“O le Tusi Tainasoa,” Uo, Mat. 2023, 22–23.
O le Tusi Tainasoa
Sa faauu Sofia. Aisea e le mafai ai ona fiafia foi o ia i tainasoa?
O Sofia ma Allie o se masaga, ma o i laua o ni uo mamae. Sa laua fiafia i mea eseese, ae o lena mea na sili atu ai ona malie! Sa laua fiafia e taaalo faatasi.
I se tasi aso i le aoga, sa aumai ai e Sofia se tusi e uiga i tainasoa mai le faletusi. Sa ia naunau lava e faaali atu ia Allie.
“E le mafai ona e faitauina lena mea,” o le tala lea a Timi, o se tamaitiiti i lana vasega.
“Aisea?” Sa fesili atu ai Sofia.
“O se tusi a tama,” o lana tala lea. “O tainasoa e mo tama.”
Sa faauu Sofia. Aisea e le mafai ai ona fiafia foi o ia i tainasoa? Sa ia tuuina le tusi i lana atofaafafa. O le a ia faitauina lava.
I le aso atoa, sa mafaufau Sofia e uiga i le tala a Timi. Sa ia lagona pea le le fiafia ina ua ia taunuu i le fale mai le aoga.
“O le a se mea ua tupu?” O le fesili lea a Tina.
“Sa fai mai Timi e le mafai ona ou faitauina se tusi e uiga i tainasoa,” o le tala lea a Sofia. “Sa ia fai mai o tainasoa e mo na o tama lava. E le moni lena mea, a ea?”
‘Ioe e leai,” o le tala lea a Tina.
Sa tilotilo i lalo Sofia. “Aisea la na fai mai ai Timi?”
“Atonu na te le iloa nisi teineiti e fiafia i tainasoa,” o le tala lea a Tina. “Ae e lei fai tutusa uma i tatou e le Tama Faalelagi. Ma e finagalo o Ia ia tatou agalelei i le tasi ma le isi.
Sa fusi e Tina ia Sofia. “Ou te faamalie atu ona na faapena ona fai oe e Timi. Ae e alofa leTama Faalelagi ia te oe. Ma e faapena foi au.”
“Faafetai, Tina,” o le tala lea a Sofia. Ua sili atu ona lelei ona lagona i le taimi nei.
“O le a ou talanoa i lou faiaoga e uiga i lenei mea, e?” Na fai atu ai Tina.
Sa luelue le ulu o Sofia. “Ua lelei.”
Sa alu Sofia e taaalo ma Allie. Sa la faia se taaloga e taua o le Purinisese Tutuu, lea sa fai ai pepe meataalo a Allie ma avetaavale o taavale tutuu. Sa felatai lava le iuga o le tuuga, ae o Purinisese Cheetah Emo namanumalo! Sa alalaga fiafia Sofia ma Allie.
“E te fia vaai i le tusi o tainasoa lea ua ou aumaia ananei?” Sa fesili atu ai Sofia.
“Ioe!” O le tala lea a Allie.
Sa ataata Sofia. Sa fiafia o ia sa ia maua i taimi uma ni taimi malie ma Allie.
O le aso na sosoo ai, sa i ai se faasilasilaga a le faiaoga a Sofia. “Vasega,” sa ia fai atu ai, “e i ai se mea ou te fia ta’u atu ia te outou. E le afaina le fiafia i mea eseese. O a tatou tusi ma meataalo uma e mo tagata uma.
Sa fiafia lava Sofia! I le taimi o le faitauga tusi, sa ia aumai i fafo le tusi tainasoa mai lana atofaafafa.
Na sau Timi i lana kesi. “Ou te faamalie atu sa ou fai atu e le mafai ona e faitau i le tusi lena,” o lana tala lea. “Ou te fiafia foi i tainasoa.”
“E le afaina,” sa fai atu ai Sofia. “Pe e te fia faitau faatasi ma a’u?”
“Ioe!” Sa nofo ifo Timi i ona talaane. “Faafetai.”
Sa tatala e Sofia le tusi. Sa eseese i laua ma Timi, ae sa manaia le faasoa atu i se uo fou.
O lenei tala sa tupu i le ISA.
Ata na tusia e Mark Robison