“O Le Tatalo o le Mafui’e,” Uo, Mat. 2022, 4–5.
O Le Tatalo o le Mafui’e
Ina ua ala ae Vaioleti, sa gatete mea uma!
O lenei tala sa tupu i Peru.
Sa moe Vaioleti ae na fafagu o ia i luga e se leo gogolo. I le taimi muamua, na faapea o ia o se faititili.
Ae peitai na faasolo ina matuai leotele le gogolo. Sa lulu ai faamalama o lona potumoe.
Sa vave ona nofo i luga Vaioleti. O se mafuie le mea lea!
Sa lei leva ona siitia atu o ia ma le latou aiga i Peru. Sa ia iloa e tele lava ina tutupu mafuie iinei. Ma sa saunia o ia ma lona aiga ma faataitai le mea e fai. Ae sa sili atu ona taufaafefe lenei mea nai lo le mea sa ia manatu o le a i ai. Sa mafai ona ia lagonaina le gatete o lona tino!
Sa tamoe atu Vaioleti i le umukuka ma totolo i lalo o le laulau. I ni nai sekone mulimuli ane, na faatasi atu ai lona tuagane ma lona uso ia te ia. Sa faapena foi Tina ma Tama.
“Lelei tele le manatuaina o mea sa tatou faataitaia,” o le tala lea a Tama. “O seki tagata uma?”
Sa luelue atu le ulu o le tuagane ma le uso o Vaioleti.
Ae sa fefe Vaioleti. Sa meoiini ona mata. Sa faigata ona le amanaiaina le lūlū sa siomia ai o ia.
Ona manatua lea e Vaioleti e tatalo. Sa piilima ma punou lona ulu. “Tama Faalelagi pele,” sa ia musumusu atu ai, “faamolemole tausi mai lo’u aiga.”
Sa tatalo pea Vaioleti. Sa ia lagonaina e pei na fusi o ia e se tagata. Ina ua uma, na ia tepa a‘e i luga. Sa piilima Tina ma Tama. Sa faapena foi lona tuagane ma lona uso. Sa latou tatalo uma! Sa gatete pea le eleele. Ae sa lagona e Vaioleti le toafilemu i lona loto ma lona mafaufau.
Mulimuli ane, sa uma le lūlū. Sa nonofo teisi pea Vaioleti ma lona aiga i lalo o le laulau, tina ia saogalemu pea.
“O a mai ou lagona?” Sa fesili atu ai Tina ia Vaioleti.
“Seki,” na fai atu ai Vaioleti. “I le taimi muamua sa ou matuai fefe lava. Ae o le tatalo na fesoasoani ou te maua ai se lagona lelei.” Sa ia fusi mai Tina. Sa ia fiafia na fesoasoani le Tama Faalelagi ia te ia e lagona le filemu.
Ata na tusia e Toby Newsome