“Ko e Maʻu Meʻatokoni Efiafi Faka-Selusalemá,” Ko e Kaumeʻá , ʻEpeleli 2023, 4–5.
Ko e Maʻu Meʻatokoni Efiafi Faka-Selusalemá
Naʻe nofo ʻamanaki atu ʻa Kitione ki he tukufakaholo ko ʻení ʻi he taʻu kotoa pē.
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Ko e ʻaho ia kimuʻa he Toetuʻú. Naʻe ʻuhinga ia ʻe Maʻu Meʻatokoni Efiafi Faka-Selusalema ʻa Kitione mo hono fāmilí ʻi he pooni! Naʻe nofo ʻamanaki atu ʻa Kitione ki he tukufakaholo ko ʻení ʻi he taʻu kotoa pē. Naʻá ne fakaʻamu ke nau fakahoko tuʻo lahi ia he taʻu. Ka naʻe talaange ʻe heʻene faʻeé kuo pau ke nau tatali ki he Toetuʻú ke tauhi ia ke makehe.
Naʻe fola ʻe Kitione mo ʻAmelia ha sipi kafu ʻi he falikí ke tangutu ai ʻa e tokotaha kotoa pē. Naʻe ʻalu leva ʻa Kitione ke tokoni ki heʻene faʻeé mo ʻene tamaí ki he meʻakaí. Naʻá ne saiʻia he feimeʻatokoní. Ko e konga naʻe saiʻia taha ai ʻa Kitioné ko hono teuteuʻi ʻo e meʻakaí.
Ko e meʻakai kotoa pē ko e ngaahi meʻa ia mahalo naʻe kai ʻe Sīsū ʻi Heʻene kei ʻi māmaní. Ko hono moʻoní, naʻe ʻikai ke nau ʻiloʻi fakapapau. Ka ko e meʻa lelei ke fakakaukau ki he taumafa ʻe Sīsū ʻa e meʻakai tatau mo ʻEne kau ākongá ʻi Selusalemá. Ko e ʻuhinga ia naʻe ui ai ia ʻe he fāmili ʻo Kitioné ko ha maʻu meʻatokoni efiafi Faka-Selusalemá!
Naʻe toʻotoʻo ʻe Kitione ha kato mā lafalafa mo ha poulu paame mōmoa. Naʻá ne tuku ia ʻi he sipi kafú. Naʻe ʻi ai foki mo ha huʻa hone ke vali ʻaki ʻa e mā lafalafá. Naʻe ʻomi ʻe ʻAmelia ha hina ʻōlive mo ha tisi apricot mōmoa mo e ʻalamoni. Pea hoko mai ʻa e siisi mo e kiukamipā naʻe ʻosi tofitofi. Pea mo e peleti ika mo e ngaahi ipu vai. Naʻe tokanga lahi ange ʻa e fānaú ʻi hono toʻo ʻo e ngaahi ipu inú ke ʻoua naʻa mahua.
Naʻe tangutu takatakai ʻa e tokotaha kotoa pē ʻi he sipi kafú. Naʻe tāpuakiʻi ʻe heʻene faʻeé ʻa e meʻakaí.
Naʻá ne lotu ʻo pehē, “Fakamālō atu ki he ʻAfioná ʻi he taimi ko ʻení ke mau manatu kia Sīsū ʻi he Toetuʻú.”
Hili e lotú, naʻe fepaasiʻaki ʻe he fānaú e ʻū peleti meʻakaí ki he tokotaha kotoa. Naʻa nau toʻo ha apricot mo ha kiukamipā. Naʻe taʻofi ʻe Kitione ʻa e pēpeé naʻa faifai pea te ne huaʻi ʻa e ʻōlivé. Naʻe kai ʻa e tokotaha kotoa pē ʻaki honau nimá. Naʻa nau talanoa mo kakata.
Naʻe vali ʻe Kitione ha siisi ʻi heʻene maá. Naʻá ne tānaki atu leva ha huʻa hone. Naʻe ifo ʻaupito!
“Ko e hā ʻa e talanoa ʻokú ke saiʻia taha ai fekauʻaki mo Sīsuú?” Ko e ʻeke ange ia ʻe he Tangataʻeikí ki he fānaú.
“ʻOku ou saiʻia ʻi he talanoa ʻo e ʻaʻeva ʻa Sīsū ʻi he fukahi tahí!” Ko e lea ange ia ʻa Sulivení.
Naʻe tuhu ʻa Kitione ki he peleti iká. “Pea ʻoku ou saiʻia ʻi he taimi naʻá Ne fafanga ai ʻa e tokotaha kotoa pē. Naʻá Ne fafanga ha kakai ʻe lauafe ʻaki ha ngaahi foʻi mā siʻisiʻi pē mo ha mataʻi ika ʻe niʻihi. Ko e talanoa ia ʻoku ou saiʻia taha aí.”
Naʻe pehē ange ʻe heʻene faʻeé, “ʻOku ou saiʻia foki he ngaahi talanoa ko iá. ʻOku ʻai ʻe Sīsū ke malava ʻa e ngaahi meʻa ʻoku ʻikai ke tau teitei lava ʻo fai ʻiate kitautolu peé.”
Naʻe pehē ʻe heʻene tamaí, “Kuo tau mamata foki ki ha ngaahi mana lahi ʻi heʻetau moʻuí.”
Naʻe pehē ʻe Kitione, “Hangē pē ko e founga ne mau maʻu ai ha ngaahi kaungāmeʻa foʻou ʻi he taimi kotoa pē ne tau hiki aí.”
“Ko ia!” ko ʻene faʻeé atu ia. “ʻOku tau lava ʻo mamata ki he ngaahi mana mo e ngaahi tāpuaki ʻoku hoko kiate kitautolú.”
ʻI he ʻosi ʻa e maʻu meʻatokoni efiafí, naʻa nau mākona mo fiefia. Naʻe tokoni ʻa Kitione ʻi hono ʻave ʻo e ʻū peletí ki he singí. ʻI he taʻu kahaʻú, te nau toe maʻu meʻatokoni efiafi Faka-Selusalema pē. Ka naʻe ʻikai fiemaʻu ia ke ne tatali ki ai kae toki fakakaukau kia Sīsū. Te ne lava ʻo fai ia he ʻaho kotoa pē!
Tā fakatātaaʻi ʻe Tania Rex