“Taʻengata pea Maʻu Ai Pē,” Ko e Kaumeʻá, ʻEpeleli 2023, 12–13.
Taʻengata pea Maʻu Ai Pē
“Te u toe sio nai kia Lose?” Ko e fehuʻi ange ia ʻa Sēmisí.
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe tangutu toko taha pē ʻa Sēmisi ʻi hono mohengá. Naʻe lōngonoa ʻaupito ʻa e falé. Naʻá ne ʻofa ki hono kiʻi tuofefine kei valevale ko Losé. Naʻe ʻikai fuoloa mei heʻene mālōloó. Naʻá ne kei uike ua pē [mei hono fāʻeleʻí].
Naʻe maʻu atu ʻe Sēmisi ʻene faʻeé ʻi he loki ‘o Losé. Naʻe sio ʻa Semisi ki he mohenga pēpē ʻo Losé. Naʻe fakatupu loto-mamahi kiate ia.
Naʻá ne pehē leʻo siʻi ange, “Mami, ʻoku ou ofa moʻoni kia Lose.”
Naʻe malimali ʻene faʻeé, ka naʻá ne mata mamahi foki mo ia. Naʻá ne fāʻofua kia Sēmisi. “Pea ʻoku pehē pē mo au.”
“Te u toe sio nai ki ai?” Ko e fehuʻi ange ia ʻa Sēmisí.
Naʻe pehē ange ʻe heʻene faʻeé, “ʻIo. ʻE ʻi ai e ʻaho te tau toe sio kotoa ai kia Lose.”
Naʻe feinga ʻa Sēmisi ke fakakaukau loto pē kia Lose. Naʻá ne fakakaukau ki hono laʻiʻulu mingimingí mo hono ongo kiʻi nima īkí. Naʻá ne ʻofa ʻia Lose. Naʻá ne fiefia te ne toe sio kiate ia ʻi ha ʻaho. Ka ʻi he taimi ní, naʻá ne loto mamahi ʻi heʻene puliá.
Hili ha ngaahi ʻaho siʻi mei ai, kuo hokosia e taimi ke fai ai ʻa e efiafi ʻi ʻapí. Taimi ʻe niʻihi naʻe akoʻi ʻe heʻene faʻeé pe tamaí ha lēsoni. Ko e taimi ʻe niʻihi naʻa nau ngaohi fakataha ha meʻakai lelei. Ka ʻi he uike ko ʻení naʻe talaange ʻe heʻene tamaí, “Tau ō ʻo ʻeva kā.”
Naʻe toʻo mai ʻe heʻene faʻeé ha fuʻu tohi lahi, pea naʻa nau heka ki he kaá. Ne ʻikai fuoloa kuo sio ʻa Sēmisi ki ha ngoue tiulipe lanu pingikī, kulokula, mo engeenga. Naʻá ne mamata ki ha fale māʻolunga mo hinehina naʻe ʻi ai ha ʻīmisi koula ʻi ʻolunga. Naʻe ʻi ai ha ongo makehe ʻi he feituʻú ni.
“ʻOkú ke ʻiloʻi e feituʻu ʻoku tau ʻi aí?” Ko e fehuʻi ange ia ʻene tamaí.
“Ko e temipalé!” Ko Sēmisi ange ia.
Naʻe pehē ange ʻe heʻene faʻeé, “ʻOkú ke moʻoni. Ko e feituʻu ʻeni naʻá ku mali ai mo hoʻo tamaí.”
Naʻa nau hifo ki tuʻa mei he kaá ʻo tangutu ʻi ha sea. Naʻe fakaava hake ʻe heʻene faʻeéʻa e tohí. Naʻe sio ʻa Sēmisi ki ha fakatātā ʻo e temipalé. Naʻe ʻi he fakatātaá foki ʻene faʻeé mo ʻene tamaí. Naʻe tui ʻe heʻene faʻeé ha kofu hinehina lōloa
Naʻe talaange ʻe Sēmisi ki heʻene faʻeé, “ʻOkú ke hangē ha kuiní. Pea ʻoku hangē ʻa e temipalé ko ha kāsoló.”
Naʻe malimali ʻene faʻeé. “ʻOku makehe ange ʻa e temipalé ia ʻi he kāsoló. Koeʻuhí ko e temipalé, e lava ke tau fakataha mo hotau fāmili ʻo taʻengata.”
Naʻe huke hake ʻe heʻene faʻeé ʻa e peesí. Naʻe tuhu ʻa Sēmisi ki ha tā ʻo ha kiʻi pēpē tangata. Naʻá ne fehuʻi ange, “Ko au nai ē?”
Naʻe pehē ange ʻe heʻene faʻeé, “ʻIo. “Ko ha kiʻi pēpē fakaʻofoʻofa koe. ʻOku ou fiefia te tau lava ʻo nofo mo koe ʻo taʻengata.”
Naʻe toe huke hake ʻe heʻene faʻeé ʻa e peesí. Naʻe ʻi ai ha laʻitā ʻo Lose.
“Mo Lose foki?” Ko e fehuʻi ange ia ʻa Sēmisí.
Naʻe pehē ange ʻe heʻene tamaí, “Mo Lose foki. ʻI he hokosia ʻa e taimi ke tau ʻalu ai ki hēvaní, ʻe lava ke tau toe fakataha mo Lose.”
Naʻe fehuʻi ange ʻe Sēmisi, “ʻO Taʻengata?”
Naʻe pehē ange ʻe heʻene faʻeé, “ʻO taʻengata maʻu ai pē.” Naʻá ne huke leva ki he peesi fakaʻosí. Naʻe sio ʻa Sēmisi ki ha laʻitā ʻoʻona mo ʻene Tamaí, Faʻeé, mo Lose.
Naʻe sio hake ʻa Sēmisi ki he temipalé. Naʻá ne manatu ʻofa kia Lose. Ka naʻá ne fiefia kuo ʻomi ʻe he Tamai Hēvaní ha founga ke fakataha ai hono fāmilí ʻo taʻengata.
Ngaahi tā fakatātā ʻa Hollie Hibbert