Aso o Lo’u Papatisoga

Saunia e Megan S., 10 tausaga, Michoacán, Mekisiko

O le aiga ma ni teineiti se toatolu o loo o i le lotu

Talofa lava! O lo’u igoa o Megan, ma ou te nofo i Mekisiko. Ou te fia faamatala atu ia te outou se taimi faapitoa tele i lo’u olaga—o le aso na ou papatiso ai.

Sa ou papatiso i le aso o lo‘u aso fanau na atoa ai lo’u valu [tausaga]. O se aso taua tele aua sa ou faamanatuina lo’u aso fanau e ala i le papatisoina.

O le papatisoina o se aafiaga matagofie tele. Sa faia e lo’u tina mo a’u se tamai api ma ni gaoioiga eseese e saunia ai. Sa fesoasoani ou te aoao ai e uiga i le taua o le papatisoga ma feagaiga o le a ou faia ma le Tama Faalelagi.

Teineitiiti i se ofu piniki o loo uuina se tamai api

E toatele tagata e alolofa ia te a’u na o mai i lo’u papatisoga. Sa ou lagona le fiafia tele ona sa latou o mai. Sa fai lo’u ofu paepae, ma sa mafanafana le vai.

Ina ua uma ona papatisoina a’u e lo’u tama, sa ou faamago ma sui o’u lavalava. Ona ou maua lea o le meaalofa o le Agaga Paia. Sa faamauina a’u o se tasi o O Le Ekalesia a Iesu Keriso o le Au Paia o Aso e Gata Ai e i latou ua umia le perisitua. Sa ou lagonaina le filemu, alofa, ma le olioli tele.

Teineitiiti o loo papatisoina a o matamata isi tamaiti

O le a ou manatuaina pea lena aso. Sa taua tele aua sa ou osia la’u ulua’i feagaiga ma le Atua. Sa ou folafola atu e mulimuli ia Iesu ma usitai i Ana poloaiga.

Afai e te popole pe o le a faape’i le aso o lou papatisoga, aua le popole. O le a fiafia le Tama Faalelagi i le filifiliga na e faia!