Gaoioiga o le Sau, Mulimuli Mai ia te A’u

Mo afiafi faaleaiga, suesuega o tusitusiga paia, pe tau lava o se mea malie!

O Le Afā

Ata na tusia e Katy Dockrill

Mo le Mataio 8; Mareko 2–4; Luka 7

Tala: Faitau le tala ia Iesu Keriso o faatoafilemuina le afā i le itulau 46 po o le Mareko 4:36–41. Talanoa e uiga i auala e aumaia ai e Iesu ia te oe le filemu.

Pese: “Le Alofa o Lo’u Faaola” (Tusipese a Tamaiti, 42–43)

Gaoioiga: Tu i se li’o ma uu ia pito o se palanikeke. Tuu se polo i luga o le palanikeke ma togi lemu faataamilo ai, e pei o le vaa sa felafoaiina i luga o galu. Feauaua’i e ta’u atu i le vaega e o saoasaoa, faalemu, pe “ia filemu.”

Taaloga Taumatemate o Vavega

Mo le Mataio 9–10; Mareko 5; Luka 9

Tala: Sa faia e Iesu Keriso le tele o vavega. Sa Ia faamaloloina se tagata sa le mafai ona savali. Sa Ia toe faatu mai se teineitiiti mai le oti. Sa Ia faamaloloina tagata tauaso. (Tagai Mataio 9.) O a isi vavega na faia e Iesu?

Pese: “Tau Mai Tala ia Iesu” (Tusipese a Tamaiti, 36)

Gaoioiga: Tusi i lalo nisi o vavega a Iesu i luga o fasipepa ma tuu i totonu o se pesini. Filifili se pepa, faitau le vavega o loo i ai, ma tusi ai se ata. E mafai e isi ona mate mai po o le fea!

Galulue Faatasi

Mo le Mataio 11–12; Luka 11

Tala: Na fetalai Iesu Keriso, “E avegofie la’u amo, o la’u avega foi e mama ia” (Mataio 11:30). O se amo e fesoasoani i ni manu se lua e toso faatasi ai se mea. A tatou filifili e mulimuli ia Iesu, e mafai ona Ia fesoasoani ia i tatou i o tatou tofotofoga.

Pese: “Pe Ana Tu le Faaola i Ou Autafa” (ChurchofJesusChrist.org)

Gaoioiga: Fai atu i se tasi e faaminoi se mea mamafa i le isi itu o le potu. Ona tuu atu lea ia i latou e fesiitai lena mea faitino ma se fesoasoani a se tasi. Talanoa pe faapefea ona māmā a tatou avega pe a tatou liliu atu i le Faaola mo se fesoasoani.

Tusi Lau Lava Faataoto!

Mo le Mataio 13; Luka 8; 13

Tala: Sa aoao atu e Iesu le talalelei e faaaoga ai tala e ta’ua o “faataoto.” O se tasi o tala na Ia faamatalaina o le ala e mafai ai e se tamai fatu o le sinapi ona tupu ae i se laau tele (tagai Mataio 13:31–32). O a mea sa Ia aoaoina? O a isi faataoto na aoao mai e Iesu?

Pese: “A Ou Faalogo ma Lo’u Loto” (ChurchofJesusChrist.org)

Gaoioiga: E mafai ona fesoasoani faataoto tatou te malamalama atili ai i le talalelei. Sue i le itulau e 8 e tusi ai lau lava faataoto. Faasoa atu lau faataoto i tagata o le aiga po o uo.

Ua Lava ma Totote

Mo le Mataio 14; Mareko 6; Ioane 5–6

Tala: E i ai se taimi na faaalu ai e Iesu Keriso le aso atoa e aoao ai tagata. Sa fia aai tagata uma. Ae sa na o le lima areto ma i’a e lua sa i ai. Sa faamanuia e Iesu le areto ma i’a, ma sa faasoa atu e le au soo i tagata. Sa lava meaai mo le silia ma le 5,000 tagata! (Tagai Mataio 14:15–21).

Pese: “O Loo Ou Taumafai e Avea e Pei o Iesu” (Tusipese a Tamaiti, 40–41)

Gaoioiga: Fai lau fua o le falaoa e sili ona e fiafia i ai, pe faataitai le fua o loo i le itulau e 8. Matau le auala e faia ai e se mea laitiiti e pei o le fefete le papa falaoa atoa ia tele atu. Na faapefea ona faia e Iesu au taumafaiga laiti ia tetele?

Alu i le itulau 49 mo gaoioiga o le Sau, Mulimuli Mai ia te A’u mo tamaiti laiti ifo.