“Tausiaina o Lana Folafolaga,” Uo, Mat. 2023, 10–11.
Tausiaina o Lana Folafolaga
Sa ou pepelo nei lava ia Tama. O le a nei la?
O lenei tala sa tupu i Ghana.
“Toe ono aso oo i lo’u papatisoga!” Sa fai mai ai Happiness. Sa toeitiiti lava oo mai le aso!
“Ua e sauni?” na fesili ai Tama.
“Pei uma lava,” na fai atu ai Happiness.
“Pe a e papatiso, ua e osia se feagaiga,” o le tala lea a Tama. “E te manatua o le a le uiga o lena mea?”
“O se folafolaga, a ea?”
Na luelue le ulu o tamā. “Ioe! E te folafola atu e mulimuli ia Iesu Keriso ma tausi poloaiga. E folafola mai le Tama Faalelagi e faamanuia ma fesoasoani ia te oe.”
Sa ataata Happiness. Sa ia iloaina o se folafolaga taua. Sa fiafia o ia e faia!
Mulimuli ane, na oo mai le aso o lona papatisoga. Na sui Happiness i ni ofu papae. E toalua isi tamaiti na papatisoina foi. Sa latou matamata uma a o faatumulia le vaipapatisoga i le vai.
Ina ua oo i lona taimi, sa laa atu Happiness ma Tama i totonu o le vaipapatiso. Sa faia e Tama le tatalo o le papatisoga. Ona pupuni lea e Happiness o lona isu, ma sa tuutuu ifo i lalo e Tama o ia i le vai.
Ina ua ia toe tulai ae, sa lagona e Happiness se lagona lelei tele i totonu! Sa manao o ia e tausia lana folafolaga e mulimuli ia Iesu. Sa manao o ia ia lagonaina lenei mamā ma le fiafia e faavavau. Sa lei manao lava o ia e toe faia se filifiliga sese.
I ni nai aso mulimuli ane, sa ala ae i luga Happiness ma ki le faavevela vai ina ia mafai ona ia taele. Sa umi se taimi e faavevela ai le vai. O lea na ki ai e Happiness le TV. Sa manao o ia e matamata i atakomi a o faatalitali.
Sa ata Happiness a o matamata i meaola tautatala i luga o le lau televise. Sa matuai malie tele le ata! E lei umi ae galo nimo ia te ia le faavevela vai.
I se itula mulimuli ane, sa savali atu ai Tama i totonu o le potu. “O le a le umi na ola ai le faavevela vai?” na ia fesili ai.
Sa ea a’e i luga Happiness. Sa umi atu lana matamata i le TV nai lo o le mea na ia faamoemoe i ai!
“E lei umi tele,” o le tala lea a Happiness. “Na o ni nai minute.” Sa ia tapeina le TV ma tamoe e taele.
Ae mo le aso atoa na totoe, sa lagona e Happiness le le fiafia i totonu. Ina ua uma lona papatisoga sa manao o ia e aua lava nei faia se filifiliga sese. Ae sa pepelo nei lava ia Tama!
Sa mapuea Happiness. Na ia iloa le mea e tatau ona ia faia.
“Ei, Tama,” o le tala lea a Happiness. “Sa ou faia se pepelo. Sa ou tuua le faavevela vai mo se taimi umi, ae ou te lei fuafuaina. Ou te faamalie atu.”
“E le afaina. Faafetai mo le ta’uina mai ia te a’u,” o le tala lea a Tama.
“Ua lagona lava le faanoanoa ona sa ou solia la’u folafolaga o le papatisoga,” o le tala lea a Happiness.
Sa nonofo i lalo Tama ma Happiness i le nofoa. “Ina ua e papatiso, e te lei folafola atu ia atoatoa. Sa e folafola atu e taumafai malosi e mulimuli ia Iesu.”
Sa luelue le ulu o Happiness. O lena mea na ia maua ai sina lagona fiafia teisi.
“Ma e te iloa le mea e mafai ona e faia pe a e faia se filifiliga sese?” O le fesili lea a Tama.
“Salamo?” o le tala lea a Happiness.
“E sa’o! Pe a tatou salamo, e faamagalo e le Tama Faalelagi i tatou. Ona mafai lea ona tatou mamā e pei lava o le aso na tatou papatiso ai. O le salamo o se vaega o le tausia o le folafolaga o lou papatisoga.”
Sa ataata Happiness. “O le a ou tatalo ma ole atu i le Tama Faalelagi e faamagalo a’u.” Sa fiafia o ia e mafai ona ia tausia le folafolaga o lona papatisoga.
Ata na tusia e Macky Pamintuan