia oe e le Tama Faalelagi ao e ole atu mo Lana fesoasoani.”
Sa lagona e Lillian le toafilemu. Sa lei mautinoa e ia po o le a le mea e mafai ona ia faia e faafaigofie ai ona siitia atu i Tamaitai Talavou. Ae sa ia iloa foi o le a fesoasoani le Tama Faalelagi ia te ia.
I le Aso Sa, sa fai pea si popole o Lillian. Ae sa ia manatuaina le filemu sa ia lagonaina ina ua uma le faamanuiaga a Tama. Sa ia iloa o le a seki o ia.
I le sauniga faamanatuga, sa faasilasila mai ai e le epikopo o Sister Barns o le a avea ma peresitene fou o Tamaitai Talavou. Sa tu i luga Sister Barns ina ua valaauina lona igoa. Sa lei iloa lelei o ia e Lillian, ae sa foliga faauogofie o ia.
Sa fai mai Tina a o pei lona matua o Lillian, sa avea lona taitai o Tamaitai Talavou ma se tasi o ana uo mamae. Atonu e mafai ona avea Lillian ma Sister Barns ma ni uo! O se tali lena i lana tatalo.
Ina ua uma le sauniga faamanatuga, sa alu Lillian i lona potuaoga fou. Sa tūtū se teineitiiti matua atu i totonu o le falefaafiafia.
“Talofa,” sa fai atu ai Lillian. “O e asiasi i le matou uarota?”
Sa lūlū le ulu o le teineitiiti. “Leai. Ua faatoā siitia mai lo matou aiga iinei.”
Sa ataata Lillian. “Sūsū mai i le matou uarota. O lo’u aso muamua lenei i Tamaitai Talavou.” Sa la saofafai i lalo ma le teineitiiti i le potuaoga. “Oi mo lou iloa, o lo’u igoa o Lillian.”
“E leai!” o le tala lea a le teine fou. “O lo‘u igoa foi o Lillian!”
Sa ata Lillian. Sa toe tali mai foi e le Tama Faalelagi lana tatalo! Atonu o le i ai i Tamaitai Talavou o le a le tuuatoatasi lava.
O lenei tala sa tupu i Ausetalia.
Ata na tusia e Sue Teodoro